གནམ་ལོ་གསར་པ་ཚེས་པའི་དུས་ཚིགས་ཀྱི་བར་ནས།།
གཡང་ཆགས་མི་ནོར་བཀྲ་ཤིས་རེ་ཁ་དེ་འགྲིག་སྟེ།།
འཇིག་རྟེན་ཞི་བའི་ལྷིང་ལ་གནས་པ་རེ་ཡོང་ནས།།
ཁམས་གསུམ་འཁོར་བའི་གྲོང་ནས་རེ་ཐག་ཅིག་སྨོན་ཡོད།།
སྐོམ་པའི་གདུང་བ་སེལ་བའི་དྭངས་གཙང་གི་ཆུ་བོ།།
ཆུ་ཕུད་ཁྱིམ་དུ་ལེན་བཞིན་སྨོན་ལམ་རང་བཏབ་སྟེ།།
མི་ནོར་གཡང་གི་ཁ་གཡང་མང་བ་རེ་བཏོན་ནས།།
གནམ་ལོ་གསར་ཚེས་དགའ་བའི་འཛུམ་པ་ཡིས་བསུ་འགྲོ།།
ཞོགས་པའི་སྐྱ་རེངས་ལྷན་དུ་སྔ་མོ་རུ་ལངས་ནས།།
ལྷ་ཤིང་ཤུག་པའི་བསང་དུད་དགུང་སྔོན་ལ་བསྒྲོན་ཏེ།།
ལྷ་ཀླུ་ལན་ཅིག་བསྟོད་པའི་ལམ་ཁ་ལ་བརྩོན་ཞོར།།
འགྲོ་ལ་ཕན་བདེ་འབྱུང་བའི་ཀི་བསྭོ་ཞིག་བརྒྱབ་ཡོད།།
ཁ་ཟས་མེས་པོའི་རྒྱུད་པ་སྡེར་ཁ་རུ་བསྒྲིགས་ཤིང་།།
བཅུད་བཟང་མར་དང་གྲོ་མ་ཡང་དག་རེ་མཆོད་ནས།།
ལུས་བཀླུབས་སྲོལ་རྒྱུན་གོས་བཟང་མཛེས་པ་རེ་སྤྲོས་ལ།།
གར་དང་གླུ་ཡི་རྒྱ་མཚོ་སྙན་འཇེབས་རེ་བྱས་ཡོད།།
ཟས་མཆོག་ཐོག་མ་ལྷ་དང་བླ་མ་ལ་མཆོད་ནས།།
བར་དུ་རྒས་དང་ཕ་མར་ཡང་དག་རེ་གསོལ་ཅིང་།།
ལོ་སར་ཚེས་གཅིག་ཉིན་ནས་ཅི་དགའ་རུ་མཛོད་དེ།།
དགའ་སྤྲོ་སེམས་ཁམས་དགྱེས་པའི་ལོ་སར་ཞིག་རོལ་བ།།
མ་དག་ཤོག་སྦག་མེ་ལ་དོན་མེད་དུ་མི་སྒྲོན།།
སྙིང་པོ་དབེན་པའི་ཤོ་བག་དངུལ་འཛུག་དེ་མི་རྩེ།།
ཕ་མ་ལྷན་དུ་སྙན་པའི་སྐད་ཆ་རང་བཤད་དེ།།
ཚེ་གཅིག་ལྷན་འཛོམ་དགོད་སྒྲ་རྣམ་པ་ལ་རོལ་ཤོག།
རྟག་ཏུ་བྲལ་མེད་ཁུར་བའི་ལག་འཕྲིན་གྱི་ཁ་པར།།
ལོ་སར་སྐབས་སུ་མ་གཡེང་ཅུང་ཟད་དུ་བཞག་ནས།།
ཁྱིམ་མི་ལྷན་དུ་སྐྱིད་པའི་ལོ་སར་ཞིག་རོལ་ཏེ།།
ཕན་ཚུན་སྤྲོ་སྣང་ལྡན་པའི་འཚོ་བ་དེ་སྤྱོད་ཤོག།
སྐྱིད་སྐྱིད་གནམ་ལོ་གསར་པ་ཡང་དག་རེ་བསུས་ནས།།
སྤྲོ་སྤྲོ་ལྷན་འཛོམ་འཚོ་བའི་སྐྱིད་པ་རེ་གཏོང་ཞོར།།
མ་འོངས་མི་ཚེ་ནད་མེད་ཞི་བདེ་ཡི་འཇིག་རྟེན།།
ནམ་ཡང་འཆར་བའི་སྨོན་པ་ཡིད་སེམས་ནས་འདེབས་སོ།།
ཡང་དག་སྨོན་པ་ལྡན་པའི་ཤིས་ཚིག་ཅིག་མིན་ཡང་།།
གནམ་ལོ་གསར་པར་ཕུལ་བའི་བཀྲ་ཤིས་ཀྱི་ཁ་གཡང་།།
ཅུང་ཟད་ང་ཡིས་བྲིས་པ་འདི་ལྟར་ཞིག་བརྗོད་དེ།།
ངག་རིག་ཕོ་ཉར་སྐུར་བའི་ཆབ་ཤོག་ཏུ་སྤྲིངས་ཡོད།།
༼ སྙན་རྐང་གླིང་། ༽