ནམ་མཁའི་བཞིན་ལ་འོད་ཀྱི་འཛུམ་རིས་ཤར།།
ས་གཞིའི་པང་ལ་དགོད་པའི་འབྲུག་སྒྲ་ལྡིར།།
མཐོན་པོའི་རི་རྩེར་སྤྲིན་པའི་ཁ་བཏགས་གཡོགས།།
དམའ་མོ་གཞུང་ལ་ཆུ་བོའི་དགེ་ལེགས་འཕེལ།།
མཐོ་བརྗིད་བླ་མའི་མཛད་འཕྲིན་གཙང་པོའི་རྒྱུན།།
དྲིན་ཆེན་ཕ་མའི་སྐུ་ལུས་རི་རྒྱུད་བརྟན།།
ཤེས་སྩོལ་སློབ་དཔོན་ཉི་ཟླའི་གཟི་བྱིན་འབར།།
ཚེ་ཡི་གྲོགས་བཟང་དགུང་གི་སྐར་མར་བཀྲ།།
སྟེང་ཕྱོགས་ལྷ་ལ་འཚེ་ཡི་འཇིགས་པས་འབེན།།
སྨད་ཕྱོགས་ཀླུ་ལ་རིན་ཆེན་ནོར་གྱིས་ཕྱུག །
རྨིག་བཞི་སྒོ་ཟོག་གཡང་གི་འཕེལ་ཁ་དར།།
འགྲོ་མི་གང་ཟག་མི་ཡི་ལོངས་སྤྱོད་འཕེལ།།
དགུང་གི་ནམ་མཁའི་བང་རིམ་བཅོ་བརྒྱད་ནས།།
འཛུམ་པའི་གཡུ་འབྲུག་འཁྱུག་ཅིང་ངར་སྒྲ་སྒྲོག །
འཇིག་རྟེན་འཚེ་བའི་ནད་རིགས་ཇི་སྙེད་པ།།
མ་ལུས་རང་སར་གྲོལ་ཤོག་བཀྲ་ཤིས་འཕེལ།།
སྐྱིད་པའི་ཉི་གཞོན་གངས་རིའི་སྤོ་ལ་འཕྲོས།།
དགའ་བའི་གླུ་ཆུང་གངས་ཅན་བོད་ལ་ཁྱབ།།
མཛེས་པའི་སེམས་པར་འཕྱོར་སྒེག་རྒྱན་གྱིས་སྤྲོས།།
སྤྲོ་བའི་མི་དག་ཚེ་བསོད་རླུང་རྟ་དར།།
རྒན་པ་རྣམས་ལ་ནད་མེད་ཚེ་རིང་ཤོག །
གཞོན་པ་རྣམས་ལ་ཤེས་དཔལ་གཤོག་རྩལ་རྒྱས།།
བཙུན་པ་རྣམས་ལ་དམ་ཆོས་དངོས་གྲུབ་ཐོབ།།
ཁྱིམ་པ་རྣམས་ལ་འབྱོར་བའི་དཔལ་འཕེལ་ཤོག །
༼ ཉག་ཕྲན། ༽