སྤྱི་ཟླ2པའི་ཚེས22ཉིན། ལྕགས་ཟམ་ཁའི་རྒྱལ་རོང་རྒྱལ་མོ་རྔུལ་ཆུ་ཡོན་གནས་ཕུག་ཆུ་གློག་ས་ཚུགས་སུ་ཨར་ལས་མི་སྣས་ཆུ་འདྲེན་ཕུག་ལམ་དང་པོའི་ལྷག་ལུས་ཕུག་ལམ་རྐོ་བཞིན་ཡོད་ལ། འཕྲུལ་ཚན་དང་པོ་དང་གཉིས་པའི་སྒྲིག་སྦྱོར་ཚོད་སྒྲིག་ལས་ཀ་སྒྲུབ་བཞིན་པའི་སྒང་རེད། སི་ཁྲོན་ཧྭ་ནུས་ལྕགས་ཟམ་ཁའི་ཆུ་གློག་ཚད་ཡོད་སྤྱི་གཉེར་ཁང་གཞུང་ལས་ཁང་གི་ཀྲུའུ་རེན་གཞོན་པ་ལི་ཡན་གྱིས་ད་ཆ་ཁྱོན་ཡོངས་ནས་ལས་འགོ་དང་ཐོན་སྐྱེད་བསྐྱར་དུ་བཙུགས་ནས་ཨར་ལས་དུས་ཚོད་འཕྲོག་འཛིན་བྱེད་ཀྱིན་ཡོད། ད་ལོའི་སྤྱི་ཟླ10པར་འཕྲུལ་ཚན་ཚང་མ་ནས་གློག་འདོན་ཐུབ་པའི་དམིགས་འབེན་འགྲུབ་གང་ཐུང་བྱ་རྒྱུ་ཡིན་ཞེས་བཤད་པ་རེད།

སྤྱི་ཟླ2པའི་ཚེས19ཉིན། དཀར་མཛེས་ཁུལ་དཔལ་ཡུལ་རྫོང་དང་བོད་ལྗོངས་གོ་འཇོ་རྫོང་གི་འབྲེལ་མཚམས་ཀྱི་འབྲི་ཆུའི་སྟོད་རྒྱུད་དུ་འཕྲུལ་སྦྱོར་གློག་འདོན་བསྡོམས་འབོར་སྟོང་ཝ་ཁྲི224ཡིན་པའི་གཡས་པ་ཐང་ཆུ་གློག་ས་ཚུགས་ཀྱི་ལས་ཚན་ཨར་ལས་ལས་ཡུལ་དུ་ཚ་ཚ་འུར་འུར་གྱི་རྣམ་པས་ཁེངས་ཡོད། འཛུགས་སྐྲུན་པ་ཚོས་སྤྲོ་སེམས་ཆེན་པོས་འཛུགས་སྐྲུན་འཕེལ་རིམ་ཇེ་མགྱོགས་སུ་བཏང་ནས་ད་ལོར་འཕྲུལ་ཚན་ཁག་དང་པོ་ནས་གློག་འདོན་ཐུབ་པ་ཁག་ཐེག་བྱ་རྒྱུ་རེད།

དེ་དང་མཉམ་དུ་དཀར་མཛེས་ཁུལ་བརྒྱད་ཟིལ་རྫོང་དང་ལེང་ཧྲན་མུ་ལི་རྫོང་འབྲེལ་མཚམས་ཀྱི་ཉག་ཆུའི་འབབ་རྒྱུད་དུ་འཕྲུལ་སྦྱོར་གློག་འདོན་བསྡོམས་འབོར་སྟོང་ཝ་ཁྲི240ཡིན་པའི་སྨད་རྟིང་ལུང་ཆུ་གློག་ས་ཚུགས་ཀྱི་ལས་གཞི་ཨར་ལས་འཛུགས་ཡུལ་དུ་ཨར་ལས་ལས་མཚམས12ཀྱིས་ལས་འགོ་ཁྱོན་ཡོངས་ནས་བཙུགས་ཡོད་པ་རེད།

དཀར་མཛེས་ཁུལ་གྱི་བཟོ་ལས་ལས་ཚན་སྐྲུན་ཡུལ་ཀུན་ཏུ་ཚ་ཚ་འུར་འུར་གྱི་རྣམ་པ་མཐོང་ཐུབ། རང་ཁུལ་གྱིས་འགོ་འཛུགས་པ་ནི་མཇུག་འགྲན་ཡིན་པའི་འབད་འཐབ་རྣམ་འགྱུར་ཐོག་ནས། གཞི་ཁྱོན་ཡན་གྱི་བཟོ་ལས་འཕར་ཐང་བརྒྱ་ཆ5འཕར་བའི་དམིགས་འབེན་ལ་དམིགས་ཏེ། ལྟ་སྐུལ་ཁྲིད་སྟོན་བྱེད་ཤུགས་ཆེ་རུ་གཏོང་བ་དང་གཞི་ཁྱོན་འཕར་བར་སྐུལ་སྤེལ། ལྟ་ཞིབ་ཚད་ལེན་ལ་དོ་སྣང་བཅས་ཀྱི་བྱེད་ཐབས་ཁག་མཉམ་འཛིན་བྱས་ནས་བཟོ་ལས་དཔལ་འབྱོར་འཕེལ་རྒྱས་ཡོང་བའི་འགོ་ཡག་པོ་འཛུགས་ཐུབ་པ་ཤུགས་ཡོད་དགུ་བརྒྱབ་པ་རེད།

དཀར་མཛེས་ཁུལ་དཔལ་འབྱོར་དང་ཆ་འཕྲིན་ཅན་ཅུས་ཀྱི་ཅུས་ཀྲང་གཞོན་པ་ལུའོ་ཡུས་ཀྱིས་ང་ཚོས་ལྟ་སྐུལ་ཁྲིད་སྟོན་ཚོ་ཆུང་བཙུགས་ནས་ཁེ་ལས་ལ་དངོས་སུ་བསྐྱོད་དེ་ཁེ་ལས་ཀྱི་འགན་འཁུར་བ་དང་ཁ་བརྡ་གླེང་མོལ། ཁེ་ལས་ཀྱི་ལས་འགོ་དང་ཐོན་སྐྱེད་བསྐྱར་དུ་འཛུགས་ཚུལ། ཚོང་ཟོག་མངག་ཐོའི་གནས་ཚུལ་སོགས་ལ་རྒྱུས་ལོན་བྱས་པ་དང་ཆབས་ཅིག། ཁེ་ལས་ཀྱི་དཀའ་ངལ་གནད་དོན་ཐག་གཅོད་པ་གནད་བརྟོལ་སར་བྱས་ཏེ། ཁེ་ལས་ལ་གོ་སྐབས་དམ་འཛིན་དང་ཐོན་ཚད་ལོངས་ཐུབ་པ་སྐུལ་མ་སྣེ་ཁྲིད་བྱས་ནས་ཆུ་གཉིས་མདོ་ཆུ་གློག་ས་ཚུགས་དང་། རོང་ཏ་ལིས་ལས། ཉག་ཆུའི་གཏེར་ལས་སོགས་གཞི་ཁྱོན་ཡན་གྱི་ཁེ་ལས་ཀྱིས་ཐོན་ནུས་ཚད་ཆེ་ཤོས་འདོན་ཐུབ་པ་ཁག་ཐེག་བྱ་དགོས་ཞེས་བཤད་པ་རེད།

ལྟ་སྐུལ་དང་སྣེ་ཁྲིད་ལག་ལེན་བསྟར་ནས་སྤྱི་ཟླ2པའི་ཚེས18ཉིན་གྱི་བར། དཀར་མཛེས་ཁུལ་གྱི་གཞི་ཁྱོན་ཡན་གྱི་བཟོ་ལས་ཁེ་ལས96ལས་ཁེ་ལས62ཀྱིས་ལས་འགོ་དང་ཐོན་སྐྱེད་བསྐྱར་དུ་བཙུགས་ནས་བརྒྱ་ཆ64.58ལ་ཟིན་ཡོད། སྤྱི་ཟླ3པའི་ཟླ་འགོར་ཁུལ་ཡོངས་ཀྱི་གཞི་ཁྱོན་ཡན་གྱི་ཁེ་ལས་ཚང་མས་ལས་འགོ་དང་ཐོན་སྐྱེད་བསྐྱར་དུ་འཛུགས་ཐུབ་རེ་ཡོད་པ་རེད།

ཧྭ་ནུས་ལྕགས་ཟམ་ཁའི་ཡོན་གནས་ཕུག་ཆུ་གློག་ས་ཚུགས་ཀྱིས2024ལོར་འཕྲུལ་ཚན་ལྔ་པ་ནས་གློག་ཐོག་མར་བཏོན་རྗེས་འཕྲུལ་ཚན་གསུམ་པ་དང་བཞི་པས་ཀྱང་སྔར་ཕྱིར་གློག་བཏོན་ཡོད། སྤྱི་ཟླ2པའི་ཚེས17བར་ཆུ་གློག་ས་ཚུགས་ཀྱིས་རིམ་རྩིས་བྱས་ནས་གློག་སྟོང་ཝ་དུང་ཕྱུར2.4བཏོན་ནས་ཐོན་སྐྱེད་རིན་ཐང་སྒོར་དུང་ཕྱུར0.7ཡས་མས་བྱུང་ཡོད་པ་རེད།

ལུའོ་ཡུས་ཀྱིས་ཁེ་ལས་ཀྱི་འཕེལ་ཕྱོགས་བཟང་པོར་ཕྱོགས་ནས། ཁེ་ལས་གོང་འཕེལ་ཆེན་པོ་འགྲོ་བའི་ཆེད་དུ་ང་ཚོས་དུས་ཐོག་སྲིད་ཇུས་བཏོན་ནས་ཁེ་ལས་གཞི་ཁྱོན་ཡན་དུ་འཕར་ཐུབ་པར་བསྐུལ་ཡོད་ཅེས་བཤད། དཀར་མཛེས་ཁུལ་དང་ལྕགས་ཟམ་རྫོང་དཔལ་འབྱོར་དང་ཆ་འཕྲིན་གྱི་སྡེ་ཁག་གིས་མཉམ་སྐུལ་གྱི་སྒོ་ནས་དུས་བསྟུན་ཡོན་གནས་ཕུག་ཆུ་གློག་ས་ཚུགས་ཀྱི་ཐོན་སྐྱེད་གཉེར་སྐྱོང་གནས་ཚུལ་ལ་རྗེས་འདེད་བྱས་ཏེ། ཁེ་ལས་ཀྱི་ཐོན་སྐྱེད་གཉེར་སྐྱོང་ཁྲོད་འཕྲད་པའི་དཀའ་ངལ་གནད་དོན་ལ་མཐུན་སྦྱོར་ཐག་གཅོད་བྱེད་ཤུགས་ཆེ་རུ་བཏང་བ་དང་། སྔོན་ལ་གཞི་ཁྱོན་ཡན་ལ་འཕར་བའི་རེ་ཞུའི་འབྲེལ་ཡོད་ཡིག་ཆ་ཁེ་ལས་ལ་སྤྲད་པར་མ་ཟད། བསྡོམས་རྩིས་དང་ཁྲལ་དོན་སོགས་སྡེ་ཁག་དང་འབྲེལ་མཐུད་བྱས་ནས་གེགས་མེད་འགྲོ་ལམ་བཟོས་ཏེ་ཁེ་ལས་གཞི་ཁྱོན་ཡན་ལ་འཕར་བའི་འབྲེལ་ཡོད་ཡིག་ཆ་སྔོན་ལ་ཞིབ་དཔྱད་བྱས་ནས་སི་ཁྲོན་ཧྭ་ནུས་ལྕགས་ཟམ་ཁའི་ཆུ་གློག་ཚད་ཡོད་སྤྱི་གཉེར་ཁང་གཞི་ཁྱོན་ཡན་ལ་འཕར་ཐུབ་པ་ཤུགས་ཆེན་པོས་བསྐུལ་བ་རེད།

དེ་དང་མཉམ་དུ་ལྟ་ཞིབ་ཚད་ལེན་ལ་མཐོང་ཆེན་བྱས་ནས་འཕར་སྣོན་ཡོང་བར་བསྐུལ་ཡོད། ད་ལོ་ནས་བཟུང་། དཀར་མཛེས་ཁུལ་གྱིས་གཙོ་ཁྲིད་ཁེ་ལས་དང་སྣེ་ཁྲིད་ཁེ་ལས་ལ་ལྟ་ཞིབ་ཚད་ལེན་ཉེན་སྟོན་བྱེད་ཤུགས་ཆེ་རུ་གཏོང་བ་དང་། མུ་མཐུད་དེ་གཞི་ཁྱོན་ཡན་གྱི་ཁེ་ལས30ལ་ཁྲིད་སྟོན་ཞབས་ཞུ་ཡག་པོ་བསྒྲུབས་ཤིང་། ཚུལ་མིན་གནས་ཚུལ་ཅུང་ཆེན་པོ་བྱུང་བའི་ཁེ་ལས་ལ་རྒྱུ་མཚན་གནད་སྨིན་འཚོལ་བ་དང་བྱེད་ཐབས་ཞིབ་འཇུག། རོགས་སྐྱོར་གནད་ལ་འཁེལ་བ་བྱས་ཏེ། ཁེ་ལས་ཀྱི་ཐོན་སྐྱེད་བརྟན་པོ་དང་འཕར་སྣོན། ཐོན་ཚད་ལོངས་པ་རོགས་དན་བྱས་ཡོད། ཁུལ་ཡོངས་ཀྱི་གློག་ཤུགས་ཁེ་ལས་་ཞིང་ཆེན་ནང་ཁུལ་གྱི་དུས་ཡུན་འབྲིང་རིང་གི་ཁྲོམ་ར་དང་ལག་ཡོད་ཚོང་ཟོག་ཁྲོམ་རའི་ཉོ་ཚོང་སོགས་སུ་ཧུར་ཐག་ཞུགས་པ་བསྐུལ་ནས། དམིགས་ཚད་མི་འདང་བ་ཁ་གསབ་དང་། བཅད་ངོས་ནང་གི་དམིགས་ཚད་བཟུང་ཚད་མཐོར་འདེགས་པ། ཤུགས་ཡོད་དགུས་གློག་བཏོན་ཏེ་དུས་ཚིགས་དང་པོར་དྲྭ་ཞུགས་གློག་ཚད་སྟོང་ཝ་དུང་ཕྱུར80ཡན་མངོན་འགྱུར་ཐུབ་པ་ཁག་ཐེག་བྱ་རྒྱུ་རེད།

བསྡོམས་རྩིས་ལས་མངོན་པ་ལྟར་ན། ད་ལོའི་སྤྱི་ཟླ2པར་དཀར་མཛེས་ཁུལ་གྱི་གཞི་ཁྱོན་ཡན་གྱི་ཁེ་ལས་ཀྱི་ཐོན་སྐྱེད་རིན་ཐང་སྒོར་དུང་ཕྱུར17.07བྱུང་ཞིང་ན་ལོའི་དུས་མཉམ་ལས་བརྒྱ་ཆ7འཕར་ཡོད། གཞི་ཁྱོན་ཡན་གྱི་ཁེ་ལས་སྔ་རྗེས་སུ་ཐོན་སྐྱེད་བསྐྱར་དུ་འཛུགས་པ་དང་ཧྭ་ནུས་ལྕགས་ཟམ་ཁའི་ཡོན་གནས་ཕུག་ཆུ་གློག་ས་ཚུགས་གཞི་ཁྱོན་ཡན་གྱི་ཁེ་ལས་ཀྱི་གྲས་སུ་ཚུད་པ་དང་བསྟུན་ནས། སྔོན་དཔག་བྱས་ན་ད་ལོའི་ཟླ་བ2པ་དང3པར་གཞི་ཁྱོན་ཡན་གྱི་བཟོ་ལས་ཟླ་བ་དང་པོར་འཕར་སྣོན་བྱུངབའི་རྨང་གཞིའི་ཐོག་མུ་མཐུད་དེ་ཡར་འཕེལ་ཡོང་བའི་གནས་བབ་སྲུང་འཛིན་ཐུབ་པ་རེད།

དཀར་མཛེས་ཁུལ་དཔལ་འབྱོར་དང་ཆ་འཕྲིན་ཅན་ཅུས་ཀྱི་ཅུས་ཀྲང་ཁྲ་ཕེང་གིས་བཟོ་ལས་དར་ན་དཔལ་འབྱོར་དར་ཞེས་པ་ལྟར། ང་ཚོས་དམིགས་འབེན་ལ་དམ་དུ་དམིགས་པ་དང་། ཐོན་ལས་ཀྱི་ཁྱད་ཡོན་ལ་གཞི་ཚུགས་པ། ལས་ཚན་གྱི་འདེགས་སྐྱོར་དོན་ཐོག་འཁྱོལ་བ། ཞབས་ཞུ་འགན་སྲུང་བྱེད་ཤུགས་ཆེ་རུ་བཏང་སྟེ། བཟོ་ལས་དཔལ་འབྱོར་གྱི་འགོ་ཡག་པོ་ཞིག་བཙུགས་ཏེ་ལོ་ཡོངས་ལ་གྲུབ་འབྲས་བཟང་པོ་འཐོབ་པར་འབད་བརྩོན་བྱ་རྒྱུ་ཡིན་ཞེས་བཤད་པ་རེད།།

（ སྐལ་ཐུབ་ཀྱིས་བསྒྱུར།）