（ པར་ངོས་དང་པོར་མཐུད།）མཉམ་འབྲེལ་ཚོད་འཛིན་བྱེད་ཐབས་དོན་ལ་འཁྱོལ་བར་བྱས་ནས་ཁྲིམས་འགལ་དང་སྒྲིག་འགལ་གྱི་བྱ་སྤྱོད་སྣ་ཚོགས་ལ་རྡུང་རྡེག་ནན་པོ་བཏང་སྟེ། ཐོག་མཐའ་བར་གསུམ་དུ་སྤྱི་ཚོགས་དོ་དམ་ཚོད་འཛིན་ནུས་ལྡན་ངང་རྒྱུན་འཁྱོངས་ནས་ཁུལ་ཡོངས་ཀྱི་ཞི་མཐུན་དང་བརྟན་བརླིང་སྲུང་སྐྱོང་ཏན་ཏིག་བྱ་དགོས་པ་བསྟན།
ཧྲེན་དབྱང་གིས་འབའ་ཐང་རྫོང་སོ་བ་ལུང་ཡུལ་ཤོག་ཐུབ་བསྟན་ཉི་ཤར་གླིང་དགོན་པ་དང་ཕྱག་ཕྲེང་རྫོང་རྭ་རྟགས་གྲོང་རྡལ་མདོ་ཁམས་བཤད་སྒྲུབ་དགའ་ལྡན་ཆོས་འཕེལ་གླིང་དུ་དགོན་པའི་མེ་གསོད་ས་ཚུགས་ཆུང་གྲས་དང་དགེ་འདུན་ཞབས་ཞུའི་ལྟེ་གནས། དགོན་པའི་བཅའ་སྡོད་མངགས་གཏོང་ཁང་སོགས་ལ་ཡུལ་དངོས་ནས་གཟིགས་ཞིབ་གནང་། དགོན་པའི་དགེ་འདུན་པ་དང་དགོན་པའི་དོ་དམ་ཨུ་ལྷན་གྱི་ལས་བྱེད་པ་དང་གླེང་མོལ་གནང་བཞིན་དགོན་པ་ཁྲིམས་ལྟར་དོ་དམ་བྱེད་པ་སོགས་ཀྱི་གནས་ཚུལ་ཤེས་རྟོགས་ཞིབ་ཕྲ་གནང་།
ཁོང་གིས་རྒྱ་ཆེའི་ཆོས་ལུགས་ལས་རིགས་མི་སྣས་རྒྱལ་གཅེས་ཆོས་གཅེས་དང་སྡོམ་སྲུང་ཁྲིམས་སྲུང་གི་སྲོལ་རྒྱུན་བཟང་པོ་དར་སྤེལ་གཏང་རྒྱུ་མཐའ་འཁྱོངས་བ་དང་རང་རྒྱལ་གྱི་ཆོས་ལུགས་ཀྲུང་གོ་ཅན་གྱི་ཁ་ཕྱོགས་མཐའ་འཁྱོངས་ནས་ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་ལ་འཕྲོད་པར་ཁྲིད་སྟོན་ཧུར་ཐག་བྱ་དགོས་པའི་རེ་བ་བཏོན།
སྡེ་རོང་རྫོང་ཝ་ཁ་གྲོང་རྡལ་ཝ་ཁ་གྲོང་ཚོ་དང་འབའ་ཐང་རྫོང་རྩ་གྲོང་རྡལ་སྲིད་གཞུང་། ཕྱག་ཕྲེང་རྫོང་བདེ་མོ་ཡུལ་ཤོག་སྲིད་གཞུང་། ཤམ་བྷ་ལ་གྲོང་རྡལ་བཅས་སུ་ཧྲེན་དབྱང་གིས་ཡུལ་ཤོག་དང་གྲོང་རྡལ་སྲིད་གཞུང་གི་དམངས་བདེ་ཞབས་ཞུའི་སྒེའུ་ཁུང་དང་། གྲོང་ཚོའི་ཏང་དམངས་ཞབས་ཞུ་ལྟེ་གནས། གསར་བརྗེ་སློབ་གསོ་རྟེན་གཞིའི་ནུས་པ་འདོན་སྤེལ་བྱས་ཚུལ་བཅས་ལ་ཡུལ་དངོས་ནས་གཟིགས་ཞིབ་གནང་བ་དང་། གཞི་རིམ་ཏང་རྩ་འཛུགས་ཀྱི་ཧྲུའུ་ཅི་དང་ཏང་དོན་ལས་བྱེད་པ་དང་མཉམ་དུ་ཏང་འཛུགས་སྐྱོང་གིས་སྤྱི་ཚོགས་བཅོས་སྐྱོང་ལ་སྣེ་ཁྲིད་བྱེད་པའི་ཐབས་ལམ་གསར་པར་གྲོས་བསྡུར་བྱས་པ་རེད།
ཧྲེན་དབྱང་གིས་ཁུལ་ཡོངས་ཀྱི་ཏང་རྩ་འཛུགས་རིམ་པ་ཁག་གིས་ཏང་འཛུགས་ཀྱིས་གཞི་རིམ་བཅོས་སྐྱོང་ལས་དོན་ལ་སྣེ་ཁྲིད་བྱེད་པའི་ལས་འགན་འདུ་ཤེས་དང་འགན་འཁྲི་འདུ་ཤེས་ཆེ་རུ་གཏང་དགོས་པ་དང་། ཏང་རྩ་འཛུགས་ཚད་ལྡན་ཅན་དང་ཚད་གཞི་ཅན་དུ་འགྱུར་བའི་འཛུགས་སྐྲུན་མཐར་ཕྱིན་བྱ་དགོས། གཞི་རིམ་ཏང་རྩ་འཛུགས་ཀྱི་འཐབ་འཛིང་མཁར་རྫོང་གི་ནུས་པ་དང་ཏང་མིའི་གདོང་ལེན་དཔེ་བཟང་གི་ནུས་པ་འདོན་སྤེལ་གང་ལེགས་བྱས་ཏེ། གཞི་རིམ་ལས་དོན་རྒྱུན་འཁྱོངས་དང་ཞིབ་ཕྲ། མཐར་ཕྱིན་བཅས་བྱས་ནས་གཞི་རིམ་བཅོས་སྐྱོང་གི་མཐའ་སྣེ་སྔར་བས་སྣུར་སྲིང་དང་གཞི་རིམ་བཅོས་སྐྱོང་གི་འགོག་སྲུང་འཛིང་རགས་བརྟན་དུ་གཏང་བ། གཞི་རིམ་བཅོས་སྐྱོང་གི་ཕན་ནུས་ཆེ་རུ་གཏང་བ། གཞི་རིམ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བར་སྐུལ་འདེད་ཏན་ཏིག་གཏང་དགོས་པ་བསྟན།
ཕྱག་ཕྲེང་རྫོང་ཤམ་བྷ་ལ་གྲོང་རྡལ་དུ་ཧྲེན་དབྱང་གིས་མི་རིགས་མཐུན་སྒྲིལ་ཁྱིམ་ཚང་དུ་སྤེལ་བའི་ལས་དོན་བཞུགས་མོལ་ཚོགས་འདུ་གཙོ་སྐྱོང་གནང་། ཕྱག་ཕྲེང་རྫོང་གི་ལས་དོན་གནས་ཚུལ་སྙན་སེང་ལ་གསན་པ་དང་ལས་བྱེད་པ་དང་མཛའ་མཐུན་མང་ཚོགས་དང་མི་རིགས་མཐུན་སྒྲིལ་ཁྱིམ་ཚང་དུ་སྤེལ་བའི་ལག་ལེན་བྱ་སྤྱོད་སྤེལ་ཚུན་གྱི་བྱེད་སྟངས་དང་མྱོང་ཚོར་སྤེལ་རེས་གནང་བ་རེད། ཁོང་གིས་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་འདུ་ཤེས་བརྟན་པོར་འཆང་བ་ནི་དུས་རབས་གསར་པའི་ཏང་གི་མི་རིགས་ལས་དོན་གྱི་གཙོ་ཕྱོགས་ཡིན་ལ། མི་རིགས་ས་ཁུལ་གྱི་ལས་དོན་ཁག་གི་གཙོ་ཕྱོགས་ཀྱང་ཡིན། མི་རིགས་མཐུན་སྒྲིལ་ཁྱིམ་ཚང་དང་དགོན་པར་སྤེལ་བ་ནས་བཟུང་ཁུལ་ཡོངས་ཀྱི་ལས་བྱེད་ལས་བཟོ་པས་རིམ་པ་ཁག་དང་རྒྱ་ཆེའི་ཞིང་འབྲོག་མང་ཚོགས་དང་དགོན་པའི་དགེ་འདུན་པ་བཅས་དང་འབྲེལ་བ་དམ་ཟབ་བྱས་ཏེ་ཐུན་མོང་ཐོག་ཁྱིམ་ཚང་དང་རྒྱལ་ཁབ་ཀྱི་བརྩེ་དུང་ཟབ་ཏུ་གཏོང་བ་དང་། ཁྱིམ་ཚང་གི་སྤྱོད་བཟང་དར་སྤེལ་གཏོང་བ། ནང་སྐྱེས་སྒུལ་ཤུགས་སྐུལ་སྤེལ་བཅས་བྱས་པས་མི་རིགས་ཁག་མཐུན་སྒྲིལ་ཡར་ཐོན་དང་། བདེ་སྐྱིད་འཚོ་བ་སྐྱེལ་བ། མཛེས་སྡུག་ལྡན་པའི་ཁྱིམ་གཞིས་མཉམ་དུ་འཛུགས་སྐྲུན་བཅས་ཀྱི་འཆམ་མཐུན་རྣམ་པ་གང་སར་མཐོང་ཐུབ། ཁུལ་ཡོངས་ཀྱི་རིམ་པ་ཁག་དང་སྡེ་ཁག་ཁག་གིས་མཛའ་བརྩེ་སེམས་སྟོན་ཟབ་ཏུ་གཏོང་བ་དང་། གཙོ་གནད་ཚོགས་སྤྱི་འབུར་དུ་ཐོན་པ། ལས་ཀ་བྱེད་སྟངས་གསར་གཏོད། ཕན་འབྲས་ཀྱི་ཁྲིད་སྟོན་ལ་དམིགས་པ། སེམས་ཤུགས་དང་བརྩེ་སེམས་ལ་བརྟེན་ནས་མཛའ་བརྩེ་སྤེལ་བ་བཅས་བྱས་ཏེ་བཀའ་བཟང་གསོས་སུ་སྨིན་པ་དང་མི་སེམས་གོང་བུ་གཅིག་འགྲིལ་དངོས་སུ་བྱ་དགོས། རྒྱ་ཆེའི་ལས་བྱེད་པ་དང་མང་ཚོགས་ཧུར་ཐག་ཞུགས་རྒྱུར་རྒྱ་ཁྱབ་ངང་སྐུལ་སློང་བྱས་ཏེ། “སེ་འབྲུ་ལས་སྒྲུབ་ཁང”སོགས་ལས་སྟེགས་ཀྱི་ནུས་པ་ནུས་ལྡན་ངང་འདོན་སྤེལ་བྱས་པ། བྱེད་སྒོའི་གཞི་རྟེན་སྔར་བས་ཕུན་སུམ་ཚོགས་སུ་གཏོང་བ་དང་། མཛའ་མཐུན་ཁྱིམ་ཚང་གི་ཁོངས་མི་མི་རིགས་མཐུན་སྒྲིལ་གྱི་བརྩི་བཀུར་བྱེད་མཁན་དང་། ལག་ལེན་བྱེད་མཁན། ཁྱབ་སྤེལ་བྱེད་མཁན་བཅས་ཡག་པོ་བྱེད་པར་ཁྲིད་སྟོན་བྱས་ཏེ། མི་རིགས་ཁག་གི་ལས་བྱེད་པ་དང་མང་ཚོགས་དབར་འགྲོ་འོང་སྤེལ་རེས་དང་མཉམ་འདྲེས་བྱེད་པར་སྐུལ་འདེད་བཏང་སྟེ་ཀྲུང་ཧྭ་མི་རིགས་ཀྱི་ཐུན་མོང་བསམ་པའི་ཁྱིམ་གཞིས་རྒྱུན་ཆད་མེད་པར་བསྐྲུན་དགོས།
བརྟག་ཞིབ་རིང་། ཧྲེན་དབྱང་གིས་ད་དུང་ཁམས་ལྷོ་མི་རིགས་མཐོ་རིམ་སློབ་འབྲིང་དང་། འབའ་ཐང་རྫོང་མི་དམངས་སྨན་ཁང་དུ“ཚོགས་པ་རྣམ་པའི”སློབ་གསོ་དང་། སྨན་བཅོས་རོགས་སྐྱོར་ཤེས་ལྡན་མི་སྣ་དང་། ཀྲེ་ཅང་དང་ཞིང་ཆེན་ནང་ཁུལ་གྱི་ཁ་གཏད་རོགས་སྐྱོར་ལས་བྱེད་པ་ཤེས་ལྡན་མི་སྣར་འཚམས་འདྲི་གནང་བ་རེད། འབའ་ཐང་རྫོང་བྱ་ཁྱུང་གྲོང་རྡལ་དུ་འབྲོག་ཁུལ་ནས་གྲོང་ཁྱེར་དུ་སློབ་སྦྱོང་བྱེད་པར་ཡོང་བའི་སློབ་གྲོགས་ཉི་མ་ལྷ་མོ་དང་དེའི་ནང་མི་རྣམས་ལ་འཚམས་འདྲི་གནང་བ་རེད།
ཁུལ་གྱི་མགོ་ཁྲིད་ཁྲེང་ལུའུ་དང་། ཁྲེན་པོ་ཐའོ། ཙེང་ཀོན་ཧོ། ཧོ་ཞའོ་ཕིང་། ཚེ་རིང་དབང་མོ། འབའ་ཐང་རྫོང་དང་སྡེ་རོང་རྫོང་། ཕྱག་ཕྲེང་རྫོང་བཅས་ཀྱི་འགན་འཁུར་བློ་མཐུན་གཙོ་བོ་འབྲེལ་ཡོད་བརྟག་ཞིབ་ནང་ཞུགས་པ་རེད།།（ ཨོ་རྒྱན་དང་རྟ་མགྲིན་གྱིས་བསྒྱུར།།）