གནམ་ལོ་གསར་པ་ཚེས་ནས་ནང་མི་རྣམས་དགའ་དགའ་སྤྲོ་སྤྲོ་ཡི་དུས་ལ་རོལ་ནས་ཚང་མ་བཀྲ་ཤིས་བདེ་ལེགས་ཀྱི་ངང་ནས་མཇུག་གྲུབ། འདི་ལྟར་བལྟས་ན་ཡོད་ཚད་ཀྱི་རྩ་བ་ནི་བདེ་ཐང་གི་ལུས་ཕུང་ཞིག་ཡོད་ན་དོན་དག་གང་འགྲུབ་དགོས་ན་དཀའ་ངལ་མེད་ཅིང་། དེས་ན་བདེ་ཐང་གི་ལུས་ཕུང་དང་བདེ་ཐང་དང་སེམས་ཁམས་ཤིག་ངེས་པར་དུ་ཡོད་དགོས། ལོ་འདིར་མུ་མཐུད་དེ་མདུན་སྐྱོད་ཀྱི་གོམ་མཚམས་མི་འཇོག་པར་མདུན་ནས་མདུན་དུ་བསྐྱོད་དགོས། སེམས་པ་སྤྲོ་སྣང་དང་བཅས་པའི་ངང་ནས་སྐྱོད་དང་སྤྲོ་སྣང་ནི་ལེགས་འགྲུབ་ཀྱི་རྩ་བ་ཡིན། རང་ཉིད་རང་གི་མགོན་བྱས་ཏེ་ཉིན་རེ་ནས་ཉིན་རེ་ལེགས་པའི་ཕྱོགས་སུ་སྐྱོད། རེ་བ་ཡིད་ཆེས་ཀྱི་ངང་ནས་ལོ་འདིར་དཔེ་ཀློག་དང་ཁ་མི་འབྲལ་བའི་དམ་བཅའ་སེམས་སུ་བཞག། སྔོན་བྱོན་དམ་པའི་གསུང་རབ་ཀྱི་ཁྲོད་དུ་མ་རིག་མུན་པ་སེལ་བའི་སྒྲོན་མེ་ཡོད། ང་ཚོས་སྙིང་སྟོབས་ཆེན་པོའི་གོ་ཆ་ལུས་ལ་གྱོན་ནས་མ་རིག་སེལ་བའི་སྒྲོན་མེ་ལག་ཏུ་བླང་དགོས། དམ་པའི་གསུང་རབ་ཀྱི་ཡང་སྙིང་ནི་དྲང་བདེན་དང་གནས་ལུགས་གཙིགས་སུ་བཟུང་ནས་བདེན་པ་བདེན་དྲང་ངང་བསྐྱོད་རྒྱུ་དེ་ཡིན། འུར་འུར་ཟིང་ཟིང་ཁྲ་ཁྲ་ཤིག་ཤིག་གི་དུས་སྐབས་སུ། འཇིག་རྟེན་མུན་ནག་གིས་བཀང་ཡང་རང་ཉིད་མུན་སེལ་གྱི་སྒྲོན་མེ་ཞིག་ཏུ་འགྱུར་བར་ཡིད་ཆེས་བྱ་དགོས། ཁྱོད་རང་མུན་སེལ་གྱི་སྒྲོན་མེ་ཞིག་ཏུ་འགྱུར་འདོད་ན་རེ་བའི་སྟ་གོན་དང་སེམས་ཀྱི་གྲ་སྒྲིག་སྔོན་ནས་བྱ་དགོས། འབྱུང་འགྱུར་ལོ་ཟླའི་དྲག་ཆར་ལ་གདོང་གཏད་པའི་སྙིང་སྟོབས་དང་ལམ་གྱི་ཁ་ཕྱོགས་མ་ནོར་བའི་ཆོད་སེམས་བརྟན་པོ་དགོས། ལོ་ཟླ་ནི་སེ་གོལ་རྡེབ་པ་ཙམ་གྱིས་ཡུན་ལ་ཧ་ཅང་གིས་བཞུད་སླ་བའི་ལག་ནང་བྱེ་མ་ཞིག་དང་མཚུངས་པས། ལོ་ཟླ་རེ་རེ་ནི་གསེར་དངུལ་ལས་ཀྱང་རིན་ཐང་ཆེ། ཁྱོད་ཀྱིས་གསེར་ལས་ལྷག་པའི་དུས་ཚོད་ཀྱི་འདུ་ཤེས་སེམས་ལ་དམ་པོར་བཅངས་ནས། རིན་ཐང་ཆེ་བའི་དུས་ཚོད་ལ་དམ་འཛིན་བྱས་ཏེ་མདུན་ནས་མདུན་དུ་སྐྱོད་དང་། རེ་བའི་ཉི་གཞོན་གྱིས་ཁྱོད་རང་བསྒུག་ནས་ཡོད། སང་ཉིན་ལ་རྫོགས་མཐའ་མེད་ཀྱང་དྲོ་འཇམ་ལྡན་པའི་སང་ཉིན་དེ་ཁྱོད་ཀྱི་མདུན་དུ་ངེས་པར་དུ་སླེབས་སྲིད། སྙིང་ཉེ་བའི་རང་ཉིད་ལགས། ཁྱོད་རང་མི་ཞིག་ཡིན་པའི་ཆ་ནས་རང་ཉིད་ཀྱི་ནུས་པ་སྔོག་འདོན་བྱ་དགོས། མི་ཡི་ནུས་པ་ནི་ཆེས་སྟོབས་དང་ལྡན་ཞིང་། རང་ཉིད་དབང་པོ་ཚང་བའི་མི་ཞིག་ཡིན་པ་ཤེས་པའི་སྟེང་ནས་སྒྱིད་ལུག་དང་ལེ་ལོ་ཡི་ངང་ནས་ཉལ་བའི་དུས་ཚོད་མ་ཡིན། རང་ཉིད་བྱ་བར་དུས་རྟག་ཏུ་འབད་བརྩོན་བྱས་པའི་མི་ལ་གནམ་མགོན་མས་ཀྱང་མགོན་སྐྱབས་བྱེད་སྲིད། དེ་བས་ཡི་མ་ཆད་སྤོབས་པ་མ་ཞུམས་དང་། དུས་ཚོད་ཀྱིས་ཡོད་ཚད་བདེན་པའི་ལམ་དུ་བསྒྱུར་སྲིད།

༼ རི་སྤྱང་། ༽