ཉེ་ཆར། རང་ཁུལ་དུ་ཁ་བ་ཆེན་པོ་བབས་པས་ཁུལ་གནམ་གཤིས་སྡེ་ཚན་གྱིས་སྔ་རྗེས་སུ་ཉེན་བརྡའི་འཕྲིན་བརྡ་བསྒྲགས་ཡོད། འགྲིམ་འགྲུལ་ཉེན་མེད་ཡོང་བར་འགན་ལེན་བྱ་ཆེད། རང་ཁུལ་གྱི་རྫོང（གྲོང་ཁྱེར）ཁག་གིས་ཁ་བ་གཙང་སེལ་བྱས་ནས་རླངས་འཁོར་ཤར་གཏོང་འགན་ལེན་འཚུབ་བསྟུན་སྔོན་ཇུས་མགྱོགས་མྱུར་ངང་ལག་ལེན་བསྟར་བ་དང་། མི་སྣ་དང་འཕྲུལ་ཆས་བསྡུས་ནས་ཁ་བ་གཙང་སེལ་དང་བགྲོད་ལམ་དུ་རླངས་འཁོར་ཤར་གཏོང་ལས་དོན་སྤེལ་ནས་མང་ཚོགས་ཉེན་མེད་ཡོང་བར་ཤུགས་ཡོད་དགུས་སྲུང་སྐྱོབ་བྱས།

སྤྱི་ཟླ3པའི་ཚེས19ཉིན། ཁ་ཆེན་བབས་ནས་དར་མདོ་གྲོང་ཁུལ་གྱི་ཁང་བརྩེགས་མཐོན་པོ་ནས་འཁྱགས་རལ་དཔྱངས་ནས་རིང་ཤོས་ལ་སྨི1.5ཙམ་ཡོད་པ་རེད། ཉེན་ཁའི་གནས་ཚུལ་ཤེས་རྗེས། དར་མདོ་གྲོང་ཁྱེར་གྱིས་འཕྲལ་མར་མེ་གསོད་དཔོན་དམག་བསྡུས་ཏེ“བར་སྣང་ནས་གཅག་གཏོར་དང་ས་ངོས་ནས་འགོག་སྲུང”གི་ལངས་གཟུགས་ལས་སྒྲུབ་བྱེད་སྟངས་སྤྱད་པར་མ་ཟད། གྲོང་ཁྱེར་དོ་དམ་འདེགས་འཁོར་གྱི་གཞོགས་འདེགས་འོག་ཉེན་ཁ་ཆེ་བའི་འཁྱགས་རལ་གཙང་སེལ་བྱས།

ཉེ་ཆར། འབའ་ཐང་རྫོང་གི་ས་ཆ་མང་པོར་ཁ་བ་བབས་པ་དང་། རྒྱལ་ལམ318མཚོ་ལའི་ལམ་དུམ་ཁག་གཅིག་ཏུ་ཁ་བའི་མཐུག་ཚད་ལི་སྨི20ལས་བརྒལ་ནས་འགྲིམ་འགྲུལ་ཉེན་མེད་ལ་ཤུགས་རྐྱེན་ཚབས་ཆེན་ཐེབས་པས་འབའ་ཐང་རྫོང་གཞུང་ལམ་ཡན་ལག་ཅུས་ཀྱིས་འཕྲལ་མར་འཕྲུལ་འཁོར་སྒྲིག་ཆས་དང་འཚུབ་བསྟུན་དངོས་ཟོག་བཀོད་སྒྲིག། འཕྲུལ་འཁོར་ཞིག་གསོ་ཚོ་ཆུང་གི་མི་སྣ་དང་ས་ཚུགས་ཚོ་ཆུང་གི་མི་སྣ་བསྡུས་ནས་ལམ་དཀྱོག་དང་གཟར་ངོས་སོགས་དར་ཆགས་སླ་བའི་ལམ་ངོས་ལ་ཁ་བ་གཙང་སེལ་བྱེད་པའི་ལས་དོན་སྤེལ་ནས་འགྲུམ་འགྲིལ་ཉེན་མེད་ཡོང་བར་འགན་ལེན་བྱས། ད་སྔའི་བར་འབའ་ཐང་རྫོང་གིས་འཚུབ་བསྟུན་ཉེན་སྐྱོབ་དཔུང་ཁག་གི་མི22བསྡུས་པ་དང་སྐོར་ཞིབ་རླངས་འཁོར་དང་ཁངས་སེལ་རླངས་འཁོར་སོགས20མངགས། ཁ་བ་ཆེ་བ་དང་དར་ཆགས་ཡོད་པའི་ལམ་སྤྱི་ལེ120ལྷག་གཙང་སེལ་བྱས་པ་དང་ཁངས་ཞུ་རྫས་སྦྱོར་ཏུན8དང་འདྲེད་འགོག་བྱེ་མ་སྨི་ལྷམ་པ60བཀྲམས། འགྱངས་ལུས་ཐེབས་པའི་རླངས་འཁོར60ལྷག་ལ་རོགས་སྐྱོབ་དང་འདྲེད་འགོག་ལྕགས་ཐག་སྒྲིག་སྦྱོར་བྱས།

ཉེ་ཆར། ཁ་བ་མུ་མཐུད་དེ་བབས་པས་ལི་ཐང་རྫོང་གིས་འཕྲལ་མར་འགྲོ་ལམ་ཉེན་མེད་ཀྱི་འཚུབ་བསྟུན་སྔོན་ཇུས་ལག་ལེན་བསྟར་ནས་དུས་ཚོད24རིང་གནད་འགག་ཆེ་བའི་ལམ་དུམ་ཐུན་སྲུང་བྱས་ནས་འགྲོ་འོང་གི་རླངས་འཁོར་ལ་ཉེན་མེད་དྲན་སྐུལ་དང་ཁ་ལོ་བར་འདྲེད་འགོག་ལྕགས་ཐག་སྒྲིག་སྦྱོར་སོགས་བྱས་ནས་ཉེན་ཁ་དང་མངོན་མེད་རྐྱེན་ངན་བསལ། ད་སྔར་ལི་ཐང་རྫོང་གིས་བསྡོམས་པས་འཚུབ་བསྟུན་གཟན་རྩྭ་ཏུན550དང་གྲོ་ཕྱེ་ཏུན20གསོག་འཇོག་བྱས་ཡོད་ཅིང་། གནོད་འགོག་འཚུབ་བསྟུན་མ་དངུལ་སྒོར་ཁྲི50བཀོལ། ད་དུང་གཟན་རྩྭ་ཏུན260ཉོ་སྒྲུབ་དང་སྐྱེལ་འདྲེན་བྱ་རྒྱུའི་འཆར་གཞི་ཡོད་པ་རེད། དེ་དང་ཆབས་ཅིག་ལི་ཐང་རྫོང་གི་གྲོང་སྡེ་བཅའ་སྡོད་ལས་དོན་རུ་ཁག140ཡིས་འཕྲད་འདྲི་ཁེར་བཤེར་དང་གྲང་འགོག་འཁྱགས་འགོག། དཀའ་ངལ་རོགས་སྐྱོར་སོགས་ཀྱི་ལས་དོན་སྤེལ་ཡོད།

སྤྱི་ཟླ3པའི་ཚེས18ཉིན། དྲོད་ཚད་དམའ་བའི་གནམ་གཤིས་ཀྱིས་ཤུགས་རྐྱེན་འོག་ཕྱག་ཕྲེང་རྫོང་ཁོངས་ལ་ཁ་བ་ཆེན་པོ་བབས་པ་དང་། རྒྱལ་ལམ227དོམ་མོ་ནང་ནས་ཁོག་རུ་ལ་བར་གྱི་ལམ་དུམ་ལ་ཆབ་རོམ་ཆགས་ཡོད་པས་འགྲིམ་འགྲུལ་ལ་ཤུགས་རྐྱེན་ཚབས་ཆེན་ཐེབས། ཕྱག་ཕྲེང་གཞུང་ལམ་ཡན་ལག་ཅུས་ཀྱིས“འཕྲུལ་ཆས་གཙོ་བོ་དང་མི་སྣས་གཞོགས་འདེགས་བྱེད་པའི”བྱ་ཐབས་སྤྱད་དེ་ཁྱོན་ལམ་ངོས་ཀྱི་ཁ་བ་ཧྥང3200ལྷག་བསལ་བ་དང་ཁངས་ཞུ་རྫས་སྦྱོར་ཏུན1.2བཀྲམས། འགྲོ་སྐྱོད་རླངས་འཁོར6ལ་རོགས་སྐྱོབ་བྱས་ཡོད།

ཉེ་ཆར་འདབ་པ་རྫོང་དུ་ཁ་བ་ཆེན་པོ་བབས། གནམ་གཤིས་ངན་པའི་མདུན་དུ་འདབ་པ་རྫོང་གི་སྡེ་ཚན་ཁག་གིས་མགྱོགས་མྱུར་ངང་བྱ་སྤྱོད་སྤེལ་ནས་མི་དམངས་མང་ཚོགས་ཀྱི་འགྲོ་སྐྱོད་ཉེན་མེད་ཡོང་བར་ཤུགས་ཡོད་དགུས་བསྲུངས་པ་རེད། འདབ་པ་རྫོང་གཞུང་ལམ་བདག་སྐྱོང་སྡེ་ཚན་གྱིས་བདག་སྐྱོང་བཟོ་པ80ལྷག་བསྡུས་ཏེ་ལམ་དུམ་ཁག་ཏུ་སོང་ནས་ཁ་བ་གཙང་སེལ་བྱས། ཚེས18ཉིན་གྱི་དགོང་མོའི་བར་འདབ་པ་རྫོང་གིས་ཁྱོན་འཚུབ་བསྟུན་རླངས་འཁོར21བཏང་བ་དང་འདྲེད་འགོག་བྱེ་མ་སྨི་ལྷམ་པ40བཏབ་པ། ཁངས་ཞུ་རྫས་སྦྱོར་ཏུན24བཀྲམས་པ་དང་འགྱངས་ལུས་ཐེབས་པའི་རླངས་འཁོར20ལ་རོགས་སྐྱོར་བྱས་ཡོད།།

（ རྟ་མགྲིན་རྡོ་རྗེས་བསྒྱུར།）