国内统一刊号:CN51-0018-Z 中共甘孜州委机关报·甘孜日报社出版凝聚正能量·传播好声音






མི་ཚེ་དང་ འཚོ་བ།

མི་ཚེ་མར་མེ་ཕྱེད་ཀ་མཐོང་བའི་

འཇིག་རྟེན་ནག་པོ། །

རེ་བའི་གཤོག་པ་ཕྱེད་ཀ་སྟོང་འདང་

དབྱིངས་སུ་འཕུར་ན། །

རང་གི་གཟུགས་ཕུང་ཕྱེད་ཀ་ས་ཆེན་འདི་

ནས་འཚོ་དུས། །

དབྱངས་འགྲོས་གཅིག་གིས་མཚོན་པའི་མི་ཚེ་

ལྷག་མ་འབྲི་ཡོང་། །

བགྲོད་ལམ་ཕྱེད་ཀ་ཞིག་ལ་རྡོག་པ་གཏད་

དགོས་བྱུང་བས། །

ཆ་ཚང་མེད་པའི་ལང་ཚོ་ཆ་མེད་ཡུལ་དུ་

འགྲིམས་སོང་། །

གོམ་པ་ཕྱེད་ཀ་དེ་གས་མི་ཚེའི་ཁ་ལོ་

བསྒྱུར་ཡོང་། །

སྐྱོ་བ་ཞེ་ལ་ཐོགས་པའི་འཁོར་བའི་

ནང་གི་མགྲོན་པོ། །

སེམས་པ་ཕྱེད་ཀ་རེ་ནི་སྨྲེང་བའི་གསེབ་ཏུ་

ལྷག་ཡོད། །

མིག་ཆུ་ཕྱེད་ཀ་ཞིག་ནི་གཙང་པོའི་ནང་

དུ་འདྲེས་སོང་།།

རང་ལ་བྲིས་པའི་ཆང་གཞས་ཆ་ཚང་ཡོང་

ས་མ་རེད། །

ལས་ཀྱིས་གནང་བའི་ཐོབ་སྐལ་ལ་ལེ་བདའ་

བྱེད་ས་མི་འདུག །

ཁེར་རྐྱང་སྡོང་ལོ་ཕྱེད་ཀ་སད་དང་སེར་གྱིས་

བཅོམ་སོང་། །

རྣམ་ཤེས་ཕྱེད་ཀ་ཞིག་ལ་བརྩེ་བའི་མེ་ཏོག་

བཏགས་དུས། །

དུང་སེམས་དཀར་ཡོལ་ཕྱེད་ཀ་གཙང་འགྲམ་

དེ་ནས་ལྷག་སོང་། །

བུ་གའི་ནང་གི་འཇིག་རྟེན་ཁྱོད་ལ་འོས་

འཚམས་ཡིན་ཟེར། །

རྨི་ལམ་ཕྱེད་ཀ་ཞིག་ལ་དགའ་སྐྱོ་གཉིས་

ཀྱིས་བསླད་ཡོད། །

འཚོ་བ་ཕྱེད་ཀ་རེ་ལ་སེམས་ཀྱི་རེ་ལྟོས་

བྱས་ཡོད། །

མཐོང་སྣང་ཕྱེད་ཀར་གྱུར་པའི་ང་ཡང་

ཆ་ཚང་མི་འདུག །

བྱ་སྤུ་རླུང་གིས་ཁྱེར་བཞིན་རྣམ་ཤེས་གང་

སར་སྤུར་སོང་། །

སེམས་ཀྱི་ཕྱེད་ཀ་རེ་ལ་དཀར་ནག་གཉིས་ཀྱིས་

གྲུབ་འདུག །

ལག་ཟུང་ཕྱེད་ཀའི་ཕྱག་རྒྱ་མཚོན་ཐབས་

གཞན་ཞིག་ཡོད་ན། །

དབྱངས་ཀྱི་དུམ་བུ་རེ་ལ་ཚིག་གིས་ལྷན་པོ་

བརྒྱབ་ནས། །

ཕྱེད་ཀ་ངག་ནས་བླངས་ཤིང་ཕྱེད་ཀ་སེམས་

སུ་སྦས་ཡོད། །

འཁོར་བར་བལྟས་ནས་ངུས་མེད་ངོ་གདོང་

གནག་ནས་བསྡད་ཡོད། །

འཁོར་བའི་གཞས་ཆུང་གྱེར་བཞིན་རང་སེམས་ཆང་

གིས་གསོས་ཡོད། །

མཚན་མོའི་སྐར་ཚོགས་བལྟས་ནས་དབུགས་རིང་

འགའ་རེ་བརྔུབས་ཡོད། །

དགའ་སྐྱོ་ཡིད་ལ་བཅངས་ནས་ཚོར་བའི་

བྲོ་གར་འཁྲབ་ཡོད། །

༼ རྗ་ཤུལ་བློ་བཟང་། ༽