འབའ་བ་སྐྱིད་པའི་ཐོག་ལ། དབྱར་གྱི་སྟོན་ཐོག་ཉིས་བརྩེགས། དགོན་པ་ཆགས་ལུགས་ཡག་པོ། ཤུག་པས་གཡས་སྐོར་བཏང་ཡོད།། ཅེས་པའི་གཞས་ཚིག་ལས་འབའ་ཐང་ནི་ས་བབ་ཅུང་ཟད་དམའ་ལ་གནམ་གཤིས་དྲོ་བ། རིག་གནས་དང་ཐོན་ཁུངས་ཕུམ་སུམ་ཚོགས་པའི་ནོར་བུའི་ལུང་པ་ཞིག་ཡིན་པ་ཤེས་ཐུབ། འབའ་གཞས་ལ་ད་བར་ལོ་ངོ་སྟོང་ཕྲག་གཅིག་ལྷག་གི་ལོ་རྒྱུས་ཡོད་ཅིང་ཞིང་ལས་ཀྱི་འཚོ་བ་དང་འབྲལ་ཐབས་མེད།

འབའ་གཞས་ཀྱི་ཁོངས་ནི་གདོད་མའི་མཆོད་སྦྱིན་གླུ་གར་ལ་གཏུག་ཆོག་ཅིང་རིམ་པར་སྒོར་བྲོའམ་སྒོར་གཞས་སུ་བསྒྱུར་ནས་དར་ཡོད། སྤྱི་ལོ1906ལོ་ནས་བཟུང་རིམ་བཞིན་ཁམས་འབའ་ཐང་གཙོས་པའི་ཕྱག་ཕྲེང་དང་སྡེ་རོང་། ཡུན་ནན་གྱི་བདེ་ཆེན། བོད་ལྗོངས་ཆབ་མདོ་ཁུལ་གྱི་སྨར་ཁམས་རྫོང་སོགས་བོད་འབྲེལ་ས་ཁུལ་གྱི་ཡུལ་གྲུ་མང་ཆེ་བར་དར་ཁྱབ་བྱུང་ཡོད། འབའ་གཞས་ཀྱི་རམ་དཀྲོལ་རོལ་ཆ་ནི་པི་ཝང་ཡིན་ཞིང་། སྒྲ་སྙན་ཡང་ཟེར། འབའ་གཞས་ནི་བོད་ཀྱི་ཟློས་གར་ནང་གི་ཡན་ལག་ཅིག་ཡིན། དར་ཁྱབ་ཆེ་བའི་གཞས་ཚིག་ཁོ་ན་ཁྲི་ལྷག་ཡོད།

གཞས་ཚིག་དེ་དག་གི་ཚིག་སྦྱོར་གསལ་ཞིང་དྭངས་པར་མ་ཟད། ལུས་རྒྱན་འོས་ཤིང་འཚམ་ལ་ཚིག་སྦྱོར་གྱི་འགྲོས་གོ་བདེ་ཞིང་བློ་ངོར་འཇགས་སླ་བ་བཅས་ཡིན་ལ་མང་ཆེ་བ་ཚེག་བར་དྲུག་མའི་ཚིག་རྐང་བཞི་ཅན་ཡིན། འབའ་གཞས་ཀྱི་ནང་དོན་ཕུན་སུམ་ཚོགས་པ་སྟེ། ཁམས་བོད་མི་དམངས་ཀྱི་ཐོན་སྐྱེད་འཚོ་བ་དང་རིག་གནས་དཔལ་འབྱོར། ལོ་རྒྱུས་དང་ཡུལ་སྲོལ་གོམས་གཤིས། རང་བྱུང་ཁོར་ཡུག་དང་མི་རིགས་ཀྱི་འབྲེལ་བ་སོགས་མངོན་པར་མཚོན་ཡོད།།