སྤྱི་ཟླ3པའི་ཚེས26ཉིན། དཀར་མཛེས་ཁུལ་དར་མདོ་གྲོང་ཁྱེར་ར་རྔ་ཁ་ནས་བྲག་མགོ་བར་གྱི་མྱུར་བགྲོད་གཞུང་ལམ་ལས་འགོ་འཛུགས་པར་སྐུལ་སློང་དང་ལས་ཚན་གལ་ཆེན་དཔྱིད་དུས་སུ་སྐུལ་འདེད་གཏོང་བའི་བྱེད་སྒོ་དར་མདོ་གྲོང་ཁྱེར་ར་རྔ་ཁ་གྲོང་རྡལ་ནས་སྤེལ་བ་རེད། ཁུལ་ཨུའི་ཧྲུའུ་ཅི་གཞོན་པ། ཁུལ་དཔོན་ཧྥུང་ཧྥ་ཀུའེ་ཡིས་འགོ་འཛུགས་པའི་ཁྱབ་བསྒྲགས་གནང་། ཁུལ་ཨུའི་ཧྲུའུ་ཅི་གཞོན་པ་ཝང་ཡུས་ཆུང་གིས་གཙོ་སྐྱོང་གནང་། ཁུལ་ཨུའི་རྒྱུན་ཨུ་དང་ཁུལ་སྲིད་གཞུང་གི་རྒྱུན་ལས་ཁུལ་དཔོན་གཞོན་པ་ཡན་ལེ་ཡིས་ཤིས་ཚིག་ཕུལ། ཁྲོན་ལམ་ཚོགས་པའི་སྤྱི་ཁྱབ་བཟོ་བཀོད་མཁན་ཧོང་པིང་གིས་གཏམ་བཤད་བྱས།

འདས་པའི་ལོ་གཅིག་ནང་དཀར་མཛེས་ཁུལ་གྱིས་ཐོག་མཐའ་བར་གསུམ་དུ་ལས་ཚན་མ་འཇོག་གི་འཕེལ་རྒྱས་སྤུས་ཚད་མཐོན་པོར་ཡོང་བར་སྐུལ་བའི་འགག་གནད་དམ་འཛིན་བྱས་ཏེ། ལས་ཚན་ལས་སྣོན་བཟོ་གྲྭ་དང་བཀོད་འདོམས་པུའུ། དུས་སྔོན་མའི་མ་དངུལ་མཛོད་བཅས“འཛིན་བྱེད་ཆེན་པོ་གསུམ”གྱི་ནུས་པ་འདོན་སྤེལ་གང་ལེགས་བྱས་ཏེ། “ལོ་ལྔའི་འཆར་འགོད་བཅུ་བཞི་པའི”མ་དངུལ་སྙན་སེང་ལས་འགན་སྔ་སྣུར་ཚད་བརྒལ་གྱིས་ལེགས་གྲུབ་བྱུང་། བསྟུད་མར་ལོ་གསུམ་རིང་ཞིང་ཆེན་གྱི་མ་འཇོག་ལས་ཀའི་སྐུལ་ལྕག་མ་དངུལ་སྒོར་དུང་ཕྱུར1ཙམ་ཐོབ། གཏན་འཇགས་མ་རྩའི་གཏང་དངུལ་བརྒྱ་ཆ15.3འཕར་བ་དང་འཕར་ཚད་བསྟུད་མར་ལོ་གཉིས་ལ་ཞིང་ཆེན་ཡོངས་ཀྱི་ཨང་དང་པོར་སླེབས། ཐེངས་འདིའི་བྱེད་སྒོར་གཅིག་བསྡུས་ལས་འཛུགས་ལས་ཚན66དང་མ་དངུལ་བསྡོམས་འབོར་སྒོར་དུང་ཕྱུར705གཏང་རྒྱུ་ཡིན་ཞིང་། དེའི་ནང་རྨང་གཞིའི་སྒྲིག་བཀོད་དང་ཁྱད་ལྡན་ཐོན་ལས། དམངས་འཚོ་དང་སྤྱི་ཚོགས་བྱ་གཞག། སྐྱེ་ཁམས་ཁོར་ཡུག་བཅོས་སྐྱོང་སོགས་ཁྱབ་ཁོངས་མང་པོ་ཚུད་ཡོད་པ་རེད། དེ་ལས་མ་དངུལ་བསྡོམས་འབོར་སྒོར་དུང་ཕྱུར344བཏང་བའི་བྲག་མགོ་ནས་ར་རྔ་ཁ་བར་གྱི་མྱུར་བགྲོད་གཞུང་ལམ་ལས་ཚན་ནི་དཀར་མཛེས་ཁུལ་གྱི་མཐིལ་ལ་སླེབས་པའི་མྱུར་ལམ་ཐོག་མ་ཡིན་ལ་དཀར་མཛེས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་སྤུས་ཚད་མཐོན་པོར་ཡོང་བར་འདེགས་སྐྱོར་ནུས་ལྡན་དང་བོད་བརྟན་ཁམས་བདེར་ཡོང་བའི་འཐབ་ཇུས་གལ་ཆེན་གྱི་ནུས་པ་ཐོན་རྒྱུ་རེད། ད་ཐེངས་ཡུལ་དངོས་ནས་སྐུལ་བའི་ལས་ཚན་གྱི་ནང་ད་དུང་མ་དངུལ་བསྡོམས་འབོར་སྒོར་དུང་ཕྱུར338གཏང་རྒྱུའི་ནུས་རྒྱུ་རྨང་གཞིའི་སྒྲིག་བཀོད་ལས་ཚན9ཚུད་ཡོད། ལས་ཚན་དེ་དག་བསྐྲུན་རྗེས་དཀར་མཛེས་ཁུལ་གྱིས་རྒྱལ་ཁབ་ནུས་རྒྱུ་གཙང་མའི་རྟེན་གཞི་གལ་ཆེན་འཛུགས་པར་སྐུལ་འདེད་མགྱོགས་སུ་གཏང་བ་དང་རྒྱལ་ཁབ་ནུས་རྒྱུ་ཉེན་མེད་འགན་ལེན་བྱ་རྒྱུར་སྲ་བརྟན་གྱི་འདེགས་སྐྱོར་མཁོ་འདོན་བྱ་རྒྱུ་རེད།

བྱེད་སྒོ་མཇུག་བསྒྲིལ་རྗེས། ཧྥུང་ཧྥ་ཀུའེ་རྒྱལ་ལམ318ར་རྔ་ཁའི་ཞབས་ཞུའི་ཁུལ་དུ་གཉེར་སྐྱོང་དོ་དམ་ལས་དོན་ལ་བརྟག་དཔྱད་ཞིབ་འཇུག་དང་མཛུབ་ཁྲིད་གནང་ནས་འབྲེལ་ཡོད་སྡེ་ཚན་ལ་ཞབས་ཞུའི་འདུ་ཤེས་ཆེ་རུ་གཏོང་བ་དང་གཉེར་སྐྱོང་དོ་དམ་ལམ་སྲོལ་འཛུགས་པ། ཚད་ལྡན་ཅན་གྱི་དོ་དམ་ཞབས་ཞུའི་ཕན་ནུས་ཆེ་རུ་གཏང་དགོས་པའི་བླང་བྱ་བཏོན་པ་རེད།།

（ རྟ་མགྲིན་གྱིས་བསྒྱུར།）