ཁྱོད་ནི་གཙང་པོ་བཞིན་བཞུར་རྒྱུན་རིང་ལ། ངའི་ཡིད་ཀྱི་མཛའ་གདུང་གི་རྨི་ལམ་འདི་དག་གི་ཤུལ་ན། ཁྱོད་རང་སྔར་བཞིན་གཙང་པོ་དང་ཁ་ཐག་ཉེ་བའི་མཐའ་མཚམས་ལ་ཉེ་ཡོད། ནམ་ཟླའི་འཆར་སྣང་གི་གོ་རིམ་འདི་ག་ནས། སྐྱོ་གདུང་གི་ན་བུན་འཕྱུར་བ། དྲན་ཤེས་ཀྱི་སྣང་བ་བརྟན་པ། འདུ་འབྲལ་གྱི་འཆར་སྣང་གཡོ་བ། འདི་དག་ནི་ཁྱོད་དང་ང་ཡིས་སྐྱེ་མཆི་རྫོགས་པའི་འཚོ་བ་ཉག་ཅིག་ཡིན་པས། ངའི་འཇིག་རྟེན་དཀར་ནག་འདི་ནས། ཁྱོད་རང་སྨྲེང་བའི་ལས་ཀྱི་སྟབས་ཀ་འདི་ནི་ཉི་ནུབ་ལས་ཀྱང་རིང་བའི་སེམས་ཀྱི་དར་ཐག་དེ་ཡིན།
ང་ཡིས་ཕྱི་ནང་གསང་གསུམ་གྱི་ནམ་མཁའ་ཡངས་པོ་ནས། སེམས་ཀྱི་རྡོག་སྒྲ་དང་སྒོ་ལྔའི་རྣམ་ཤེས་ཀྱི་འདུ་འཛི་ཟང་ཟིང་ནི་ཁེར་རྐྱང་གི་ལོངས་སྤྱོད་ཅིག་ཏུ་གྱུར་སོང་། ཁྱེད་ཀྱི་སེམས་ཀྱི་འཕར་ལྡིང་དང་དྲན་གདུང་གི་གཟུགས་སྒྲ་འདི་ནི་ཁེར་རྐྱང་གི་གཟུགས་འདས་ཤིག་ཡིན། ལོ་ཟླ་དང་དུས་ཚོད་ཀྱི་ཤུལ་དུ། ངའི་རྨི་ལམ་རིང་མོ་རེ་རེའི་གསེང་ནས། ཁྱོད་ཀྱི་སྣང་བརྙན་དང་། ཡིད་འོང་གི་ལོ་ཟླ་དང་དུས་ཚོད་འདི་དག་གིས་སྤྱོད་ཡུལ་དུ་གྱུར་སོང་།
ནུབ་ཁའི་ཉི་མ་རྒྱང་རིང་དུ་བཞུད་རྗེས། འཆར་སྣང་གི་ལས་འཕྲོ་འདི་ཕར་ཕར་བདས་སོང་། ང་ཁེར་རྐྱང་དུ་སྡོད་པའི་དུས་ཡུན་དེ་དག་ལ། ངས་ཅི་ཡང་མི་དྲན་པའི་སྟོང་པ་ཞིག་ཀྱང་མ་ཡིན་ལ། ཁྱོད་རང་དྲན་པའི་འདུ་ཤེས་ལྷག་ཏུ་འཕྱུར་བའི་དུས་ཤིག་ཀྱང་མ་ཡིན། ནམ་རྒྱུན་ཡིད་ལ་རྗེན་པར་ཤར་བའི་བསྡུས་གཟུགས་དེ་དག་ནི། མེ་ལོང་ནང་གི་བྱད་གཟུགས་ཙམ་མ་ཡིན་པར། ངས་ཁྱོད་ཉིད་དྲན་པ་ནི་ལས་འཕྲོས་སྒེའུ་ཁུང་རིལ་པོ་དེ་ཡིན།
ཁྱོད་རང་ཡིད་ལ་མོད་པའི་དུས་ཚིགས་དེར། སྟོན་རླུང་འདི་ཚོད་ཚོད་དུ་གཡུགས་པས།ལྗང་མདོག་གི་མཛེས་སྡུག་ལ་སེར་ཁ་དོད་སོང་། ལས་ཀྱི་སྟབས་ཀ་འགྲིག་པའི་རྒྱང་རིང་གི་བྱ་ཁྱུ་དེ་དག འཕུར་ལམ་ཅི་ཙམ་དོགས་ནའང་ཕྱི་མིག་ཤོར་བ་མེད་པར་གཙང་པོའི་གནས་ལམ་དུ་ལོག་སོང་། དེ་དུས། ཁེར་རྐྱང་གི་གནས་ལམ་ནི་ཅི་ཙམ་ལྷིང་འཇགས་དང་ཁུ་སིམ་མེར་ཞིག་རེད།
བརྩེ་དུང་གི་སྒྱུ་འཕྲུལ་དེ་དག། བར་ཐག་དང་ཁྲེལ་གཞུང་གིས་འཚོས་ཡོད། བར་ཐག་གི་མཚན་མོ་དེ་དག། རྨི་ལམ་དང་འཇིག་རྟེན་གྱིས་བསྲུངས་ཡོད། ངའི་འཆར་ཡན་གྱི་འཇིག་རྟེན་འདི། ཁྱོད་ཀྱིས་སེམས་ཀྱི་རྟེན་སྐལ་ཞིག་དང་། མཁའ་དབྱིངས་ནས་གཉིས་སུ་སྣང་བའི་ཁྱོད་ཀྱི་གྲིབ་མ་དེའོ། །
ད་ནི་རླུང་བུ་རྒྱུ་ཚོད་འདི་ལ་ཡང་ཡང་བསམས་ན། ལས་དབང་གི་ཁ་ཆད་འདི་ཉིན་རེ་བཞིན་དུ་རྒྱང་རིང་ཞིག་རེད་ཨང་། སྤྲིན་དཀར་མྱུར་བར་ལྷོ་ཡི་མཐའ་མཚམས་ལ་བཞུར་རྗེས། དྲན་གདུང་གི་སྐད་ཆ་མག་མོག་དེ་སྤྲིན་པའི་གཏིང་རིམ་ངོས་ལ་ཐིམས་སོང་། ད་ནི་གཙང་པོའི་ལམ་འགྲམ་ནས་ཁྱོད་རང་ལ་སྨྲེང་བའི་མཚོན་བྱེད་ཇེ་མང་རེད། གཙང་པོའི་འགྲམ་གྱི་ངའི་མིག་ཟུང་ནང་གི་ཁྱོད་ཉིད།
༼ ཁམས་པ་རབ་དབྱངས། ༽