国内统一刊号:CN51-0018-Z 中共甘孜州委机关报·甘孜日报社出版凝聚正能量·传播好声音






གཞོན་པའི་སྣང་བ།

གནམ་སྔོན་པོ་གཡུ་ཡི་བླ་བྲེ།།

བྱ་གཤོག་ཐོགས་གར་ལ་རྩེན་ས།།

སྤྲིན་ནག་པོའི་ཡོ་ལོང་མ་རྒྱས།

དགུང་ཉི་ཟླའི་འོད་སྣང་བར་ན།།

ལོ་གཞོན་པའི་རྨི་ལམ་རྨིས་ཡོད།།

ངའི་ལྷ་བྱ་ཁྲུང་ཁྲུང་དཀར་མོ།།

དགུང་གནམ་འཕང་བཅད་ནས་མ་འགྲོ།།

མཐོངས་འདི་ལ་ལྡིང་སྐོར་རྒྱག་རོགས།།

དགུང་གནམ་འཕང་བཅད་ནས་སོང་ན།།

དགུང་ཉི་མ་མཁའ་ནས་ཤར་ཡང་།།

ས་དོག་མོ་དྲོས་ས་མ་རེད།།

རི་མཐོན་པོ་གནམ་གྱི་ཀ་བ།།

གཡུང་རི་དྭགས་བག་ཕེབས་རྒྱུ་ས།།

རྡོ་གཡའ་མས་ཕྱི་ནང་མ་བཏུམས།།

གསོས་བདུད་རྩི་ཆུ་མིག་ཁྲོད་ན།།

ལོ་གཞོན་པའི་ལང་ཚོ་ལུས་ཡོད།།

ངའི་རི་དྭགས་ཤ་བ་ཡུ་མོ།།

རི་ཉག་ག་བརྒྱུད་ནས་མ་འགྲོ།།

གནས་དབེན་པའི་སྐྱིབས་ལ་བཞུགས་རོགས།།

རི་ཉག་ག་བརྒྱུད་ནས་སོང་ན།།

རི་ལྷུན་པོ་སྨྲེང་བའི་ཟོལ་གྱིས།།

དབུ་སྨུག་པས་བཏུམས་ན་འགྱོད་ཀི།།

མཚོ་ཆེན་པོ་གཡུ་ཡི་མེ་ལོང་།།

ཉ་གསེར་མིག་འཁྱུག་རྩལ་ངོམ་ས།།

འོག་རྨང་གཞི་བྲག་གིས་བཟུང་ཡོད།།

མཚོ་སྔོན་པོའི་རླབས་རྒྱུན་ཁྲོད་དུ།།

ལོ་གཞོན་པའི་སེམས་པ་ཆགས་ཡོད།།

ངའི་གསེར་མིག་ཉ་མོ་ཆུང་ཆུང་།།

མཚོ་བསྐྱུར་ནས་ཀླུང་ལ་མ་འགྲོ།།

མཚོ་འདི་ལ་རྟག་ཏུ་འཁྲི་རོགས།།

མཚོ་བསྐྱུར་ནས་ཀླུང་ལ་སོང་ན།།

ཉ་འདབ་ཆགས་མེད་པའི་མཚོ་མོ།།

གཏིང་ཟབ་རུང་སྙིང་པོ་མི་འདུག།

ཐང་ཡངས་མོ་ལྗང་མདོག་རྩྭ་ཐང་།།

འབྲི་ཐུལ་མའི་འཕེལ་ཁ་དར་ས།།

འདམ་ཚེར་མའི་གཞིས་སྒར་མ་ཡོད།།

སྤང་ཁྲ་ཚོམ་མེ་ཏོག་གསེང་དུ།།

ལོ་གཞོན་པའི་སྣང་བ་བཀྲ་ཡོད།།

ངའི་གཡང་ཟོག་ཟླ་བའི་འཛི་ཅན།།

ཐང་གཡེར་མོ་བསྐྱུར་ནས་མ་འགྲོ།།

རྩྭ་རྩི་ཐོག་དཀྱིལ་ལ་འཁོར་རོགས།།

ཐང་གཡེར་མོ་བསྐྱུར་ནས་སོང་ན།།

རླུང་ལྷགས་པས་འདབ་མ་བསྒུལ་ཏེ།།

སྤང་མེ་ཏོག་རྙིད་ལ་ཤོར་འགྲོ།།

༼ གཞི་ཚང་ཟླ་བ་གྲགས་པ། ༽