སློབ་གླིང་གི་དབྱར་གནང་བཏང་ནས་ཅུང་འགོར་ཡོད་ཀྱང་ང་ནི་རྣམ་གཡེང་དང་བྱ་བ་ཕྲན་ཚེགས་རེའི་དབང་གིས་དཔེ་ཀློག་དང་གྱེས་ནས་ཡུན་རིང་ཡིན། སྙན་ངག་ལ་མི་ཕྱེད་པའི་དད་པ་བརྟན་པའི་གྲོགས་རབ་རྣོ་དཔལ་ལགས་ལ་སྤྱི་ཟླ་བདུན་པའི་ཚེས་ཉེར་བཞི་ཉིན་དཔེ་ཆ་འདི་གཡར་ནས་ཀློག་གིན་དེ་རིང་བར་མཇུག་བསྐྱངས་མ་ཐུབ། དེ་རིང་རང་སློབ་གླིང་གི་ལེགས་བཤད་ལྡེ་མིག་དཔེ་ཁང་ནས་མཇུག་བྱང་དང་བཅས་ཆ་ཚང་བདེ་ལེགས་ངང་བཀླགས་གྲུབ་པར་བྱས།

ཟངས་ཀྱི་མེ་ལོང་ནང་གི་འཇིག་རྟེན་ཞེས་པའི་དཔེ་ཆ་འདི་དང་རྩོམ་པ་པོ་ཨ་ཅག་འཆི་མེད་གཉིས་ནི་ངར་མ་ཟད་བོད་ཁུལ་གྱི་རྩོམ་པ་པོ་བྱིངས་ལ་ཆ་མེད་རྒྱུས་མེད་ཅིག་མིན། ལོ་འགའི་སྔོན་དུ་རྒན་ཁོང་གི་རང་རྩོམ་རང་གྱེར་བྱས་པའི་ནར་སོན་པའི་གོ་རིམ་ལ་ཕྱིར་དྲན་དང་། ཨ་མ་དྲན་པའི་གདུང་ཡུས། དྭ་ཕྲུག་གི་སེམས་ཁམས་འཁྱག་པ་དང་གནས་བབ་སྐྱུར་མོ་མཚོན་པའི་སྙན་ངག་སྟེ

《 ཨ་མ་ལགས། ཁྱེད་རང་ཕེབས་པར་དེ་འདྲའི་བྲེལ་དོན་ཅི》ཞེས་པས་ངའི་ཡིད་སེམས་བློང་བློང་བོར་བྱས་ཏེ་མིག་ཟུང་རབ་རིབ་ཏུ་བཏང་བྱུང་། ད་དུང་། རང་གི་ཡོད་ཚད་བུ་ཕྲུག་གི་ཆེད་དུ་ཕུལ་བའི་འབྲོག་མོ་དཀྱུས་མ་ཞིག་སྟེ། ཨ་མ་ལགས་ཤིན་ཏུ་དྲན་ཞིང་། བུ་ཕྲུག་དག་དང་ཁྱིམ་ཚང་གི་ཕྱིར་དུ་སྐུ་ཚེགས་ཡ་ང་བ་མྱངས་པའི་ངའི་ཨ་མ་ལ་རང་ཉིད་ཀྱི་ལང་ཚོ་དང་རྨི་ལམ་ཡོད་ཀྱང་། ཨ་མ་ལགས་ལ་མཚོན་ན་རང་གི་ངོས་ནས་རེ་བ་ཅི་ཡང་མེད་དེ། ཇ་དཀར་ཡོལ་གང་གིས་མོའི་ངལ་བ་ཡོངས་སུ་སེལ་འགྲོ་བ་ཡིན། སྙན་ངག་དང་ལྷུག་རྩོམ་འགའ་ཤས་ཀྱིས་ཡིད་སེམས་དབང་མེད་དྲངས་ཏེ་ཅིས་ཀྱང་དོ་སྣང་མི་བྱེད་རང་བྱེད་ལྟ་བུར་ཆགས་སོང་། རྗེས་སོར་ཡང་ཁོང་གི《གཡུ་ཐོག་ཟམ་པ》དང《སྟག་རོང་ཨ་ནུ་གཟིག་འཕེན》《ལབ་ཙེ་ཉག་ག》《ལྕགས་ནག་དགུ་སྒྲིལ་དེ་ཡི་སྣེ་གཉིས་ན》《རྒྱང་རིང་གི་ཨ་ལགས་ཚང》《ངའི་རྩེད་རོགས་སྲང་ཁྱི་དེ་དག》《ལྷམ》སོགས་བཀླགས་པས་ལྷག་ཏུ་ཁོང་ལ་དགའ་བའི་འདུན་པ་ཆེས་ཆེར་བསྐྱེད།

ད་ཐེངས་ཀྱི་རྒན་ཁོང་གི་དཔེ་ཆ་འདིར་མཚོན་ན། གཡུ་ཐོག་ཟམ་པ་སྟེ་ཚིགས་བཅད་ཁོ་ནས་ཚན་པ་དང་། དཔྱིད་ཀྱི་དྲན་པ་རང་མོས་སྙན་ངག་ཁོ་ན་དང་། ཟངས་ཀྱི་མེ་ལོང་ལྷུག་རྩོམ་གྱི་ཚན་པ་སྟེ་གསུམ་དུ་དགར་འདུག་ཅིང་ང་རང་ལ་མཚོན་ན་ཆེས་ཀློག་སྤྲོ་བ་དང་ཡིད་ལ་སིམ་པ་ནི་ཟངས་ཀྱི་མེ་ལོང་སྟེ་ལྷུག་རྩོམ་ཚན་པ་འདི་རེད། ལྷུག་རྩོམ་འདི་དག་ནི་ཅི་ཙམ་བཀླགས་ན་དེ་ཙམ་གྱིས་སྤྲོ་བར་འོང་ངེས་པར་མ་ཟད་རང་ཉིད་ཀྱི་ལྷུག་རྩོམ་འབྲི་སྐབས་མཉམ་འཇོག་བྱ་ཡུལ་དང་ཐ་སྙད་སྦྱོར་སྟངས་སོགས་ལའང་ཕན་ཆེན་པོ་ཐོགས་སོང་བས་རྒན་ལགས་ལ་བཀའ་དྲིན་ཆེ་ཞུ།

ཚན་པ་འདི་དག་གི་ནང་ནས་རྒན་ཁོང་གི་ཆེས་རྩལ་བཏོན་ཡོད་པ་དང་ཀློག་པ་པོ་མང་ཤས་ཀྱིས་དགའ་བསུ་འཐོབ་ཀྱིན་པ་ནི་གཡུ་ཐོག་ཟམ་པ་སྟེ་ཚིགས་བཅད་ཀྱི་ཚན་པ་འདི་རེད་སྙམ། དེ་ནི་རྒན་འཇུ་སྐལ་བཟང་ལགས་ཀྱི་དེབ་ཀྱི་འགོ་བརྗོད་དུ་ཞུས་པ་ལྟར། “མོའི་སྙན་ངག་ཀློག་པའི་ཚེ་ན་ཚིག་དོན་བརྗོད་བྱ་གང་རུང་གི་ཆ་ན་བབ་ཆགས་སམ་རང་བབ་ཤུགས་འབྱུང་གི་ཚོར་བ་ཞིག་དབང་མེད་དུ་མྱང་རྒྱུ་ཡོད་པ་འདི་ནི་མོའི་སྙན་ངག་གི་ཁྱད་ཆོས་ཤིག་ཏུ་ངོས་འཛིན་བྱ་ཆོག་ཆོག་རེད། འགའ་ཞིག་ལ་སྲོལ་རྒྱུན་གྱི་ཆ་མངོན་པར་ཐོན་པ་དང་། ཁ་ཤས་གསར་ཉམས་ཆེ་བ་སོགས་བརྩམས་ཆོས་སོ་སོ་མི་འདྲ་ནའང་ཕལ་མོ་ཆེ་ཞིག་མ་བཅོས་མ་བསྒྱུར་ཞིང་། སྙན་ངག་པའི་བློས་བསླངས་དང་ཚོར་འདུ་ཐོགས་པ་མེད་པར་ཤར་མར་རྒྱུ་བ་ལ་ཚིག་འགྲོས་དང་ཐབས་རྩལ་གྱིས་ཐེ་གཏོགས་དང་ཉྭ་འཐེན་མ་བྱས་པའི་ཉམས་ཤིག་རང་ཆས་སུ་འདུག”ང་རང་ལ་མཚོན་ནའང་རྒན་ཁོང་གི་ཚིགས་བཅད་སྙན་ངག་དག་ཀློག་གིན་ཀློག་གིན་དེ་འདྲའི་ཚོར་བ་ངང་ངམ་ཤུགས་ཀྱིས་སྐྱེས་ཡོང་བར་མ་ཟད་ཚིགས་བཅད་རྩོམ་ཡིག་འབྲི་སྦྱོང་གི་ཕྱོགས་ལ་ཡང་སྤྲོ་བ་ཡན་གར་བ་ཞིག་སྐྱེ་རུ་བཅུག་བྱུང་།

དཔྱིད་ཀྱི་དྲན་པ་སྟེ་རང་མོས་སྙན་ངག་གི་ཚན་པ་འདི་ལ་རང་བློས་དཔོག་ཚོད་ཙམ་ཞུས། ང་རང་སྙན་ངག་འདི་དག་ལ་སྤྲོ་བ་ཆེར་མ་བྱུང་བར་མ་ཟད་ཚིགས་བཅད་དང་ལྷུག་རྩོམ་གཉིས་དང་བསྡུར་ན་གྲངས་ཀ་ཉུང་ལ་སྤུས་ཀའང་དེ་ཙམ་ཞིག་རེད་སྙམ། སྙན་ངག་འདི་དག་གི་ནང་ནས་རང་ཉིད་ཆེས་དགའ་ཤོས་དེ་སྔོན་ཆད་བཀླགས་མྱོང་བ་དང་དགའ་ལྡན་ལྔ་མཆོད་སླེབས་ཐེངས་རེར་དྲྭ་ལམ་ཁག་ཏུ་ཁྱབ་ཀྱིན་པའི་འོད་ཟེར་ལྗང་གུས་གྱེར་འདོན་བྱས་པའི《དགའ་ལྡན་རི་བོའི་རྩེ་ནས་ཨ་མ་དྲན་མྱོང་བའི་བླ་མ་ཙོང་ཁ་པ》ཞེས་པའི་སྙན་ངག་དེ་རེད། “ཉེ་ཆར་བོད་ཀྱི་ན་གཞོན་རང་མོས་སྙན་ངག་འབྲི་མཁན་དག་གི་སྙན་ངག་ལ་རྩོམ་གཤིས་མི་འདྲ་བ་གཉིས་འདུག་སྟེ། བསྡུས་བརྗོད་སོགས་ཀྱིས་ཤིན་ཏུ་བཅིངས་ཏེ་ཀློག་པ་པོ་དང་ཁ་ཐག་རིང་བའི་གྲས་དང་། ཡང་བསྡུས་བརྗོད་དང་གབ་སྦས་ཀྱི་རང་བཞིན་ཅུང་ལྷོད་པའི་རིགས་འདི་གཉིས་ཡིན་ལ།” རྒན་ལགས་ཀྱི་སྙན་ངག་འདི་ནི་ཕྱི་མའི་རིགས་སུ་ཐེ་འདུག་སྙམ།

《ཟངས་ཀྱི་མེ་ལོང་ནང་གི་འཇིག་རྟེན》དུ་མོ་རང་གསར་རྩོམ་ལ་ཞུགས་པའི་གོ་རིམ་དང་དེ་ལས་ཐོབ་པའི་མྱོང་ཚོར་གླེང་འདུག། མིག་ནས་མཆི་མ་དབྱུང་དགོས་པའི་གཏམ་རྒྱུད་ཡ་ང་བ་དང་དཀའ་སྡུག་གི་འགག་འཕྲང་ཇི་ལྟར་འཕྲད་ནའང་སྤོབས་པའི་མགོ་བོ་མཐོ་རུ་བཏེགས་ཏེ་མདུན་བསྐྱོད་ཀྱི་གོམ་ཁ་མ་ལྷོད་པ་ནི་ཇི་འདྲའི་གཟི་བརྗིད་དང་རྒྱལ་ཁ་ཆེན་པོ་ཞིག་རེད་ཨང་། ད་དུང་རྒན་ལགས་གསར་རྩོམ་ལ་ཞུགས་ནས་ད་བར་དུ་བཀླགས་ཟིན་པའི་དཔེ་ཆ་དག་ལས་རང་ཉིད་ཀྱི་གསར་རྩོམ་ལ་ཤུགས་རྐྱེན་ཆེས་ཆེ་བ་དང་བག་ཆགས་ཤིན་ཏུ་ཟབ་པའི“ཧོར་གླིང་གཡུལ་འགྱེད”གཙོས་པའི་རིན་བྲལ་གྱི་དཔེ་ཆ་མང་ཤས་ང་ཚོ་ལ་བཀླག་དགོས་པའི་སྐུལ་ལྕག་གམ་འོས་སྦྱོར་གནང་འདུག་པས་ཁོང་ལ་བཀའ་དྲིན་ཞུ་ཡི་ཡོད།

འདིར“ང་ནི་དྲང་བཞག་དང་འདྲ་མཉམ་གྱི་ལམ་ནས “གསེར་དང་རག”གི་ཤན་འབྱེད་པར་འཐད་དེ། ངེས་པ་དོན་གྱི་བུད་མེད་སྙན་ངག་པ་ཞིག་འབྱུང་བར་རེ་བ་ཆེ་བས། དམིགས་བསལ་རྩོམ་སྟེགས་དང་དམིགས་བསལ་འོས་སྦྱོར་སོགས་ལ་བཀའ་དྲིན་མ་ཞུས་ནའང་ཆོག་སྙམ”ཞེས་རིན་ཐང་ལྟ་ཚུལ་དང་འདུ་ཤེས་འཛིན་སྟངས་སོགས་ཀྱི་ཐད་ནས་གཙོ་ཆེར་རིགས་ལྔ་རུ་དབྱེ་འདུག། དེའི་ནང་གསེས་གཉིས་པ་གཞན་བརྟེན་འདུ་ཤེས་ཤུགས་དྲག་པའི་སྡེ་དང་བཞི་བ་སྲོལ་རྒྱུན་གྱི་བཀག་རྒྱ་རུ་ཚུད་པའི་སྡེ་གཉིས་ལས་བོད་རིགས་བུད་མེད་ཀྱི་རྩོམ་རིག་གི་གནས་བབ་ཐད་ལ་ཡང་གནད་དུ་ཁེལ་བའི་སྐད་ཆ་འགའ་ཤས་བརྗོད་འདུག་སྙམ།

བརྗེད་ཐོ་འདི་བྲིས་ནས་མཚམས་འདིར་སླེབས་དུས་བརྗོད་དགོས་པ་གང་དེ་བརྗོད་ཐུབ་མེད་པ་དང་མི་དགོས་པའི་ཉག་ཉོག་ལུང་པ་གང་བྲིས་ཏེ་མཇུག་བསྐྱང་དགོས་པ་འདྲ་བས།གང་ལྟར། ཟངས་ཀྱི་མེ་ལོང་ནང་གི་འཇིག་རྟེན་ནི་གཞན་ལ་འོས་སྦྱོར་བྱེད་ཆོག་ཆོག་ཅིག་དང་ཀློག་རིན་ལྡན་པའི་དེབ་མཆོག་ཅིག་རེད་སྙམ། མདོར་ན། བོད་ཀྱི་དེང་རབས་རྩོམ་རིག་ལས། རྒྱ་ཆེ་བའི་ཀློག་པ་པོའི་དགའ་བསུ་ཐོབ་ངེས་ཡིན་པའི་ཡིད་ཆེས་བཅས་དང་མཇུག་བསྡུས་པར་བྱས་སོ། །

༼ གངས་ཚ་འཇོམས། ༽