དཔྱིད་དཔལ་བུ་མོའི་འཛུམ་མདངས་མཐོ་སྒང་གི་རི་ཀླུང་ཀུན་ཏུ་རྒྱས་ཤིང་། རྟའུ་རྫོང་སྦར་ཞབས་གྲོང་རྡལ་ཟམ་ཁ་གྲོང་སྡེའི་ཞིང་ར་རེ་རེ་ལའང་དཔྱིད་ཀྱི་ཉི་འོད་དྲོན་མོའི་ཟེར་མདངས་རབ་ཏུ་འཕྲོས་ནས་གང་སར་སྐྱེ་སྟོབས་དང་རེ་བས་ཁེངས་འདུག། སོ་ནམ་གྱི་ལས་ལ་འཇོན་པའི་ཡུལ་གྲུ་འདིའི་མི་སེར་ཚོས་རང་རང་གི་ཞིང་ས་གྲུ་བཞི་དང་ཤིང་ཏོག་ལྡུམ་ར་བཅས་སུ་ལུད་རྒྱག་པ་དང་ས་རྒྱོང་བ། ཆུ་འདྲེན་པ་སོགས་བྲེལ་འཚུབ་ཆེ་བའི་ལས་ལ་བརྩོན་བཞིན་ཡོད། རྟའུ་རྫོང་ནགས་ལས་ཅུས་ཀྱི་ལག་རྩལ་མི་སྣ་ས་གནས་དེ་གར་བསྐྱོད་ནས་མང་ཚོགས་ལ་འོ་སེའི་སྡོང་ཕྲུག་འཛུགས་པར་མཛུབ་སྟོན་ཞིབ་ཚགས་བྱས་པ་རེད།
དཔྱིད་ཀ་ཤར་བ་ན་འོ་སེའི་སྡོང་ཕྲུག་འཛུགས་པའི་དུས་སྐབས་བཟང་པོ་ཡིན་ཞིང་། ཉིན་འགའི་རིང་ལ། རྟའུ་རྫོང་ནགས་ལས་ཅུས་ཀྱི་ལས་སྒྲུབ་མི་སྣ་དཀའ་ངལ་འཛེམ་མེད་ངང་ས་ཆ་མང་པོ་ཞིག་ཏུ་ཚན་རིག་དང་མཐུན་པའི་འདེབས་འཛུགས་ལག་རྩལ་བསླབ་སར་བསྐྱོད་དེ། འོ་སེ་ཐོན་ལས་ཀྱི་སྤུས་འབྲས་ལེགས་གཏོང་དང་ཐོན་ཚད་འཕར་སྣོན་ཡོང་བར་རྨང་གཞི་བརྟན་པོ་བཏིང་ཡོད་པ་རེད།
འོ་སེའི་འདེབས་འཛུགས་རྟེན་གཞིར་སྐྱོད་དུས་ཡུལ་མི་ཚོས་ཞིང་ནང་དུ་འོ་སེའི་སྡོང་ཕྲུག་འཛུགས་པའི་ལས་ལ་བྲེལ་བཞིན་ཡོད་པ་མཐོང་ཐུབ། རྫོང་ནགས་ཚལ་རྩྭ་ཐང་ཅུས་ཀྱི་ལག་རྩལ་མི་སྣ་ཧོ་ཞིན་མིང་གིས་ཡུལ་དངོས་སུ་ཡུལ་མི་ཚོར་འོ་སེ་འདེབས་འཛུགས་བྱེད་སྟངས་སློབ་པ་དང་། ཡུལ་མི་ཚོས་བློ་རྩེ་གཅིག་སྒྲིམ་གྱིས་ཉན་པ་དང་ལྟ་ཞིབ་བྱས་པར་མ་ཟད། ད་དུང་འབྲི་དེབ་དང་སྨྱུ་གུ་བླངས་ནས་ནན་ཏན་གྱིས་གཙོ་གནད་ནང་དོན་ཟིན་ཐོར་བཀོད་པ་རེད།
ཧོ་ཞིན་མིང་གིས་ངོ་སྤྲོད་བྱས་པར་གཞིགས་ན། གངས་ལྗོངས་མཐོ་སྒང་དུ་སྐྱེས་པའི་འོ་སེ་ཤིང་གི་ལོ་འབྲས་ནི་འོ་སེ་ཇའི་མ་རྒྱུ་ཡིན། རྟའུ་རྫོང་གིས་ཡུལ་སྡེ་དར་རྒྱས་ཀྱི་ནགས་ལས་ཐོན་ལས་འཕེལ་རྒྱས་དང་ཡུལ་སྐོར་ལྟ་སྐོར་ཐོན་ལས་ལས་གཞི་སྟེ་འོ་སེ་འདེབས་འཛུགས་ལག་ལེན་བསྟར་བ་དེ་དེང་རབས་ནགས་ལས་ཐོན་ལས་གླིང་ཁུལ་གྱི་གཙོ་གནད་ལས་གཞི་ཞིག་རེད། ལོ་བཞིའི་རིང་ལ་མ་དངུལ་བསྡོམས་འབོར་སྒོར་ཁྲི2300ལྷག་བཏང་ནས་འོ་སེའི་སྡོང་ཕྲུག་ཁྱོན་བསྡོམས་ཁྲི47.7བཙུགས་པ་རེད། ད་ལོར་རྫོང་སྲིད་གཞུང་གིས་སླར་ཡང་སྒོར་ཁྲི423.5བཏང་ནས་སྦར་ཞབས་སྡེ་ཁུལ་གཙོས་པའི་ཁང་གསར་ཡུལ་ཤོག་དང་ཤར་རོང་ཡུལ་ཤོག་སོགས་ཡུལ་ཤོག3དང་། གྲོང་ཚོ8ཀྱི་དུད་ཚང528ཀྱི་མི2464འདེབས་འཛུགས་ནང་ཞུགས་ཡོད། དེའི་ནང་དབུལ་ཐར་དུད་ཚང124ཡི་མི554ཡོད། ལས་གཞི་ཁུལ་གྱི་མི་སེར་གྱི་མི་རེའི་ཆ་སྙོམས་ཡོང་འབབ་སྒོར1718འཕར་རྒྱུའི་འཆར་གཞི་ཡོད་པ་རེད།
ཟམ་ཁ་གྲོང་སྡེའི་ཏང་ཀྲི་པུའུ་ཧྲུའུ་ཅི་ལྷ་མོས་ད་ལོར་གྲོང་སྡེའི་ནང་འོ་སེའི་སྡོང་ཕྲུག་ཁྲི1འཛུགས་བརྩི་ཡོད། ལས་གཞི་དེ་གྲོས་མོལ་བཞི་དང་ཡོངས་བསྒྲགས་གཉིས་ཀྱི་ལས་དོན་བརྒྱུད་རིམ་ལ་དམིགས་ཏེ། སྔོག་དཔག་བྱས་ན་གྲོང་སྡེའི་དུད་ཚང38ཀྱི་མི187ལ་མ་དངུལ་སྒོར་ཁྲི49འཕར་ཐུབ་པ་དང་། དུད་ཚང་རེར་ཆ་སྙོམས་སྒོར་ཁྲི1.3ཙམ་འཕར་རྒྱུ་ཡིན་པས། ཡུལ་མི་ཚོ་ལ་ཕྱུག་སྒྱུར་གྱི་ཐབས་ལམ་གསར་པ་བཏོད་ཡོད་པ་རེད། དེས་མཛེས་སྡུག་དང་ཕྱུག་འབྱོར། འཆམ་མཐུན་བཅས་ཀྱི་གྲོང་སྡེ་གསར་པ་བསྐྲུན་རྒྱུར་གསོན་ཤུགས་བསྣན་པར་མ་ཟད། ཞིང་ལས་སྟོབས་ཆེ་དང་གྲོང་སྡེ་མཛེས་པ། ཞིང་པ་ཕྱུག་པོ་སོགས་ཀྱི་ཕུགས་འདུན་རིམ་བཞིན་མངོན་འགྱུར་ཡོང་བ་དང་། ཡུལ་སྡེ་དར་རྒྱས་ཀྱི་ངར་ཤུགས་ཡང་མངོན་ཡོད་ཅེས་བཤད་པ་རེད།། ( བདེ་ཆེན་གྱིས་བྲིས།)