སོར་རྩེའི་འགྱུར་ཁུག་ནས་ཐོན་ཞིང་། །
མགྲིན་པའི་མགུལ་རྒྱན་དུ་བྱས་པའི། །
ལོ་ཟླའི་འཕྲེང་གོག་གི་བྱམས་པ། །
མི་འགྱུར་བདག་འདུན་དུ་གནས་ཡོད། །
ཚོར་འདུ་ཚོགས་དྲུག་གི་རྗེས་ལ། །
བྲིས་པའི་རི་མོ་དེ་མ་བསུབ། །
ཚེ་གང་ཀྱོག་ལམ་གྱི་སྣང་ཡན། །
སོར་དཀར་པིར་རྩེ་ནས་བྲིས་ཡོང་། །
ཕར་ཚུར་དུང་སེམས་ཀྱི་དགའ་འཁྱིལ། །
ང་ཁྱོད་དགའ་ཞེན་གྱི་བརྩེ་མདུད། །
འདྲིས་ཡུན་ལོ་ཟླ་ཡི་རི་མོ། །
ཕྱག་གིས་ཤོག་དཀར་ལ་ཕབ་པ། །
ཕྱི་རོལ་སྣང་བ་འདི་བན་བུན། །
ནང་གི་ཡིད་སེམས་འདི་རྟ་ཕོ། །
ཕྱི་ནང་མི་རྟག་གི་ཞལ་རས། །
མ་བཅོས་རང་གཤིས་སུ་མཇལ་ཡོང་། །
ཚིག་འབྲུ་མང་པོ་ཞིག་ལྡེག་གིན། །
དགའ་སྐྱོ་ཁྲི་མ་འབུམ་ཉར་ནས། །
ནམ་ཟླའི་སྐད་ཅིག་གི་རྗེས་སུ། །
ཕྱིན་སོང་རྗེས་དྲན་གྱི་དན་རྟགས། །
༼ རང་མདངས། ༽