ང་ནི་རླུང་བུའི་ཉིན་སྲིབ་སོ་སོ་ན།།
ལུས་ཀྱི་རྣམ་ཐར་སྣ་ཚོགས་འཁྲབ་བཞིན་དུ།།
བཟི་བའི་སྣང་བར་སྒྱུ་མའི་ཚོན་བྱུག་སྟེ།།
གངས་ཁྲོད་སེང་གེ་དེའང་ཡིན་ནོ་ཟེར།།
མི་ཐུབ་དབང་ལ་ཤོར་བའི་སེམས་པ་འདིས།།
དྲན་པའི་ཁ་ལོ་གང་དུ་དཀྱུས་གནང་ཚེ།།
བདག་གི་མི་རབས་གསུམ་གྱི་རྟ་ཕོའང་།།
མགོ་བོ་བསྒུར་ནས་གཞན་ཡུལ་སྙེག་དགོས་ཡོད།།
དགའ་སྐྱོའི་རྨུ་ཐག་དཀར་ཡང་ནག་ཀྱང་རུང་།།
སེམས་ཀྱི་ལག་པ་ཕངས་མེད་འཇུས་པ་ནི།།
མུན་ཁྲོད་ཟླ་འོད་མེད་པའི་སྔ་རྗེས་སུ།།
ལང་ཚོའི་མེ་ཏོག་བཞེངས་བའི་ཁོ་མོ་ལགས།།
སྨིག་རྒྱའི་ཀློང་དུ་མགོ་བོ་འཁོར་ནས་ནི།།
རུས་པའི་གསེང་ལ་འཁྱག་རླུང་གཡུག་པ་ན།།
སྤྲིན་རིམ་གཏོར་ནས་གམ་དུ་འབྱོར་བ་དེ།།
ཚོར་འདྲེས་ཟབ་པའི་བདག་མོ་ཁྱོད་ཉིད་རེད།།
ཉིན་ལ་འཁོར་བའི་རྟ་བདུན་འདྲུད་མཁན་ཉན།།
མཚན་དུ་སྐར་མའི་ལུག་ཁྱུ་འཚོ་རོགས་བྱེད།།
འཁོར་བའི་སྙིང་པོ་དུངས་བའི་སྦྱིན་མཁན་དེ།།
ཚངས་སྲས་བྱོན་ཡང་ཁྱོད་ལས་ལྷག་ཅིག་གང་།།
ཞལ་འཛུམ་ཟླ་བ་དཀར་ནས་ནག་པ་མེད།།
གཉུག་གཤིས་སྡོང་བུ་སློག་ཀྱང་འགྱེལ་བ་བྲལ།།
རྟག་པར་ང་ཡི་རི་དྭགས་སྐྱོང་བྱེད་པས།།
འཕགས་པའི་ཚོགས་ཀྱང་རེ་ཞིག་མགྲིན་པ་འགག།
མི་ཚེའི་ནམ་མཁར་མེ་ཏོག་འདེབས་པ་དང་།།
གསང་བའི་ཚོགས་ནི་སྟོན་མོར་བཤམས་པ་སོགས།།
བདག་ཉིད་དགྱེས་པའི་དཔལ་དུ་འབུལ་བས་ན།།
མིག་གི་ལོངས་སྤྱོད་སེམས་ཀྱི་སྲུང་མ་ཡིན།།
༼ བཙན་མི། ༽