བན་བུན་སྨུག་སྤྲིན་ཡོལ་བས་གནམ་ས་ཁེབས། །
ཟམ་ཟིམ་ཁངས་ཆར་འདྲེས་མས་ས་ཞིང་བརླན། །
བྱེའུས་ཚང་ཁ་ཤིག་གེར་ཅ་ཅོའི་ཁྲོད། །
ཡ་མེད་ཁེར་རྐྱང་གདུང་བ་འདི་ནས་ལེན། །
བདག་ཡིད་གཅིག་ཏུ་མ་བཞུགས་ལྟད་མོར་ཕྱིན། །
འདི་སྣང་སྒྱུ་མའི་འཕྲུལ་གྱི་གར་ལ་གཡེང་། །
དུས་གསུམ་ཉམས་སྣང་དབྱིང་སུ་ཚོར་བ་འདྲེས། །
འདུ་འབྲལ་ལས་ཀྱི་རི་མོས་སྐྱོ་བ་དྲངས། །
བདག་འདུན་ནམ་མཁར་བཏེགས་པའི་རི་གྲོང་འདིེར། །
མ་འབད་རྗེས་སུ་ལུས་པའི་སྣང་བ་འདིས། །
སེམས་ཐག་གཅིག་གིས་སྦྲེལ་བའི་གློ་དཀར་ཚོའི། །
རེ་འདུན་སྟོང་བའི་སྨྲེང་གཞས་སུ་ཡིས་ཚོར། །
བྱམས་བྱམས་མིག་གིས་བལྟས་ཀྱང་མ་རིག་པ། །
སྙན་སྙན་ཚིག་གིས་བྱམས་ཀྱང་མ་ཚོར་ཞིང་། །
དཀར་དཀར་དུང་སེམས་བསྐྱེད་ཀྱང་མ་ཤེས་པའི། །
ངན་ངན་ཚིག་གི་ཡ་ལན་སྨྲེང་བའི་གཞི། །
གྱེས་གདུང་སེམས་ཀྱིས་མ་བཟོད་རྨ་ཁ་ཟབ། །
དྲན་གཞུང་སྙིང་ལ་འཚང་ནས་ན་ཟུག་ལྕི། །
གྲོགས་མེད་ཁེར་རྐྱང་ཉུལ་བའི་རི་གྲོང་ནས། །
སྐྱོ་བ་སེམས་ཀྱི་གཞས་དབྱངས་སུ་ལ་ལེན།
མིག་ཆུ་རྡོག་པོ་ལྷུང་ཡང་ན་ཟུག་འདི། །
སེལ་ཐབས་བསྡུ་ཐབས་མེད་པས་ཅི་བྱ་ཡོད། །
ང་རང་ཁེར་མས་གྱེརབའི་གདུང་སེམས་འདི། །
རྒྱང་རིང་ཨ་ཇོ་ཁྱོད་ཀྱིར་ཚོར་བར་ཤོག །
༼ རང་མདངས། ༽