ཁོར་ཡུག་ཤ་ཤེད་རྒྱས་ཏེ། །
ལྗང་མདོག་མཛེས་པས་ཕྱུག་སོང་། །
སྙིང་དང་བར་ཐག་ཉེ་བའི། །
མཛའ་མོ་དྲན་པ་སྒུལ་བྱུང་། །
ཁམ་ཤིང་མེ་ཏོག་བཀྲ་ལ། །
མེ་ཏོག་མིག་ལ་མཛེས་པས། །
རང་སྣང་ཞེན་པའི་མི་དེ། །
ཡིད་ལ་ལང་ལོང་འཁོར་བྱུང་། །
ཁམ་བུ་ལུས་ཤ་བརྟས་ལེ། །
ཁམ་འབྲས་རྒྱས་པ་ཡག་འདུག །
བརྩེ་བའི་རོགས་ལོ་ཁྱོད་རང་། །
སེམས་པའི་ནང་ན་རྩེན་འདུག །
མེ་ཏོག་ཞལ་ཁ་ཕྱེས་པས། །
གཡུ་སྦྲང་འཕུར་དགའ་རོལ་སོང་། །
སྙིང་ཉེ་འཛུམ་དཀར་སྟོན་པས། །
དུང་བའི་མདའ་མོ་ཤོར་སོང་། །
དཔྱིད་འགོའི་ལང་ཚོ་ཡག་བྱུང་། །
ཡུལ་ལུང་དྲོད་ཁ་འབར་སོང་། །
འདང་བརྩེ་དགའ་བའི་མི་དེ། །
དྲན་པའི་སྦུག་ལ་འཆར་འདུག །
ཆར་ཆུ་དལ་བ་བབས་སོང་། །
ས་བོན་འགོ་རྩེ་འབུད་བྱུང་། །
བརྩེ་མཐུན་སྙིང་གི་མི་ལ། །
ཆར་པས་གདུང་བ་བཟིས་སོང་། །
ནམ་ཟླ་དྲོད་ཁུལ་ལྡན་སོང་། །
ཡུལ་ལུང་དྭངས་བས་སྔོ་བྱུང་། །
ཡུན་འདྲིས་དུང་བའི་གཅེས་ལོ། །
འཕྲད་པའི་སྣང་བ་ཚོར་བྱུང་། །
དབྱར་དགུན་རིམ་བཞིན་འཁོར་སོང་། །
དུས་ཚིགས་དཔྱིད་ལ་སླེབ་འདུག །
མ་མཇལ་ཟླ་ཞག་རིང་བའི། །
ཆུང་འདྲིས་མཇལ་སྙིང་འདོད་བྱུང་། །
༼ སྙན་རྐང་གླིང་། ༽