སྤང་མེ་ཏོག་མཛེས་པས་མཐོང་རྒྱ་བསྐྱེད་སོང་། །
ཆབ་ཆུ་བོའི་མགྲིན་དབྱངས་རྣ་བར་སྙན་སོང་། །
གནས་སུམ་རྩེན་རི༷་ཡི་ཐང༷་གཞུང་དེ་ན། །
འབྲོག་ཕ་ཁྱིམ་ཕྱུགས་ཟོག་གཡང་གིས་བསྲུངས་ཡོད། །
ལྷད་མ་འདྲེས་རང་བྱུང་སྐྱེད་ཚལ་ཉམས་དགའ། །
སྤང་གཡུ་གཞུང་མེ་ཏོག་འཛུམ་གྱིས་གྲོལ་དུས། །
ལག་མཐུན་སྦྲེལ་ཨ་ལུང་མདུད་པས་བསྣོལ་བའི། །
དེང་གསར་བུ་གསར་མོའི་རྩེ་དགོད་ལྷང་ལྷང་། །
འབངས་སྤྱི་ཚོགས་འཚོ་བའི་བདེ་སྐྱིད་གཞུག་དགོས། །
ནང་བྱམས་བརྩེའི་ཆུ་རྒྱུན་དྭངས་མོ་ཡིན་དགོས། །
ཕ་མེས་པོའི་མཛད་འཕྲིན་ཡང་ནས་བསྒྲེང་དགོས། །
དེང་སྤྱི་ཚོགས་གསར་པའི་འགྲོ་སྟངས་ཤེས་དགོས། །
ཚིག་སྡེབ་ལེགས་དཀྱིལ་གྱི་སྙན་པ་མཐའ་དག །
ངག་མགྲིན་པའི་དབྱངས་ལ་ལན་ཅིག་འཁྲུངས་པས། །
མ་འཇོ་སྒེག་བུ་མོའི་ལང་ཚོ་མཛེས་པ། །
ཡིད་དྲན་ཤེས་ཡངས་མོའི་ཀློང་དུ་སྦས་ཡོད། །
ངའི་ཕ་ཡུལ་ཁྲོ་ལྗོངས་མདོ་སྨད་ལུང་པར། །
ནང་ཤེས་པའི་མེ་ཏོག་འཛུམ་གྱིས་གྲོལ་བའི། །
མཁས་དཔྱོད་ལྡན་སྐར་མའི་གྲངས་ལ་མོད་པ། །
དཔྱིད་དཔལ་ཡོན་རྒྱས་དང་རྩེ་ཐང་ཕེབས་སོང་། །
ས་འདི་ན་མར་ཁུའི་མཚོ་མོ་འཁྱིལ་ཡོད། །
སྡེ་འདི་ན་རླུང་རྟའི་ཁ་གཡང་དར་ཡོད། །
ས་མདོ་སྨད་བཀྲ་ཤིས་དགའ་ཚལ་ཆོས་གླིང་། །
རྗེས་གྲུབ་པ་ཐོབ་པའི་སེམས་དཔའ་མང་ངོ་། །
གནས་བྱིན་ཆགས་མིག་གི་མཛེས་སྡུག་དངོས་མ། །
ས་སྒང་གཞུང་འཛིན་མའི་གཞུང་ལ་ཕེབས་དང་། །
ཡིད་དགའ་བདེའི་ཚོར་བས་སྐྱིད་སྐྱིད་གནང་ཆོག །
སྤང་མེ་ཏོག་ཁུག་ནས་གུང་སེང་གཏང་ཆོག །
གནས་འདི་ན་འཚོ་བའི་ལོ་ཏོག་སྨིན་ཡོད། །
རི་འདི་ན་བརྩེ་བའི་ས་བོན་བཏབ་ཡོད། །
དུས་སྐྱེ་བ་འདི་ཡི་གཏམ་རྒྱུད་སྣ་ཚོགས། །
ནང་ཚོར་བས་བརླན་ཏེ་རི་མོར་ངས་ཕབ། །
༼ ཁམས་ཟླ་སྲས། ༽