རྒྱལ་ན་ཕྲག་དོག་རྒྱབ་འགལ་བྱེད་པའི་ཚུགས་མེད།།
ཕམ་ན་མཐོང་ཆུང་འཕྱ་སྨོད་བྱེད་པའི་སྲོལ་དབུལ།།
བུ་ལ་སེམས་རྩ་གཅིག་ཏུ་གཏད་པའི་མ་ཡིས།།
ཡོད་ཚད་བློས་བཏང་བྱེད་པའི་ཚུལ་ལ་འདུད་དོ།།
འཛུམ་ཆུང་ཟླ་བའི་འོད་སྣང་ཞན་པའི་ཨ་མ།།
འབྱུང་བཞིའི་མེ་ཏོག་རི་ནས་དུབ་པའི་ཨ་མ།།
ན་ཚོད་ལྕི་འདམ་ལྷས་ནས་བསེད་པའི་ཨ་མ།།
དབུ་སྐྲ་ཁ་བའི་འདབ་མར་འཁུ་བའི་ཨ་མ།།
ཇི༵་ཙམ་རྒས་ཀྱང་དེ་ཙམ་བཟང་བའི་ཨ་མ།།
ཇི༵་ཙམ་གཉོམ་ཡང་དེ་ཙམ་དཔའ་བའི་ཨ་མ།།
ཇི༵་ཙམ་འདྲིས་ཀྱང་དེ་ཙམ་མཐུན་པའི་ཨ་མ།།
ཇི༵་ཙམ་གཤེ་ཡང་དེ་ཙམ་བྱམས་པའི་ཨ་མ།།
འཇམ༵་པའི་ངག་སྒོ་སྙན་པ་འཕྱོ་བའི་ཨ་མ།།
འཇམ༵་པའི་ཕྱག་གིས་བུ་ཆུང་སྐྱོང་བའི་ཨ་མ།།
འཇམ༵་པའི་གཤིས་ལ་ནག་ནོག་བྲལ་བའི་ཨ་མ།།
འཇམ༵་མཉེན་བརྩེ་བས་བྱིལ་བྱིལ་གནང་བའི་ཨ་མ།།
བཟ༵ང་བའི་ལས་ཀུན་ལམ་སྟོན་གནང་བའི་ཨ་མ།།
བཟ༵ང་བའི་སྨོན་ལམ་རྒྱུན་དུ་འདེབས་པའི་ཨ་མ།།
བཟ༵ང་བའི་ཤེས་རིག་གླིང་དུ་བསྐྱལ་བའི་ཨ་མ།།
བཟ༵ང་བཟང་བསམ་དཀར་ཁ་ཏ་བཤད་པའི་ཨ་མ།།
ཁ༵་སེམས་བུ་དང་བུ་མོར་དཀར་བའི་ཨ་མ།།
ཁ༵་ཞེ་གཉིས་མེད་ངང་ནས་གཅེས་པའི་ཨ་མ།།
ཁ༵་འདོན་དགེ་སྦྱོར་ལས་ལ་བརྩོན་པའི་ཨ་མ།།
ཁ༵་སང་དེ་རིང་ཤིན་ཏུ་དྲན་པའི་ཨ་མ།།
ཆུང་དུས༵་ནུ་ཞོ་ཕངས་མེད་སྦྱིན་པའི་ཨ་མ།།
དར་དུས༵་བསླུ་མེད་མཆོག་གསུམ་མཉམ་པའི་ཨ་མ།།
རྒས་དུས༵་དྲིན་ལན་གཞལ་མཐའ་བྲལ་བའི་ཨ་མ།།
དུས༵་གསུམ་བུ་ལ་དཔུང་གཉེན་བྱེད་པའི་ཨ་མ།།
སྐྱིད་དུས་དགོད་སྒྲའི་ཁུད་ན་ལྡེམ་པའི་ཨ་མ།།
སྡུག་དུས་མིག་ཆུའི་ཀློང་ན་འཁྱིལ་བའི་ཨ་མ།།
འཁོར་བའི་རྣང་མར་དྲོད་སྣང་འདྲེན་པའི་ཨ་མ།།
འཇིག་རྟེན་མུན་པ་ཕྲིལ་གྱིས་སེལ་བའི་ཨ་མ།།
༼ གངས་ཆབ་ལྷ་སྲས། ༽