སློབ་གྲྭར་ཆས་པའི་ལམ་བར་དུ།

ངས་རང་གི་གྲིབ་མ་ལ་གཤོག་པ་ཞིག་བྲིས།

དེ་ནི་སྙིང་ཉེ་བ་ཞིག་ཡིན་པས།

ངས་རང་ལ་མི་ཚེའི་ལེགས་སྐྱེས་སུ་ཕུལ།

ང་རང་སློབ་གྲྭར་སླེབས་རྗེས།

ལམ་བར་དུ་བྲིས་པའི་གཤོག་པ་བཞིན།

སློབ་གྲྭ་ནི་འཕུར་འདོད་ཀྱིས་བྲེལ་བའི་རི་མོ་ཞིག་སྟེ།

ལྷད་མེད་དྭངས་གཙང་གིས་བྲིས་པའི།

ཐུན་མོང་མ་ཡིན་པའི་ལོངས་སྤྱོད་ཅིག་ཡིན་པ་གཞི་ནས་ཚོར།

ལང་ཚོའི་གཟི་མདངས་རྒྱས་པའི་སློབ་གྲྭ་ནས།

ཉི་མ་དང་ཟླ་བ་མ་བྲི་པའི་སྔོན་ལ།

སྤྲིན་པ་དང་ཆར་པ་མ་བྲི་པའི་སྔོན་ལ།

ཁ་བ་དང་བུ་ཡུག་མ་བྲི་པའི་སྔོན་ལ།

སྐར་ཚོགས་དང་མཚན་མོ་མ་བྲི་པའི་སྔོན་ལ།

ཤོག་བྱ་ལྟ་བུའི་གཞོན་པའི་སྣང་བ་བཅོལ་ས་སྟེ།

ངས་མཐིང་མདོག་གི་ནམ་མཁའ་ཞིག་བྲིས་པ་ཡིན།

སློབ་གྲྭར་འགྲིམ་པའི་ལེའུ་དུ་མ་ཞིག་རྫོགས་རྗེས།

ངེས་མེད་ཀྱི་གནས་ཡུལ་གང་ཞིག་ནས།

འབྲི་ཤོག་གསར་པ་ཞིག་ཁ་ཕྱེས་ཏེ།

ངས་སླར་ཡང་ཅི་ཞིག་འབྲི་རྩིས་བྱེད་དུས།

རྒྱུ་མཚན་དང་འགྲེལ་བཤད་དམིགས་བསལ་མེད་པར།

གྲོང་ཁྱེར་དང་མི་ཚོགས་འབྲི་མི་འདོད།

གཞུང་ལམ་དང་རླངས་འཁོར་འབྲི་མི་འདོད།

ཕ་ཡུལ་དང་གཉེན་ཉེ་འབྲི་མི་འདོད།

གྲུབ་མཐའ་དང་ལ་རྒྱ་འབྲི་མི་འདོད།

ངས་སྔར་བཞིན་གཤོག་པ་དང་ནམ་མཁའ་ཁོ་ནར་འབྲི་འདོད།

དེ་ལྟ་ན། ངའི་ཕུགས་བསམ་ལ་མཐའ་མེད་པ་བཞིན།

ལག་ཏུ་ཐོགས་པའི་པིར་སྨྱུག་ལའང་ཟད་པ་མི་འདུག།

སློབ་གྲྭ་ནས་ཕྱིར་ལོག་པའི་གོམ་འགྲོས་ཀྱི་ལམ་ནས།

ངས་རང་གིས་བྲིས་པའི་ནམ་མཁའ་དང་།

དེའི་ངོས་སུ་ལྡིང་སྐོར་རྒྱག་གིན་པའི་གཤོག་པ་མཐོང་བྱུང་།

དེ་ནི་ཧ་ཅང་ཡིད་དུ་འོང་བ་ཞིག་ཡིན་ཏེ།

སློབ་གྲྭས་ཆེད་དུ་ང་ལ་གནང་བའི་ལེགས་སྐྱེས་ཡིན་འདུག།

༼ ལྷ་ཚང་ཚུལ་བསྟན། ༽