དཔྱིད།
སྡེ་ཁུ་བྱུག་སྔོན་མོ་མོན་ནས་ལོག་དུས།།
ལུས་གྲང་བ་སྐད་ཅིག་ཡུན་ལ་བཅོམ་སོང་།།
ས་བདེ་ཆེན་འཁོར་ལོའི་དཀྱིལ་ཀྲུང་འོག་ནས།།
དཔྱིད་པདྨ་འདབ་བརྒྱད་བཞད་པ་སྔ་སོང་།།
དབྱར།
རི་སྣེ་མོའི་གོས་ལྗང་ཐང་ལ་གདལ་དུས།།
བྲག་གཟར་མོའི་ལེབ་ཁ་གཡང་ལ་བརྒྱུས་ཡོད།།
ཆར་ཟམ་ཟིམ་རྟེན་འབྲེལ་གྲོགས་ལ་བཀུག་ནས།།
དབྱར་ཕ་མ་འདྲ་བོ་བརྩེ་བས་འཚོས་ཡོད།།
སྟོན།
གསེར་སེར་པོའི་ལོ་མ་རླུང་གིས་སྐྱོད་དུས།།
གངས་དཀར་པོའི་ཁ་དོག་ལྷད་ཀྱིས་ཁྱེར་སོང་།།
ངག་བདེ་མོའི་དྲན་པ་གླུ་རུ་བླངས་ཡོད།།
སྟོན་སེར་པོའི་དུས་འདི་མི་རྟག་འཇའ་ཡིན།།
དགུན།
དངུལ་ཐང་ཆེན་དཀན་གཟར་གྱེན་དུ་འགྲེང་དུས།།
ས་པདྨོ་སྡེ་ཆེན་ཚོམ་དུ་བཀྲམ་ཡོད།།
ལུས་གྲང་རླུང་སེམས་ཀྱི་དཀྱིལ་དུ་ཉར་ནས།།
དགུན་རྒྱ་སྟག་འདྲ་བོའི་ངར་ཁ་བཙན་སོང་།།
༼ ཨ་འཛི་བཟའ་ཕྱུག་སྒྲོན། ༽