སྙན་ཚིག་མེ་ཏོག་འཁོར་བའི་ཚལ་དུ་བཤམས། །

དཀར་དམར་སྣ་ཚོགས་མིག་གི་གསོས་སུ་སྨིན། །

གྲོགས་མེད་ཁེར་རྐྱང་ལས་ཀྱི་འདུན་མ་རུ། །

རྒྱུ་སྐར་ཕྲ་ཚོམ་ཅི་བཞིན་འོད་ཟེར་བལྟམས། །

མཛའ་བའི་གྲོགས་པོ་རྒྱང་ཐག་རིང་ཞིག་ཏུ། །

བཞུད་པའི་ཉིན་ནས་མིག་གིས་མ་མཐོང་ཡང་། །

ཡིན་ཡང་སྨོན་ལམ་ཚིག་གསུམ་གྱང་རལ་ནས། །

སྐྱབས་གནས་ལྷ་ཡི་སྙན་ལ་ཡང་ཡང་ཞུས། །

ནམ་མཁའི་ཟླ་བ་དམར་ཆུང་སྙིང་གི་གསེབ། །

འཛུམ་པའི་མདངས་ལ་བཟོ་བཅོས་མ་ལྷད་པས། །

དཀར་ནག་ལས་ཀྱི་ཐང་ཆེན་སྲིད་པ་འདིར། །

ནམ་ཡང་སྙིང་ལ་སྡུག་པའི་མི་ཞིག་འཚོལ། །

གལ་ཏེ་སྙན་ཆང་ཐུགས་སུ་མ་དགྱེས་ན། །

ཚེ་སྲོག་སྒྲོན་མེའི་འོད་ཟེར་འབུལ་ཡང་ཆོག །

བདག་ཀྱང་དབྱངས་ལ་མོས་པའི་མགྲོན་པོ་ཞིག །

མི་རིང་འཆི་ལམ་བརྒལ་དགོས་སེམས་སུ་ཡོད། །

དཔྱིད་ཀའི་མཛེས་པ་ཁྲ་ཆུང་མིག་ལ་འཕྲོད། །

མཚར་སྡུག་མེ་ཏོག་གཡུ་ཡི་ཐང་ལ་བཞད། །

ང་ཡི་གདུང་སེམས་སྒྱུ་མའི་མགུར་འདི་ལ། །

བསྡེབས་ཏེ་རིག་བྱེད་ངག་གིས་སེམས་ཁམས་གསོ། །

གློ་བུར་སྤྲིན་ནག་ཅིག་གི་སྐྱེལ་མ་བཅས། །

ཕྱི་མའི་ལམ་འཕྲང་བརྒལ་དགོས་བྱུང་ན་ཡང་། །

ང་ཡི་དཀའ་སྐྱོའི་དཔུང་དང་མཉམ་འགྲོགས་པའི། །

མ་བཅོས་སྙན་ཚིག་འདབ་མ་ཅི་ལྟར་ཟགས། །