ངག་རིག་འགྱུར་ཁུག་ཟབ་མོའི་དབྱངས་རྟ་ལ། །
བརྒྱུས་པའི་དྲུག་འགྱུར་མགུལ་མའི་ཚིག་རྒྱན་གྱིས། །
ཡོངས་རྫོགས་བསྟན་པའི་དབྱིངས་ལ་ཤར་བའི་དཔྱིད། །
སྒྲ་དབྱངས་ཚངས་སྲས་དཔལ་མོར་བརྡ་ཞིག་སྟོན། །
ལྷག་བསམ་རྒྱ་ཕིབས་དཀར་པོའི་བསིལ་གྲིབ་འོག །
གཞན་ཕན་བརྩེ་བའི་མེ་ཏོག་འཐོར་ཐེངས་རེར། །
འགྲོ་རྣམས་ཕན་བདེའི་གྲུ་ཆར་ལན་ཅིག་ཕོབ། །
ཀྱེ་ཀྱེ་དབྱངས་ཅན་རྒྱ་མཚོའི་ནོར་བུ་ལགས། །
སྙན་འཇེབས་དབྱངས་ཀྱི་རྒྱུད་མངས་ཕྱག་ལ་བསྣམས། །
མཛེས་འཛུམ་མེ་ཏོག་དཀར་དམར་ཞལ་ལ་བབས། །
རྒྱལ་ཀུན་གསུང་གི་ཡུམ་གཅིག་དབྱངས་ཅན་མ། །
ལོངས་སྤྱོད་མགྲིན་པའི་རྒྱན་དུ་རྣམ་པར་མཛེས། །
ཕུལ་བྱུང་མཛེས་སྡུག་བཀྲ་བའི་སྤང་ཐང་དུ། །
དཀར་དམར་ལོ་མང་རྒྱས་པའི་ཕ་མཐའ་ནས། །
དགྱེས་ཞལ་མེ་ལོང་དྭངས་པའི་ལང་ཚོ་རུ། །
བཞད་པའི་རྐང་དྲུག་གཞོན་ནུ་མྱོས་ཏེ་སོང་། །
མཚམས་སྤྲིན་མེ་ཏོག་འགྱུ་བའི་ནམ་མཁའ་ལ། །
མཁའ་ལྡིང་གཤོག་ཟུང་ལྷེམ་ལྷེམ་འཕུར་བའི་དུས། །
ང་ཡི་ཞེ་འདྲིས་སྙིང་སྡུག་དྲན་གདུང་དེ། །
ཚིག་གི་འཕྲེད་ལ་མ་བཤམ་ཐབས་གཞན་བྲལ། །
མ་བཅོས་བརྩེ་བའི་ཆུ་མོ་ཤང་ཤང་བཞུར། །
ཞེ་འདང་ལས་ཀྱི་ཟླ་བར་འཕྲིན་ཞིག་བསྐུར། །
ཚིག་རྒྱན་འདབ་བརྒྱ་པ་ཡི་རྩེ་གཞུང་ནས། །
མཁས་རྒུའི་ཡིད་འཕྲོག་རིག་བྱེད་དབྱངས་ལ་གསོན། །
སྣང་བ་རླུང་གིས་ཁུར་བའི་བས་མཐའ་ནས། །
ཁྱོད་ཀྱི་འཛུམ་དཀར་ཡིད་ལ་འཆར་ཐེངས་རེར། །
དགོང་སྔོན་ཉི་ཟླའི་མཛེས་པ་མཐའ་དག་ཀྱང་། །
ཁྱོད་ཀྱི་དཔེ་རུ་བཀོད་པ་ཡུལ་ནས་འདས། །
འདི་ཡི་སྙན་གཞུང་རིག་པའི་ཁ་སྒོ་ནས། །
མཆིད་པའི་གཟུགས་རིས་སྙིང་ལ་རྡབ་ཞོར་དུ།
ཁྱོད་ཀྱི་འཇིག་རྟེན་འདི་ཡི་ནམ་མཁའ་ལ། །
འཕུར་བའི་ཕོ་རྒོད་ང་ཡི་བསོད་ནམས་ཡིན། །