སྟག་ཤར་དཔལ་རྩལ་ངོམས་པའི་རྩེ་ཐང་ཞིག་ནས། །
རྨ་བྱའི་སྒྲོ་གུར་ཕུབ་པའི་སྡེ་ཆེན་མཛེས་མ། །
བག་མེད་རྣམ་གཡེང་འཁྲུལ་འཁོར་རྒྱང་ལ་དོར་ཏེ། །
དབྱངས་གསལ་མེ་ཏོག་འཐུ་བར་སྤྲོ་བ་སྐྱེད་དང་། །
ལྷ་སྐུར་མཇལ་ཁ་ཞུ་བའི་མཆོད་ཁང་ནང་དུ། །
སྣང་གསལ་མར་མེ་བསྒྲོན་པའི་པད་གདན་སྟེང་ནས། །
མེས་པོའི་མཛད་འཕྲིན་སེམས་ཀྱི་གཏིང་ལ་ཉར་ཏེ། །
ཕ་སྐད་གསེར་གྱི་ཨ་ལོང་དམ་དུ་སྦྲེལ་རོགས། །
སྙན་གླུ་ངག་གི་ཟིལ་བ་རྒྱང་ནས་བཀུག་པའི། །
ལ་ཐང་སྡེ་བའི་གྲོང་གི་ན་ཆུང་མེ་ཏོག །
ཚན་རྩལ་དེང་རབས་ཅན་གྱི་འཇིག་རྟེན་འདི་ལ། །
སྲོལ་རྒྱུན་གཤིས་ལུགས་མ་དོར་ཕ་བཟང་བུ་མོ། །
ལང་ཚོའི་འཇའ་ཟམ་བརྒྱུས་པའི་རི་སྒང་དེ་ནས། །
མཛེས་སྡུག་རྒྱན་ཆ་སྤུད་པའི་འབྲོག་མོ་རྣམ་དག །
གཡང་གི་ནོར་ལ་བདག་གཉེར་གང་ལེགས་བྱོས་དང་། །
འཚོ་བའི་སྦྲ་ནག་ནང་ལ་མར་ཆུར་ལྟེམས་ཡོད། །