འཁོར་བའི་འགན་འཁྲི་ཕྲག་ལ་མ་བབ་པར།།
ཆགས་ཞེན་སེམས་ཀྱི་ངལ་བས་མ་གཙེས་པའི།།
བྱམས་བྱམས་བརྩེ་བས་ཀུན་གྱིས་སྐྱོང་བའི་དུས།།
ཆུང་ཆུང་བྱིས་པའི་དུས་ན་སྐྱིད་ཅིག་འདུག།
རང་གཤིས་ཤེལ་དཀར་མེ་ལོང་དྭངས་པ་དང་།།
རང་སེམས་ཁ་བཏགས་དཀར་ལ་འཇམ་པ་ཡི།།
རང་སྣང་གང་ཤར་རྩེད་མོར་གཡེང་བའི་དུས།།
ཆུང་ཆུང་བྱིས་པའི་དུས་ན་སྐྱིད་ཅིག་འདུག།
བྱིས་པའི་ལང་ཚོ་ཆུ་སྐྱེས་དཀར་དམར་ཡིན།།
བྱིས་པའི་སེམས་པ་དྭངས་གཙང་ལྷད་མེད་ཡིན།།
བྱིས་པའི་མི་གཤིས་ལྷན་སྐྱེས་ངོ་མ་ཡིན།།
བྱིས་པ་སེམས་ཀྱི་གཅེས་ས་སྐྱོང་ས་ཡིན།།
བྱིས་པ་ཕ་མའི་སེམས་ཀྱི་རེ་བ་ཡིན།།
བྱིས་པ་དགེ་རྒན་བཟང་པོའི་རེ་བ་ཡིན།།
བྱིས་པ་མི་རིགས་ཤིག་གི་རེ་བ་ཡིན།།
བྱིས་པ་རྒྱལ་ཁབ་ཅིག་གི་རེ་བ་ཡིན།།
བྱིས་པ་རྣམ་པ་བློ་རིག་བཀྲ་བ་དང་།།
བྱིས་པ་རྣམ་པ་བདེ་ཐང་ཡོང་བ་དང་།།
བྱིས་པ་རྣམ་པ་ལང་ཚོ་རྒྱས་པ་དང་།།
བྱིས་པ་རྣམ་པ་གང་བསམ་དོན་གྲུབ་ཤོག།
༼ རྡོ་རྗེ་ཐར་ལམ། ༽