མེ་ཏོག་སྣ་མང་བཞད་པའི་གུར་ཁྱིམ་ན། །
ཕྱེ་ལེབ་སྒེག་མོས་གཤོག་གླུ་སྙན་ཞིང་འཇེབས། །
དགའ་བདེ་ལོངས་སྤྱོད་འཛོམས་པའི་དབྱར་ཁའི་དུས། །
དྲུག་གཅིག་བྱིས་པའི་དུས་ཆེན་བསུ་བར་བྲེལ། །
ཀ་ཁའི་གདངས་དབྱངས་སྙན་མོ་ངག་ལ་གྱེར། །
དབྱངས་གསལ་ཚིག་གི་མེ་ཏོག་མགུལ་ལ་བཏགས། །
ཤེས་རིག་གསེར་གྱི་ས་གཞི་ཡངས་མོ་ནས། །
ཡིད་འོང་ན་ཆུང་བྱིས་པའི་དུས་ཆེན་བསུ། །
དགའ་བའི་བྲོ་འཁྲབ་སྐྱིད་ཀྱི་གླུ་དབྱངས་ལེན། །
དམུལ་བའི་འཛུམ་ཡག་དགོད་པའི་སོ་ཕྲེང་དཀར། །
སྤྲོ་སྣང་སྟོང་གིས་བཞེངས་པའི་དུས་ཆེན་ཏེ། །
དྲུག་གཅིག་བྱིས་པའི་དུས་ཆེན་སེམས་པས་གཅེས། །
ཡུན་རིང་གཉེར་བའི་རྨི་ལམ་དམར་པོ་ཞིག །
ཉི་ཟེར་བཞིན་དུ་དེ་རིང་ཚེས་པའི་དུས། །
སྤྲོ་བ་ཀུན་འཕེལ་ན་ཆུང་བྱིས་པ་ཚོ། །
ཚེ་གཅིག་ཤེས་རབ་ཕ་རོལ་ཕྱིན་པར་སྨོན། །
ཤེས་རིག་མེ་ཏོག་ལྡེམ་པའི་སྐྱེད་ཚལ་ན། །
གནས་ལྔའི་འདབ་མ་རྒྱས་པའི་པདྨོ་ལས། །
ལེགས་གསུང་བཅུད་ལེན་ན་ཆུང་བྱིས་པ་ཚོ། །
རྟག་ཏུ་ཤེས་རབ་ལྷ་ཡིས་བྱིན་རླབས་སྩོལ། །
ཤིན་ཏུ་རྒྱ་ཆེ་འཛམ་གླིང་འཛིན་མའི་ཁྱོན། །
རུས་ལ་རིགས་ཀྱི་རྐང་མར་འཁྱིལ་བ་ཡི། །
རིགས་ཀྱི་རེ་བཞག་ན་ཆུང་བྱིས་པ་ཚོ། །
རང་གཞན་སྐད་ཡིག་མ་ལུས་ཆུད་པར་ཤོག །
མཚར་སྡུག་ལང་ཚོའི་མེ་ཏོག་རབ་རྒྱས་ཤིང་། །
སྙན་འཇེབས་ངག་ལ་བདེན་པའི་གཏམ་གྱིས་བྱུགས། །
བློ་གསལ་བློ་ལྡན་ན་ཆུང་བྱིས་པའི་ཚོམས། །
མ་འོངས་འདུན་མ་ལྷུན་གྱིས་འགྲུབ་པར་ཤོག །
བྱིས་དུས་ས་བོན་ལེགས་པ་ཅི་བཏབ་པས། །
གཞོན་དུས་མཛེས་པའི་འཁྲི་ཤིང་བླ་ན་མཐོ། །
རྒས་དུས་ལྗོན་པའི་འདབ་ལག་རབ་ཏུ་རྒྱས། །
རེ་བའི་ས་བོན་ཐོབས་ཤིག་ན་ཆུང་ཚོགས། །
ཀཱ་ལི་སུམ་ཅུའི་སྒྲ་དབྱངས་སྙན་པ་ཡི། །
ཁ་བའི་ལྗོངས་ཞེས་མཆོག་ཏུ་གྱུར་པ་དེར། །
ག་ལེར་སློབ་ལ་བརྩོན་པའི་ན་ཆུང་རྣམས། །
ང་ཡིས་སེམས་ནས་ཚིག་འདི་རིང་ནས་ཕུལ། །
༼ སྨྱུག་ཞེན། ༽