སྐད་ཡིག་མུན་སེལ་གྱི་བདག་པོ་རྣམ་པ།།
མེས་པོའི་ཤུལ་འཛིན་གྱི་ལྕམ་སྲིང་རྣམ་པ།།
རང་སེམས་རྣམ་དག་གི་མེ་ལོང་ངོས་སུ།།
ཡུལ་སྲོལ་གོམས་གཤིས་ཀྱི་རི་མོ་ཕྲིས་དང་།།
དེ་རིང་ཕྲན་ཆུང་གིས་བསམ་པ་དག་པས།།
གསར་སྐྱེས་མེ་ཏོག་གི་ཚ་བོ་ཚ་མོར།།
བཀྲ་ཤིས་ཁ་བཏགས་ཀྱི་བརྩེ་གླུ་སྙན་མོས།།
དྲུག་གཅིག་དུས་སྟོན་ལ་རྟེན་འབྲེལ་ཞུ་འོ།།
ལང་ཚོ་འཇའ་ཚོན་ལྟར་མཛེས་ཤིང་སྡུག་ཅིང་།།
ནང་སེམས་ནམ་མཁའ་བཞིན་དྭངས་ཤིང་གསལ་བའི།།
ཤེས་རིག་ཕུན་ཚོགས་ཀྱི་སློབ་གྲྭའི་གླིང་ནས།།
ཀ་ཁའི་དབྱངས་རྟ་དེ་དཀྲོལ་མཚམས་མ་འཇོག།
གཞན་སྐད་བཤད་པ་དེ་རྒྱན་དུ་བྱེད་ཅིང་།།
རང་སྐད་ཚེ་སྲོག་བཞིན་གཅེས་ཤིང་བཀུར་བའི།།
ཕ་སྐད་མ་ཡིག་གི་རྟེན་གཞིར་གྱུར་བའི།།
བྱིས་པ་ཆུང་ཆུང་ཚོ་ཚེ་རིང་ནད་མེད།།
ཕ་མ་རྒ་རྒས་ཚོའི་དཔྲལ་བའི་མིག་ཟུང་།།
དགེ་རྒན་དམ་པ་ཚོའི་རེ་བའི་རྒྱབ་རྟེན།།
རང་རིགས་སྤུན་ཟླ་ཡི་ཕ་ཤུལ་སྲུང་བའི།།
རིགས་ཀྱི་ཁྱེའུ་ཚོར་སྤྲོ་སེམས་འཕེལ་ཤོག།
དབྱར་ཟླ་དྲུག་པ་ཡི་མཚར་སྡུག་ཀློང་ནས།།
ཞལ་རས་དགའ་སྤྲོ་ཡིས་བརྟས་པའི་བྱིས་པ།།
ཕ་མེས་ཡབ་མེས་ཀྱི་རྗེས་སུ་སྙེག་བཞིན།།
དྭངས་གཙང་སེམས་པ་ལ་རྙོག་པ་མེད་ཤོག།
དྲིན་ཆེན་ཕ་མ་ཚོའི་པང་ནས་སོན་ཞིང་།།
རྩེད་ར་གྲུ་བཞི་ལ་སེམས་པ་གླན་པའི།།
ན་ཆུང་བྱིས་པ་ཚོའི་ལུས་དང་སེམས་སུ།།
མི་འདོད་རྐྱེན་ངན་གྱི་བར་ཆད་མེད་ཤོག།
དུས་ཚོད་ངེས་མེད་ཀྱི་ཁུག་ཀྱོག་རེ་ནས།།
མུན་པའི་ཚེ་སྲོག་ལ་འོད་སྣང་སྩོལ་ཞིང་།།
ཤེས་བྱ་མེ་ཏོག་གི་སྦྲང་རྩི་འཐུང་བའི།།
བློ་གསར་གཞོན་ནུ་ཚོར་ཤེས་རབ་འཕེལ་ཤོག།
ཤ་ཞེན་རུས་དུངས་ཀྱི་སྙིང་རྩ་སྒྲིམ་ཞིང་།།
ཡ་རབས་སྤྱོད་བཟང་གི་བློ་མིག་འཁྲུངས་པའི།།
ཁ་དཀར་གཞུང་དྲང་གི་བུ་ཕྲུག་རྣམས་ལ།།
ཁ་དགེ་བཀྲ་ཤིས་ཀྱི་སྨོན་ལམ་བཏབ་ཡོད།།
༼ འོད་འཛིན་མ། ༽