དྭངས་གཙང་ཁོར་ཡུག་བརྗིད་ཆགས་ཤིང་། །
འཛུམ་མདངས་ཚོན་གྱིས་མ་ལྷད་པའི། །
མ་འོངས་རིགས་ཀྱི་བདག་པོ་ཚོ། །
ཕ་སྐད་མ་ཡིག་བརྩི་བསྲུང་དགོས། །
འདི་ན་དྲིན་ཆེན་ཕ་མ་ཟུང་། །
དཀའ་སྡུག་འཚོ་བར་འབད་འབུངས་ཀྱིས། །
ཁྱེད་ཅག་མདུན་ལམ་གཞིག་གཞིགས་ནས། །
ལེགས་པའི་ལམ་སྣར་ཧུར་གྱིས་ཞུགས། །
ཕྱི་ཚུལ་བོད་གོས་སྤུས་དག་ཅིག །
གྱོན་ཏེ་མ་འོངས་མདུན་བསུས་དང་། །
མི་རིགས་ཤིག་གི་ལོ་རྒྱུས་ནང་། །
འོད་སྟོང་འཕྲོ་བའི་བྱས་རྗེས་འཇོག། །
ལྷད་མེད་མི་གཤིས་བཟང་པོ་ལ། །
གཡོ་སྒྱུས་ངན་ཤུགས་མ་ཞུགས་པར། །
ཡབ་ཡུམ་ཉི་ཟླའི་སློབ་གསོ་དག །
རྒྱང་དུ་དོར་བར་མ་མཛད་ཅིག །
དབྱངས་གསལ་མེ་ཏོག་འཛུམ་པའི་དབུས། །
ནང་གི་ཡོན་ཏན་མཐར་སོན་པར། །
ལྷོད་མེད་འབད་པ་དྲག་ཏུ་བྱོས། །
དགེ་བའི་གཤེས་ལ་དད་གུས་ཀྱིས། །
མ་འོངས་འཚོ་བའི་ལམ་ཁ་ནས། །
ཉམ་ཆུང་མི་རྣམས་བརྩེ་གཟིགས་དང་། །
ན་མཉམ་སྤུན་ལ་མཐུན་ནི་བྱོས། །
ད་གཟོད་རྒྱལ་ཁ་འཐོབ་པར་ངེས། །
ཁ་སེམས་བསམ་པ་དཀར་པོ་ཡིས། །
སྙན་ཚིག་འདི་དག་སྤྲིངས་པ་ཡིན། །
གལ་ཏེ་བདེན་པའི་གཏམ་སྙམ་ན། །
ཉམས་སུ་ལེན་དགོས་གཅེས་ཕྲུག་ཚོ། །
༼ ཁམས་ཟླ་སྲས། ༽