རྟའུ་ནི་མི་ཉག་རབ་སྒང་རིང་མོའི་སྒང་རྒྱུད་དུ་གཏོགས་ཤིང་ནས་དེའུ་ཕྱུག་མོ་ཞེས་རི་བོ་མཛེས་ཤིང་ནགས་ཚལ་ཚང་ཚིང་འཁྲིགས་པ་དེའི་རི་འདབས། གཤིས་ཆུ་དལ་འབབ་རིང་མོ་ལྷུང་ལྷུང་དུ་འབབ་པའི་གཡས་གཡོན་ན་མུ་རིག་བསྟར་ལ་བརྒྱུས་པ་བཞིན་ལྷུན་ཆགས་ངང་གནས་ཤིང་ཆགས་ཡོད་པ་ཡིན། ཡུལ་གྲུ་དེ་ག་ནས་སྡོད་ཁང་འཛུགས་སྐྲུན་གྱི་ལག་རྩལ་ནི་བོད་ཁམས་ཡོངས་སུ་མཐོང་དུ་མེད་པའི་ཁྱད་ཆོས་འབུར་ཐོན་གྱི་འཛུགས་སྐྲུན་ལེགས་པོ་ཞིག་ཡིན། འཛུགས་སྐྲུན་གྱི་ལག་རྩལ་ནི་ཡུལ་འདི་གའི་སྔོན་བྱོན་མེས་པོ་དག་གིས་དཀའ་སྤྱད་ཀྱི་བརྩོན་པ་དང་བློ་དང་རིག་པའི་འཆར་སྒོ་ལས་མེད་པ་ནས་ཡོད་པ་དང་། ཡོད་པ་ནས་ཕུན་སུམ་ཇེ་ཚོགས་སུ་བཏང་སྟེ་ད་ལྟའི་ཕྱི་ནང་གང་ལ་བལྟས་ན་བཟོ་བཀོད་ཕུན་སུམ་ཚོགས་པའི་སྡོད་ཁང་འདི་བྱུང་བ་རེད། འདི་ནི་བོད་ཀྱི་གནའ་བོའི་བཟོ་བཀོད་ཀྱི་ལག་རྩལ་དང་རྒྱུ་ཆ་ནང་བཞིན་རྡོ་དང་ས་ལ་བརྟེན་ནས་ཕྱི་ཡི་བཟོ་བཀོད་གྲུབ་ཅིང་། ཤིང་གིས་ཀ་བ་གདུང་མ་ལ་སོགས་ནང་གི་བཟོ་བཀོད་མ་ལུས་འགྲུབ་པར་བྱེད་དགོས་ལ། གནམ་སྒྲོག་དང་ས་སྒྲོག་བརྒྱབ་སྟེ་སྲ་ཞིང་མཁྲེགས་ལ་བརྟན་ཞིང་བརླིང་བའི་ངོ་བོར་གྲུབ་པས་ས་འགུལ་སོགས་རང་བྱུང་གི་གནོད་པ་འགོག་པར་ཐུན་མིན་གྱི་ཆ་རྐྱེན་ཧ་ཅང་བཟང་པོ་ལྡན་ཡོད་པ་རེད། ཁང་པའི་ཕྱི་ངོས་ཀྱི་རྩིག་པར་ས་དཀར་པོའི་མདོག་སེར་ཞེད་ཅན་གྱི་ཚོན་མདངས་བྱུགས་པ༼ དུས་རབས་འཕེལ་རྒྱས་ཀྱི་འགྲོས་དང་བསྟུན་ནས་ཕྱི་ཡི་རྩིག་པ་ནི་རྩིག་རྡོ་ཆེན་པོ་རེ་རེའི་བར་དང་གསེང་ལ་རྡོ་གཡའ་མ་ཆུང་ཆུང་གིས་ཁྲ་བརྒྱབ་སྟེ་མཐའ་བཞི་རུ་རྒྱ་ནག་ལྕགས་རི་སོགས་མཛེས་རིས་ཀྱིས་བརྒྱན་པའི་རྣམ་པ་ཞིག་ཀྱང་ཆགས་ཀྱིན་འདུག ༽ དང་། ཐོག་བརྩེགས་ཕལ་ཆེར་གཉིས་རེ་ཅན་ཡིན་ལ་ཐོག་བརྩེགས་གཉིས་པའི་སྟེང་ན་རབ་གསལ་ལམ་ཉི་ར་ཡོད་པས་ཁོད་ཡངས་ལ་ཁམས་དྭངས་པའི་སྣང་བ་ཞིག་ཀྱང་ངང་གིས་སྟེར་སྲིད། ཐོག་བརྩེགས་དེའི་སྟེང་དུ་སྐུ་གསུང་ཐུགས་རྟེན་བཞག་སའི་མཆོད་ཁང་དང་། ཟས་གཡོ་སྦྱོར་བྱེད་སའི་ཐབ་ཚང་། མགྲོན་པོ་སྣེ་བྱེད་སའི་མགྲོན་ཤག་སོགས་ཀྱི་བཀོད་སྒྲིག་ཡོད་པ་ཡིན། ནང་གི་བཟོ་བཀོད་ཡོངས་རྫོགས་ནི་ཤིང་གིས་གྲུབ་དགོས་པས་ཤིང་ཆའི་རིགས་ནི་རྟའུ་སྡོད་ཁང་འཛུགས་སྐྲུན་ལ་མེད་དུ་མི་རུང་བའི་ཆ་རྐྱེན་གཙོ་བོ་དེ་ཡིན། རྟའུ་ཡུལ་གྲུའི་རི་ལུང་ཀུན་ཏུ་གསོམ་སྡོང་དང་ཤུག་སྡོང་སོགས་ལྗོན་ཤིང་རིགས་ཀྱིས་ནགས་ཚལ་སྟུག་པོ་འཁྲིགས་ཡོད་པས་རྟའུ་སྡོད་ཁང་གི་འཛུགས་སྐྲུན་ལ་ཆ་རྐྱེན་ཐོག་མའང་དེ་ནས་འཛོམས་ཡོད་པ་རེད། ཁང་པའི་ནང་གི་པང་ལེབ་དང་མཆོད་ཁྲི། གནམ་རྒྱན། ཉལ་ཁྲི། ཅོག་ཙེ་སོགས་བོད་ཀྱི་ཐུན་མིན་གྱི་བཟོ་རིགས་ལག་རྩལ་གྱིས་བཀྲ་ཤིས་པའི་རི་མོ་དང་། གཅན་གཟན། རི་དྭགས། ཡུལ་ལྗོངས་སོགས་ངོ་མཚར་བའི་རི་མོ་མང་པོ་འབུར་བརྐོས་དང་། དྲས་བརྐོས་སོགས་ཀྱི་རྣམ་པས་བཟོ་བསྐྲུན་བྱས་པ་ཡིན་པས་ཕུན་སུམ་ཚོགས་པའི་སྒྱུ་རྩལ་གྱི་རྣམ་པ་ངང་གིས་དོད་འདུག་ལ། སྒོ་དང་སྐར་ཁུང་། ཀ་གདུང་སོགས་སུ་ཤིང་མཚོན་པས་ཚོན་བྱུགས་པ་དང་མཛེས་རིས་སོགས་བྲིས་ཏེ་ངོ་མཚར་སྟོང་གིས་བརྒྱན་ཤིང་རི་མོ་དེ་དག་གསོན་ཉམས་ལྡན་པ་ཞིག་ཏུ་གྱུར་ཡོད་པ་སོགས་ལས་རྟའུ་ཡི་སྡོད་ཁང་ཞེས་པའི་མཚན་གྱི་སྙན་པའང་དོན་ལ་གནས་པ་ཞིག་ཏུ་འཁུམས་འདུག་གོ།།

( ཨོ་རྒྱན་དོན་གྲུབ་ཀྱིས་བྲིས། )