ལབ་རྩེ་ཁ་བས་གཡོག་པའི་ཕྱི་དྲོ་ཞིག་ལ། །
ཞེ་སེམས་ཙག་གིས་བསྡམས་པའི་དགུན་ཁ་ཞིག་ལ། །
དྲན་གདུང་སྨེང་གཞས་བཀུག་པའི་ཕལ་བ་ཞིག་གི། །
འདང་བརྩེ་འོ་མཚོར་བཞུགས་པའི་ཉི་ཟླ་སྐར་གསུམ། །
མི་ཚོགས་འ་འུར་ཡིན་པའི་རི་གྲོང་ཞིག་ན། །
ལྷིང་འཇགས་གུ་ཡངས་འཚོ་བའི་གནས་མལ་ཞིག་ན། །
ངག་རིག་དྲིལ་ཆུང་རྡུང་བའི་མི་རྐྱང་འཁྱམས་པོའི། །
འཚོ་བའི་ཉིན་སྲིབ་བཞུགས་པའི་ལྷ་མོ་ཁྱེད་ལ། །
ལང་ཚོའི་མེ་ཏོག་རྩྭ་ཐང་དཀྱིལ་དུ་བཞད་ཡོད། །
རེ་བའི་སྨོན་ལམ་ཡིད་ཀྱི་ཟབ་སར་འཁྲུངས་ཡོད། །
གཡོ་མེད་དད་འདུན་སྤྱི་བོའི་ཐོང་ག་དེ་ནས། །
ནམ་དུ་འབྲལ་བ་མེད་པས་བློ་སེམས་བདེ་ཆོག །
དགའ་མའི་གཟུགས་སུ་ཆགས་པའི་སེམས་པ་མ་ཐུལ། །
རེ་བའི་མེ་ཏོག་འཐུ་བའི་ལས་ཀར་རྔམས་སོང་། །
དྭངས་གསལ་མཚོ་ཡི་འདབས་ནས་ངང་བ་ཁྱོ་ཤུག །
ང་ཡི་ཕུགས་འདུན་ཁུར་ཏེ་རྒྱང་ལ་འཕུར་སོང་། །
རྗེས་ཆགས་ཉམས་བརྒྱ་གྲོལ་བའི་བརྩེ་དགའི་ལྷ་མོ། །
མ་དག་འཁྲུལ་བའི་ཀློང་ནས་ཕྱི་མིག་གནང་དང་། །
གཡུང་མོའི་རི་དྭགས་ཚོགས་ཀྱི་གྲལ་འགོ་དེ་ན། །
སྣང་བ་དབྱངས་ལ་བརྒྱུས་པའི་གཡུ་སྦྲང་ཞིག་གིས། །
འདི་སྣང་འཇའ་ཚོན་བཀྲ་བའི་ན་སྤང་མཚམས་སུ། །
ནོར་ནག་ལྷས་ལ་འཁོར་བའི་ཕྱི་དྲོ་ཞིག་ལ། །
འབྲོག་མོ་ཨ་ཅེ་ལྷ་མོ་དགྱེས་འཛུམ་ངང་དུ། །
འཚོ་བའི་དོན་དུ་བརྒྱུགས་པར་ཕྱི་མིག་ཤོར་སོང་། །
འཛུམ་གྱི་པདྨོ་ཡག་པ་བརྗེད་ཐབས་མ་བྱུང་། །
འཁོར་བའི་དགའ་བདེ་མྱོང་འདོད་ཆེ་བས་ཅི་ཡིན། །
ལུས་ལ་བརྒྱན་པའི་གོས་ཆེན་རིང་མོ་དེ་ཡང་། །
ང་ཡི་མིག་གི་མདུན་ནས་ཡལ་ཐབས་མེད་ཀི། །
ངེས་གཏན་རང་དབང་མེད་པའི་འཇིག་རྟེན་འདི་ནས། །
འཚོ་བར་སྙིང་བོ་མེད་པའི་དགའ་སྐྱོའི་གླེགས་ནས། །
གང་གི་ལྷ་མོ་ཁྱེད་ཀྱི་ཞབས་པད་དྲུང་དུ། །
བདག་གི་ཡོད་ཚད་ཕུལ་ཏེ་མཇལ་ཁ་ཞུས་ཡོད། །
མི་ཚེ་ཉི་འོད་འདྲ་སྟེ་སྐད་ཅིག་ཙམ་དུ། །
མཚར་སྡུག་ལང་ཚོའི་ཁེངས་ཡང་བསྟུན་མར་གཟིམ་འགྲོ། །
དེ་བས་སེམས་ལ་ཉར་བའི་གསང་གཏམ་མཐའ་དག །
ཁྱོད་ལ་གླེང་རན་བྱུང་བའི་སྐབས་སུ་བབ་ཡོད། །
མཚམས་སྤྲིན་སེར་པོའི་འོག་ཏུ་ཏིང་འཛིན་ངང་དུ། །
མཉམ་བཞག་སྒོམ་གྱི་གནད་ལ་ཡེ་ནས་བཞུགས་སམ། །
ཡང་ན་སྐྱེད་ཚལ་ར་བའི་འཇོ་སྒེག་ནང་དུ། །
དཀར་དམར་མེ་ཏོག་བཞིན་དུ་ལྷོད་ཀྱིས་རྒྱུའམ། །
སྐྱོ་གདུང་སྨེང་བ་ཁུར་ཏེ་མདུན་དུ་སྐྱོད་ཡོད། །
རེ་བའི་དར་ཆ་སྒྲེང་སྟེ་གང་དུ་ཆས་འགྲོ། །
ངག་དབང་དབྱངས་ཅན་དགའ་མའི་ཞབས་ཀྱིས་བཅག་པའི། །
དྲུག་འགྱུར་སྒྲ་སྙན་སྒྲོགས་པའི་གཞིས་ཀ་དེ་རུ། །
ཉི་འོད་ལམ་ལམ་འཚེར་བའི་རི་སྒང་ཞིག་ཏུ། །
བསིལ་བྱེད་འཛུམ་ཆུང་ཡག་པའི་གངས་འདབས་དེ་ན། །
བརྩེ་བའི་གཤོག་ཟུང་རྒྱས་པའི་ལྷ་མོ་ཁྱེད་ལ། །
ལུས་ངག་ཡིད་གསུམ་དང་བཅས་ཕུལ་བ་ལེགས་ན། །
༼ ཁམས་ཟླ་སྲས། ༽