དྲི་བྲལ་དྭངས་པ་ཡངས་པའི་དཀྱིལ་འཁོར་རྒྱུ་སྐར་
ལམ་གྱི་སྐྱེད་ཚལ་ན། །
རབ་མཛེས་འཛུམ་པའི་མཉེན་ལྕུག་སྒེག་ལྡན་ཚངས་
སྲས་ལྷ་མོ་པདྨའི་མདངས། །
ཡིད་རབ་འཕྲོག་པའི་དཀར་གསལ་ཞལ་རས་གེ་སར་
ཟིལ་མངར་བཅུད་དུ་སྨིན། །
ལུས་ཟུངས་རྒྱས་ཤིང་ཆགས་པས་མྱོས་པའི་བུང་བ་ང་
ཚོས་ཁྱོད་ཉིད་རོལ། །
སྐུ་ནི་བརྗིད་པ་བགྲེས་རྒུད་བྲལ་ཞིང་ན་ཚོད་བཅུ་དྲུག་
ལོན་པའི་ཚུལ། །
ཞལ་ནི་མཛེས་པ་ཉ་གང་ཟླ་བ་ནམ་མཁའི་མཐོངས་སུ་
རྒྱུ་བ་བཞིན། །
ཚེམས་ནི་དཀར་བ་འོད་ཀྱི་ཐིག་ལེ་འཛིན་མའི་ཁྱོན་
ལ་འཕོས་དང་མཚུངས། །
མཆུ་ནི་དམར་བས་ཡིད་སེམས་འཕྲོག་ཅིང་ཆགས་
ལྡན་ཚོགས་ཀྱིས་ཁྱོད་ཙམ་དྲན། །
ཆོས་དབྱིངས་སྐྱེ་མེད་ཡང་དག་སྨྲ་བའི་སྙན་འཇེབས་
གསུང་ནི་རྫིང་བུ་སྟེ། །
རྙོག་པ་མེད་ཅིང་དྭངས་ཤིང་གཙང་བ་རྡུལ་མེད་སྒྲིབ་
བྲལ་དག་ཅིང་གཙང་། །
གཉིས་སྐྱེས་ཚོགས་རྣམས་ཁྲུས་ལ་འཇོག་ཅིང་བདེ་
དགའི་གནས་ལ་འཁྲིད་མཛད་མའི། །
གསུང་གི་ཆེ་བ་ཟུར་ཙམ་བསྔགས་པའི་ཚིག་མདུད་བརྒྱ་
ཕྲག་ལག་གིས་དཀྲོལ། །
སྒྲིབ་མེད་ཐུགས་ནི་ཡངས་ཤིང་ཟབ་པ་མི་མངོན་ནམ་
མཁའི་མཐའ་ལ་འགྲན། །
ཇི་ལྟར་ཇི་སྙེད་གནས་ལུགས་རབ་གཞལ་མཁྱེན་གཉིས་ཉི་
ཟླའི་དཔལ་དང་མཚུངས །
མ་ལྟར་གཅེས་པའི་འགྲོ་ལ་བརྩེ་བ་མདངས་ཆགས་འོད་
ཀྱི་ཕུང་པོ་འབར། །
ཐར་འདོད་འགྲོ་བའི་མེ་ཏོག་ཚོགས་རྣམས་རབ་ཏུ་གྲོལ་
ཞིང་འདབ་ལག་རྒྱས། །
ཁྱོད་ཀྱི་སྐུ་ནི་ཕུང་པོ་མ་བརྗོད་སྒྲིབ་གཡོག་བྲལ་བའི་
ནམ་མཁའ་ལགས། །
ཁྱོད་ཀྱི་ཞལ་ནི་བཞིན་རས་མ་ཟེར་མདངས་ཆགས་ཟླ་
བ་ཞེས་སུ་གྲགས། །
ཁྱོད་ཀྱི་ཚེམས་ནི་སོ་དཀར་མ་ཟེར་ཟླ་བའི་འོད་ཐིག་ལྷུང་
བ་རེད། །
ཁྱོད་ཀྱི་སྤྱན་གཉིས་མིག་ཏུ་མ་འབོད་མེ་ཏོག་ཀུ་མུད་
ཆ་གཅིག་ཡིན། །
༼ རང་མདངས། ༽