ཉི་འོད་འཇམ་པོ་དེའི་ཁྲོད།

ཁ་བའི་འདབ་མ་མེ་ཏོག་གི་ཚུལ་གྱིས་

ལྷབ་ལྷུབ་ཏུ་བབས།

དཀྱེལ་ཡངས་པའི་རྩྭ་ཐང་དུ་བབས།

ངའི་ལག་མཐིལ་དུ་བབས།

ང་ཡི་ནང་སེམས་ལ་བབས་པས།

ངས་ཀྱང་ཁ་བར་ནང་སེམས་གླན།

བདུད་རྩི་བཞིན་རོལ་མྱོང་ཐེངས་གཅིག་བྱས།

བར་སྐབས་ཤིག་ལ། ང་ཡང་ཁ་བའི་ངོ་བོར་འཐིམས།

ཚོར་སྣང་ཞིག་ལ། འབབ་བཞིན་པའི་ཁ་བའི་

འདབ་མ་རེ་རེ་ནི།

བྱིན་རླབས་ཀྱི་ཚན་ཁ་འབར་བའི་བཀའ་

བསྟན་རེ་རེ་དང་།

གངས་ལ་འཁྲུངས་པའི་རླབས་ཆེན་གྱི་སྐྱེས་

ཆེན་དག་གི།

བསྟན་བཅོས་དང་། རྣམ་ཐར། གླེགས་བམ་རེ་རེ།

ཁ་བའི་ཚུལ་གྱིས་ང་ཡི་ནང་སེམས་ལ་

རིང་བསྲེལ་དུ་བབས།

དཔང་སྐོང་ཕྱག་རྒྱ་དང་གསེར་གྱི་མཆོད་རྟེན་སོགས།

མཁའ་ལས་བབས་པ་ཇི་བཞིན་དུ།

ཀ་མད་སུམ་ཅུའི་ཡིག་འབྲུ་རེ་རེ་དང་།

དབྱངས་གསལ་གྱི་ཚོར་བས་བྲིས་པའི་སྙན་ངག་རེ་རེ།

ད་དུང་། མི་ཆོས་གཙང་མ་བཅུ་དྲུག་དང་།

ཆོས་སྐལ་མ་ཎི་ཡིག་དྲུག་རེ་རེ།

འོད་ལམ་ལམ་གྱི་མུ་ཏིག་གི་ཚུལ་གྱིས་དཀར་

ཆེམ་མེར་བབས་པས……

ང་ཡི་སྣང་ངོར། དགོས་འདོད་ཀུན་འབྱུང་

གི་དངོས་གྲུབ་རེ་རེ་ཡིན་སྣང་འཆར།

ཐ་མར། ང་ཡི་ནང་སེམས་ལ་བཅོས་

མ་མ་ཡིན་པའི།

དཔའ་གདེང་ཞིག་དང་། ཡིད་ཆེས་ཤིག།

དགའ་བྲོད་ཅིག།

ལྷན་ཅིག་ཏུ་བསྩལ་སོང་བས།

ང་རང་ཁྱད་འཕགས་ཀྱི་ཁ་བའི་

ཞིང་ཁམས་དེ་ན།

དགའ་ལྷང་ལྷང་གི་ཚོར་བས་རབ་ཏུ་

མྱོས་འདུག་ཨང་།