ངའི་རྩོམ་གྱི་རྩོམ་གཤིས་ཁྱོད་ལ་སྟོན།།
ཁྱོད་རྩོམ་གྱི་ཁྱད་ཆོས་ང་ཡིས་བཤད།།
ཚིག་ཚོགས་པ་ཙམ་ལ་རྩོམ་མི་ཟེར།།
དེ་ཟེར་ན་ཁྱོད་ཀྱང་རྩོམ་པ་པོ།།
གསལ་དག་ཆ་མེད་ན་རྩོམ་བཟང་མིན།།
སེམས་ཚོར་བས་མ་ཟིན་རྩོམ་འབྲིང་མིན།།
རང་ལྟ་ལུགས་བྲལ་ན་རྩོམ་རབ་མིན།།
དེ་ཡིན་ཡང་ཐོག་མའི་ལས་བྱ་བཞིན།།
རྩོམ་སློབ་སྦྱོང་བྱས་ན་དགའ་བསུ་ཡོད།།
ཚིག་སྙན་པ་ཙམ་གྱིས་སྙན་ངག་མིན།།
དོན་ཅི་དགར་བྱོ་ཙམ་ལྷུག་རྩོམ་མིན།།
གཏམ་འགོ་རྐང་བསྒྲིགས་ཙམ་སྒྲུང་གཏམ་མིན།།
དེ་ཡིན་ཡང་རྩོམ་ལ་དགའ་འོ་ཞེས།།
རྩོམ་སྣ་ཚོགས་བྲིས་ན་དགའ་བསུ་ཡོད།།
ཁྱོད་རྩོམ་གྱི་ཁྱད་ཆོས་དེ་ཙམ་ལ།།
ཁྱོད་ཟེར་བ་ཁྱོད་ཚོ་ཚང་མ་མིན།།
ཁྱོད་བཞིན་དུ་རྩོམ་ཡིག་བརྫོད་མཁན་མང་།།
གཏམ་འདི་ཚོ་མི་ངོ་ཚིག་ངོ་ཡིན།།
ངའི་རྩོམ་ལ་འགྲན་ཟླ་མེད་པ་མིན།།
ཆེས་མ་མཐར་རྩོམ་གཤིས་འབོར་མ་མྱོང་།།
ཚིག་ཚོགས་པ་སྤུངས་ནས་གང་མ་མྱོང་།།
ཚིག་དག་ཆ་ཡོད་ཕྱིར་སུམ་རྟགས་སྐྱོར།།
སེམས་ཚོར་བ་སྒུལ་དུས་དྲང་གཏམ་བྲིས།།
རང་ལངས་ཕྱོགས་ཞ་དང་ཞོར་ནས་གཡུགས།།
རྩོམ་དགའ་ཕྱོགས་ཙམ་ལ་བགྲང་མ་མྱོང་།།
ལུས་གྲིབ་མ་བཞིན་དུ་རྩོམ་དང་གཤིབ།།
ང་རྩོམ་གྱི་བུ་ལོ་རྩོམ་ལ་འཐམས།།
རང་ཡན་ན་མེད་ཅེས་འུར་བ་མིན།།
ངའི་རྩོམ་གྱི་རྩོམ་གཤིས་དེ་ཙམ་མོ།།
༼ གཟུངས་བྷ། ༽