ནམ་མཁའ་གཞན་ཞིག་བྲིས་ཏེ།།
འདི་ཕྱིའི་ལམ་པ་བརྒལ་བྱུང་།།
སྐྱེ་བ་བརྗེས་པའི་ལས་འཕྲོ།།
རླུང་ཁར་གཡུག་གཡུག་བྱས་བྱུང་།།
ཆང་ལ་བཅོལ་བའི་ཚོར་འདུ།།
རྒྱང་རིང་སྟོང་གིས་བཏེགས་བྱུང་།།
རྣམ་རྟོག་སྒྱུ་མའི་གར་ལ།།
རྟོལ་བའི་ཐབས་ཤིག་མི་འདུག།
སྤྲིན་གྱི་གཟིངས་སུ་ཞུགས་ཚེ།།
རྣམ་ཤེས་གུ་ཡངས་གནང་འདོད།།
དཔྱོད་པའི་ཆར་ཟིམ་ཁྲོད་དུ།།
ཚོར་བྱུང་མེ་ཏོག་ཐོར་བྱུང་།།
ཆར་ཞོད་ཆེ་བའི་མཚན་མོར།།
ལྷང་ལྷང་རོལ་མོ་དཀྲོལ་ཀྱང་།།
ངག་ལ་དངོས་གྲུབ་དབེན་པས།།
སེམས་ལ་བདེ་སྣང་མ་རྙེད།།
གོམ་གསུམ་ལྷོད་ཀྱིས་སྤོས་པས།།
དཔྱིད་དཔལ་ཕོ་ཉ་འཕྲད་བྱུང་།།
རྣ་བ་བླག་ཐེངས་ཤིག་གིས།།
ཡིད་ཀྱི་རྒྱུད་སྐུད་འདར་བྱུང་།།
ཕ་གིའི་ཉ་གའི་མཐོ་སར།།
གཡུ་འབྲུག་སིང་སིང་གྲག་བྱུང་།།
མགོ་ཡི་ནམ་མཁའ་དག་ཀྱང་།།
འཛུམ་པའི་དཔལ་གྱིས་མྱོས་བྱུང་།།
ཚེ་མདུད་གོས་ཆེན་སེར་པོ།།
ཁ་དོག་ཡལ་བ་མ་གནང་།།
ཡིད་མཐུན་ཡིད་ཀྱི་འབུར་རིས།།
གོས་ཆེན་སྟེང་དུ་འཁྲུངས་ཡོད།།
བགྲེས་པོའི་འཁར་བ་མཐོང་བྱུང་།།
ཐོད་པའི་གཉེར་རིས་མཐོང་བྱུང་།།
བདག་མེད་སྣང་བ་ཕྲ་མོ།།
བདག་པོ་བྱེད་འདོད་སྐྱེས་བྱུང་།།
སེམས་དང་སེམས་པའི་མཐུད་སྣེར།།
མཐུན་པའི་དར་གྱིས་བསླེས་ན།།
ཞིམ་ལྡན་ཚིག་གི་བདུད་རྩི།།
གཞོན་པའི་སྙིང་ལ་འཛུལ་ཡོང་།།
ཡོད་ཡོད་འདྲ་བའི་དུངས་སེམས།།
བརྩེ་བའི་ཐིག་ལེ་ཁྲ་མོ།།
ལོ་གཞོན་སེམས་ཀྱི་འཁྲི་ཤིང་།།
འཇའ་ལྟར་ཡལ་བ་མ་གནང་།།
མཛའ་བ་གླུ་རུ་ལེན་མཁན།།
གླུ་མཁན་སེམས་ཀྱི་མཚེ་ཡ།།
དར་སྐུད་བྱེ་བ་བཏགས་པའི།།
སྣང་བའི་སྒོ་དར་ཁྲ་ཁྲ།།
གཡུ་ལོའི་ཚལ་དུ་རྒྱུ་བའི།།
སྨུག་པའི་ནང་གི་བསིལ་ཆུང་།།
གཞོན་ཆུང་ཚོར་བ་འགུག་རོགས།།
འཇོལ་མོའི་གྲེ་བ་གཡར་རོགས།།
དྭངས་གསལ་ཆུ་ཡི་དབུས་སུ།།
ང་ཡི་གཟུགས་བརྙན་ཤར་བྱུང་།།
ཟླ་བའི་ཞལ་རས་ཡག་ལེ།།
སྣང་བའི་དབྱིངས་ཀྱི་ཕོ་གཞོན།།
ལག་པའི་མཐིལ་དུ་གསལ་བའི།།
རི་མོ་གཡས་འཁྱིལ་གཡོན་འཁྱིལ།།
རི་མོའི་རྒྱབ་ཀྱི་གསང་གཏམ།།
ཁྱོད་ལ་མ་བཤད་ཆོག་གམ།།
གསང་དང་མ་གསང་མི་བཤད།།
གསང་བ་དུང་བའི་མདུད་ཞགས།།
རྨི་ལམ་ཟླ་བའི་དཀྱིལ་འཁོར།།
ལས་སྐལ་ཨ་ཡིག་རང་བྱོན།།
སྣང་བའི་ཁམས་སུ་འཁྲུངས་པའི།།
ཚོར་བ་རླུང་གི་འཁོར་ལོ།།
དཀར་ཡོལ་འབྲུག་མར་བཅོལ་བའི།།
མཆོད་ཆང་ནང་ལ་སིམ་ཡོད།།
དྲང་དྲང་སྤྲིན་ཕུང་རྟོལ་བའི།།
གསོམ་ཤིང་ཁེར་སྐྱེས་ཤིག་ལ།།
གདུང་བའི་ཉམས་ཤིག་བསྟན་ཏེ།།
མིག་ཆུའི་སྐད་ཆ་ལབ་འདོད།།
མིག་ཆུ་གླེང་དགོས་མི་འདུག།
དྲན་པ་ཉིན་ཞག་དཀར་ནག།
མི་ཚེའི་ལ་མོའི་རྒྱབ་ལ།།
སྨོན་འདུན་སྐུར་ཚོད་ནམ་ཡིན།།
རྩྭ་ལྗང་གོས་སུ་བྱས་པའི།།
ས་ཆེན་བདག་ཏུ་མེད་ཀྱང་།།
རྐང་པའི་རྗེས་ཤུལ་རེ་རེ།།
ལོ་ཟླའི་གཏིང་ལ་བྲིས་ཡོད།།
ཕྱི་ནས་ནང་དུ་འཕར་བའི།།
མི་ཁའི་ཤྭ་འོད་བཙན་པོ།།
ང་ཡི་འཇིག་རྟེན་འདི་ཡི།།
ལྷིང་འཇགས་དཀྲོག་པ་མ་གནང་།།
མདང་གི་རྨི་ལམ་ནང་དུ།།
དགུང་གི་སྐར་མ་རྨིས་བྱུང་།།
སྐར་ཕྲན་སུམ་བརྒྱ་དྲུག་ཅུར།།
ཞལ་མཇལ་གནང་བ་རྨིས་བྱུང་།།
བདག་གི་སྣང་བ་འགུལ་བྱུང་།།
སྣང་བའི་སྒོ་དར་འགུལ་བྱུང་།།
ཚིག་དང་ཚིག་གི་བྱ་ཁྱུ།།
ལས་ཀྱི་ནམ་མཁར་འཕུར་བྱུང་།།
འཁྲུལ་བའི་འཛུམ་ཆུང་བསྟན་ན།།
མཐུན་པའི་དགུ་ཚིགས་འཛུམ་ཡོང་།།
སེམས་ལ་བརྐོས་པའི་ཡིག་འབྲུར།།
རོ་བཅུད་གཞན་ཞིག་ཡོད་རེད།།
དགུན་གྱི་ཉི་མ་ནུབ་ཟིན།།
རྒྱུ་སྐར་ད་དུང་མ་ཤར།།
སེམས་ཀྱི་དུང་ཟླ་ལྷ་མོ།།
སྤྲིན་པའི་གཟུགས་སུ་མ་ཤར།།
རྫ་རིའི་སྟོད་དུ་དཔྱངས་པའི།།
གངས་ཀྱི་མུ་ཁྱུད་རིང་མོ།།
ནགས་ཀྱི་ཚལ་དུ་འཁྲུངས་པའི།།
གཡུ་ཡི་འཁྲི་ཤིང་ལྗང་གུ།།
ཁུ་བྱུག་གྲག་རྒྱུ་བྱུང་ན།།
སྣང་བའི་དབྱངས་རྟ་འཕེལ་ཡོང་།།
ལས་ཀྱི་དབྱར་དགུན་ཟེར་བ།།
ཚོར་བའི་ཚ་གྲང་ཙམ་རེད།།
ལང་ཚོའི་མེ་ཏོག་འདབ་མ།།
སུ་ཡི་མིག་ལ་ལྷུང་ངམ།།
ཡང་ན་ཡིད་ཀྱི་ཟིལ་བ།།
ཐོ་རེངས་ངོས་སུ་གསལ་ལམ།།
ཝེར་མའི་རི་ལ་གནས་པའི།།
ལྷ་ལ་གསོལ་བ་གདབ་ཆོག།
རྒྱུ་དང་སྨོན་ལམ་འགྲིག་ན།།
ནོར་བུ་སྙིང་ལ་འཁོར་ཡོང་།།
བྱ་རྒོད་ནམ་འཕང་བཅད་དེ།།
དམར་པོ་བྲག་ལ་བབས་བྱུང་།།
བྲག་དམར་སྐུ་ཁམས་བདེའམ།།
རྒོད་པོ་གནས་བཟོད་བདེའམ།།
ཏིང་འཛིན་དབྱིངས་སུ་མ་ཞུགས།།
འཁོར་བའི་གྲོང་དུ་སྐྱེས་བྱུང་།།
ལས་འཕྲོ་ཅན་གྱི་མི་རྣམས།།
ལྷན་དུ་འཛོམས་ན་དགའ་བ།།
ཚེར་མའི་ཚལ་དུ་ལྷུང་བའི།།
ལུག་བལ་སྤྲིན་གྱི་རི་མོ།།
འཁོར་བའི་ནགས་སུ་སྐྱེས་པའི།།
མོ་གཞོན་བྱུ་རུའི་སྡོང་པོ།།
ལས་སྨོན་རྒྱུད་མངས་གསན་བྱུང་།།
རོ་དང་བེམ་པོ་དཀྲོལ་བྱུང་།།
ཀུན་རྟོག་རླབས་རྒྱུན་རིང་མོ།།
རྒྱུད་མངས་རམ་འདེགས་འགྲིག་སོང་།།
འཕྲུལ་སྣང་པད་མའི་ཚལ་དུ།།
ཐིག་ལེའི་སྦྲང་ཆུང་འཁོར་བྱུང་།།
སྦྲང་ཆུང་འཁྲུལ་བ་མ་ཡིན།།
པདྨའི་དྲི་བསུང་ཞིམ་པ།།
སྣང་འགྲོས་འཕྲུལ་གྱི་རི་མོ།།
བློ་གསལ་གཞོན་ནུ་དོན་གྲུབ།།
གདུལ་བྱའི་ཞིང་མཆོག་འདི་རུ།།
ལུས་སེམས་ངལ་གསོ་བྱ་ཆོག།
བདག་ནི་དགུང་ལ་འཕུར་ཏེ།།
དགུང་གི་སྐར་མར་སྤྲུལ་འདོད།།
ཡང་ན་ས་གཞིར་སྦྲུམ་པའི།།
རྩི་ཤིང་ནགས་ཚལ་བྱ་འདོད།།
རྟུལ་ཕོད་མེད་ཅེས་མ་གསུང་།།
སྣང་བ་གནམ་གྱི་མཐའ་ཡིན།།
སྙིང་རྩའི་འཕར་ལུགས་རེ་ལ།།
འཕྲལ་གྱི་འདུན་མ་འཁོར་ཡོད།།
མི་ཡུལ་འདི་རུ་སྐྱེས་ཏེ།།
འཁོར་བ་འདིའི་ནང་རྒས་ན།།
ལས་ལ་རྟོད་ཐག་ཡོད་ཀྱང་།།
སེམས་པ་འགོག་ཐབས་མ་བྱུང་།།
སྐྱ་རེངས་བུ་མོའི་དགྱེས་འཛུམ།།
རེ་བའི་ཁམས་སུ་འཕྲོས་བྱུང་།།
གསོན་པའི་ལག་ཟུང་དྲོན་མོ།།
རེ་བའི་ཉི་ཟེར་འཛིན་རོགས།།
ཕྱོགས་བཞིར་དྲི་ངད་ལྡང་བྱུང་།།
དྲན་འཛིན་ཡངས་པོར་ཕྱེས་དང་།།
སྒེག་ལྡན་དུས་ཀྱི་ཉམས་འགྱུར།།
སྣང་བའི་དྲུང་དུ་འབྱོར་ཡོང་།།
གཙང་པོ་གསུམ་གྱི་མགོ་ཁུངས།།
དབྱངས་ཀྱི་འགྱུར་ཁུགས་ཡིན་ན།།
གངས་དཀར་ཤེལ་གྱི་མེ་ལོང་།།
ནང་དུ་རྒྱལ་ཁམས་ཤོང་ངོ་།།
༼ མགར་ཐང་དཀར། ༽