ཕན་ཚུན་ཡིད་སེམས་དེ་མཐུན་ཞིང་། །
གཅིག་སེམས་གཅིག་རྟེན་ལ་བྱས་ཏེ། །
དགའ་བའི་འཛུམ་པ་རང་འཁྱུད་དེ། །
སྙིང་སྲུབས་ནང་རོལ་དུ་གནས་ཡོད། །
ན་ཆུང་གཞོན་དུས་ཀྱི་བརྩེ་དུང་། །
དཀར་གསལ་ཟླ་ངོགས་ཀྱི་གཟུགས་བྱད། །
ལག་པས་གཟུང་རྒྱུ་ཞིག་མེད་ཀྱང་། །
སེམས་པའི་སྙིང་ཤ་ལ་རེག་ཡོང་། །
རྒྱང་རིང་ཟླ་བ་ཡི་ཞལ་དཀར། །
སེམས་ནས་དྲན་རྒྱུ་ཞིག་འདུག་ཀྱང་། །
མངོན་སུམ་མཇལ་རྒྱུ་ཞིག་མེད་པས། །
དྲན་པའི་ན་ཟུག་འདི་ལྗིད་སོང་། །
འཛུམ་དཀར་ཞལ་རས་ཀྱི་ངོས་ལ། །
ཞེ་འཁྲེང་ལོ་ཟླ་ནས་བཅངས་ཏེ། །
དྲན་པའི་ཡིག་ཆུང་གི་ངོགས་ལ། །
བྲིས་ནས་ཁྲུང་ཁྲུང་ལ་བསྐུར་ཡོད། །
མཚམས་སྤྲིན་དམར་སེར་གྱི་ལྭ་མཛེས། །
ལ་ཁའི་རི་འགོ་ནས་བཞུད་དུས། །
རྒྱང་གི་ཟླ་བ་ཡི་འཛུམ་ཞལ། །
དྲན་པའི་ཟླ་ངོགས་ལ་རྩེན་སོང་། །
མི་དྲན་བསམ་བསམ་དུ་བསྡད་ཀྱང་། །
མལ་ཁྲི་བདེ་བདེ་ཡི་སྟེང་ན། །
ལྷོད་ལྷོད་དུ་བ་གཅིག་འཐེན་དུས། །
དྲན་པའི་ཚོར་བ་འདི་མང་གི །
ཁེར་རྐྱང་ཆང་དམ་ཞིག་འཐུང་ཞོར། །
རྒོངས་ཀའི་མཚམས་སྤྲིན་ལ་བལྟས་ཏེ། །
སྣང་བ་རྒྱང་རིང་ལ་བསྲིངས་པས། །
དྲན་གདུང་མི་ཁ་ལྟར་རྒོད་བྱུང་། །
སྙིང་སྡུག་དྲན་པ་ཡི་ཚོར་བས། །
ང་ཡི་སྣང་ངོགས་ཀྱི་ལྡེབས་སུ། །
བསུབ་མེད་རི་མོ་བཞིན་བྲིས་ནས། །
བརྗེད་མེད་ཕ་མ་ལྟར་ཡིན་སོང་། །
རང་སེམས་དགའ་བ་ཡི་མཛའ་མོ། །
ཞལ་རས་འཆར་བ་དེ་མང་ཞིང་། །
སྙིང་གཏམ་བཤད་འཕྲོ་དེ་ལུས་པས། །
དྲན་ཚོར་སྣང་བ་འདི་ཆེ་སོང་། །
སྙིང་ཉེ་དྲན་པ་འདི་མང་བས། །
སྙིང་རླུང་སྟོད་ཕྱོགས་ལ་འཚངས་སོང་། །
འཕྲད་པའི་དུས་སྐབས་ཤིག་མེད་ཚེ། །
ཤི་འགོ་རྡོ་ཐོག་ལ་འཇོག་རན། །
དྲན་པས་རང་སེམས་འདི་བཟི་བས། །
གཞན་དང་སུ་ལ་ཡང་མ་བཤད། །
རང་གི་དྲན་པ་ཡི་ཚོར་སྣང་། །
སྙན་ངག་ཁོ་ན་ལ་བཅོལ་ཡོད། །
༼ སྙན་རྐང་གླིང་། ༽