འཁོར་བའི་ནགས་ཀླུང་འདི་ག་ནས། །
སེམས་ཀྱི་རླུང་ཆེན་ཡང་ཡང་ལྡང་། །
འཇིག་རྟེན་བྱེ་མའི་ཐང་ཆེན་ནས། །
ཁྱེད་རང་རྒྱུ་བའི་ངང་ཚུལ་གྱིས། །
སེམས་ཀྱི་ཉེ་རིང་མ་ཆོད་པས། །
བར་ཐག་ལས་ཀྱི་མོས་གུས་འདི། །
ཀུན་ཏུ་དགྱེས་པ་གཟུང་དུ་གསོལ། །
འདི་དག་ཚིག་གི་ཆོ་འཕྲུལ་མིན། །
སྣང་བའི་ངོས་ཀྱིས་འཇའ་འོད་མིན། །
གདུང་བའི་ཉི་མ་རུབ་ཚོད་ལ། །
བསིལ་བའི་རླུང་བུ་ལྡང་ཙམ་གྱིས། །
བརྩེ་བའི་མེ་ཏོག་མགུལ་དུ་འཆང་། །
སྨྲེང་བའི་མི་དེ་ཡུན་རིང་ངུས། །
བརྩེ་གཞས་འགྲམ་གྱི་ཐོལ་གླུ་འདི། །
མིག་མཐར་འཁོར་བའི་མཆོག་མ་ལ། །
ཉི་འོད་སྒྲིབ་པའི་སྔ་གཞུག་ཏུ། །
དྲན་སེམས་གླུ་ཡི་སྣང་བ་གཏོར། །
རླུང་བུ་བསིལ་བསིལ་ལྡང་བ་ན། །
སེམས་ཉིད་སྣང་བ་གང་སར་རྒྱུ། །
ཉམས་སྣང་བོར་བའི་ཀུན་རྟོག་འདི། །
སེམས་བྱུང་འགྱུ་བའི་ངག་ཐུན་འདི། །
རིག་བྱེད་བྱེ་བའི་མགུལ་རྒྱན་ཡིན། །
སེམས་ཀྱི་ཉེ་རིང་བོར་བའི་ཤུལ། །
དྲན་སེམས་སྣང་བ་མག་མོག་འདི། །
ཡིད་ཀྱི་མཚོ་མོ་སྐྱོམ་པས་ན། །
སེམས་སུ་ལྷུང་བའི་མེ་ཏོག་འདི། །
ཚུར་ཚུར་ང་ལ་གཡོ་བ་བྱུང་། །
ཞེ་སྣང་འཛུམ་པའི་མཆོག་མ་འདི། །
སེམས་སུ་ལྷང་ངེར་གསལ་གྱུར་ན། །
དྲན་པ་སེམས་ཀྱི་ཟླ་བའི་མདངས། །
སེམས་ཉིད་གཡོ་བའི་ཉིན་བྱེད་འདི། །
པད་མའི་འཛུམ་ཆུང་འགུལ་བའི་རྗེས། །
སེམས་ཉིད་སྨུག་རླུང་འཁྲིགས་པ་ན། །
ཚིག་རྒྱན་མཆོད་པའི་སྣང་གླུ་ལེན། །
བརྩེ་བའི་མཛའ་བ་ཁྱོད་ཉིད་ལ། །
སེམས་ཀྱི་སྤྱན་རས་མ་ཟིམ་པར། །
ཉི་ཐིག་ཕོག་པའི་ཞལ་རས་ལ། །
པདྨའི་འདབ་མ་ཟིལ་ཟིལ་གཡོ། །
མ་བཅོས་གདུང་བའི་ཉམས་གླུ་ལ། །
ཚིག་གི་དྲི་ངད་ལྷོད་ཀྱིས་བཞུར། །
སྨུག་སྤྲིན་གྱོན་པའི་རི་སུལ་ནས། །
བརྩེ་བའི་མཆོད་དབྱངས་ཁྱོད་མིན་སུ། །
སེམས་ཀྱི་དངུལ་དཀར་མེ་ལོང་ནང་། །
རྟག་ཏུ་འཛུམ་པའི་ངང་ཚུལ་གྱིས། །
མཐའ་མེད་འཁོར་བའི་གྲུ་ག་ནས། །
ཁྱོད་ཉིད་གཅིག་པུར་འཚོལ་བར་བྱེད། །
དབྱངས་ཅན་དགྱེས་པའི་ཟླ་བ་ལ། །
ངག་རིག་འདུ་བྱེད་ལན་གཅིག་འཕྲོས། །
མཆོད་དབྱངས་འདུ་བའི་རིག་བྱེད་ལ། །
དཔྱིད་ཀྱི་རྒྱང་གླུ་ཡང་གཅིག་ལེན། །
ཁྱོད་སྐུ་མཚུངས་པ་མེད་པ་ལ། །
འོད་ལྔའི་རྣམ་པར་རབ་ཏུ་ཚེས། །
ངག་རིག་པདྨའི་འཁྲི་ཤིང་ལ། །
ཚིག་རྒྱན་མེ་ཏོག་ངང་གིས་འཐོར། །
༼ ཁམས་པ་རབ་དབྱངས། ༽