གླུ་གར་སྟེཊ་མཐོ་ཚད་ཞབས་ཀྱི་བཅགས་པའི།།
གཟུགས་སྐྱེ་འབྲས་སྨིན་ལེགས་ཨ་ཅག་པད་མཚོ།།
ངག་མགྲིན་པའི་སྒོ་མོ་ཕྱེས་ཐེངས་རེ་ལ།།
སྡེ་ལྟད་མོ་བ་དག་བརྒྱལ་བ་ཐོས་སམ།།
མ་སྒྲོལ་མ་དཀར་མོའི་རྣམ་སྤྲུལ་མིན་ལ།།
གླིང་སེང་ལྕམ་འབྲུག་མོ་སྐྱེ་བ་མིན་ཡང་།།
ལྷ་དབྱངས་ཅན་མ་ཡི་ནུ་མོ་འདྲ་བའི།།
སྨན་ཁྱོད་ཀྱིས་མི་སེམས་སྤྲུག་སྤྲུག་བཏང་འདུག།
ཞལ་མེ་ཏོག་དཀར་ལ་དམར་མདངས་ཆགས་པ།།
བྲང་མྱོས་བུམ་རློན་པ་འོ་མས་རྒྱས་འདྲ།།
སྐྲ་ལྕང་ནག་ལོ་མ་རླུང་གིས་སྐྱོད་བཞིན།།
གླུའི་ཕོ་བྲང་ཁག་ནས་འཁྱོར་འགྲོས་བྱེད་དུས།།
ས་མགོ་ལོག་ཐོས་ན་ཁྱེད་རང་དྲན་ཡོང་།།
གནམ་མགོ་ལོག་རིག་ན་ཁྱེད་ཞལ་མཇལ་འདོད།།
ཁྱེད་འུ་གཉིས་འབྲེལ་བ་མེད་པ་བདེན་མོད།།
གསུང་སྙན་མོ་དེ་གས་ཡིད་དབང་འཕྲོག་སོང་།།
མི་བརྒྱ་ཕྲག་སྟོང་འདུས་དབུས་ཀྱི་སྨན་ཆུང་།།
ལག་ཐལ་སྒྲའི་དགའ་བསུ་འབྲུག་བརྒྱ་ལྡིར་ཞིང་།།
སེམས་མགུ་འབོད་བྱེ་བས་གནམ་ས་བཀང་དུས།།
ཕྲན་བརྙན་མིག་ནང་དུ་ཧད་དེ་ལུས་ཡོད།།
གཤིས་མ་བཅོས་ངང་ངམ་ཤུགས་ཀྱིས་འཛུམ་སྟེ།།
སྐད་བདེ་མོས་གན་དག་ཟིལ་གྱིས་མནན་དུས།།
ལུས་བོད་ལྭ་གྱོན་པའི་རིགས་ཀྱི་བུ་མོ།།
མིག་རྣ་བ་ཟུང་གི་དཔལ་ཡོན་རེད་བཞག།
ངག་མགྲིན་པའི་ཚལ་གྱི་གླེང་གཞི་ཁྱེད་རང་།།
དབྱར་ཟླ་བ་དྲུག་པའི་མེ་ཏོག་དང་ནི།།
ཚིག་ཐ་སྙད་ནང་གི་ཡང་སྙིང་ཡིན་དོན།།
མིའི་སེམས་རྩ་དཀྲུག་པའི་རྣམ་སྨིན་ལོས་ཡིན།།
སྨན་མཛངས་མའི་ནང་གི་མཛངས་མ་ཁྱེད་རེད།།
གླུ་བླངས་ན་ཁྱད་ཆོས་གཞན་དང་མི་འདྲ།།
སྨན་མཛེས་མའི་ནང་གི་མཛེས་མ་ཁྱེད་རེད།།
ཞལ་མཐོང་ན་ཚོར་བ་གཞན་དང་མི་མཚུངས།།
སེམས་སྙི་མོའི་གཤིས་སུ་སྤྲོ་བ་སྐྱེད་པའི།།
དབྱངས་སོར་མའི་རྒྱུད་སྐུད་ད་དུང་དཀྲོལ་དང་།།
ངས་ཚངས་དབྱངས་རྒྱ་མཚོའི་མགུར་གླུ་འདྲ་བའི།།
ཚིག་དམར་དཀར་བཏུ་སྟེ་ལེགས་སྐྱེས་འབུལ་ཡོང་།།
སྨན་བུ་མོ་ཤ་ཞེན་རུས་དུང་ཅན་མ།།
བོད་སྲིད་པའི་གངས་རྒན་མ་ཞིག་བར་དུ།།
གླུ་དྲི་ཟའི་རོལ་མོས་འཇིག་རྟེན་སྒུལ་བའི།།
མ་ཚངས་སྲས་ལྷ་མོར་སྐྱབས་མཇུག་ཞུ་འདུག།
༼ མཱ་ལིན་ནཱ། ༽