སྐྲ་རྒྱ་ལྕང་ཁུག་པར་
མེ་ཏོག་འཛུམ་ཁ་དོད་པོ། །
ཐོད་དངུལ་དཀར་མེ་ལོང་
གཡུ་བྱུའི་ཕྲ་རྒྱན་བསྟར་སྒྲིག །
ལས་རྩོལ་བས་མ་བྲིས་གནག་
སྣུམ་སྨིན་མ་འཇམ་འཁྱུག །
ནག་སྟུག་པོའི་རྫི་མར་འོད་ཀྱི་
ཟེར་མ་རང་འཕྲོ། །
བཞིན་པད་མའི་འདབ་ངོགས་
བུང་བའི་སྤྱན་ཟུང་ལྡིང་མ། །
དམར་མཁུར་ཚོས་ཆ་འགྲིག་འགྲམ་
པའི་ཟུར་ངོགས་ཡག་ལེ། །
ཞལ་མཆུ་སྒྲོས་བུམ་པར་ཚེམས་
དཀར་དར་སྐུད་འཐེན་དབུས། །
སྲབ་སྨྲ་ལྕེ་རྐང་དྲུག་ལྡེམ་མྱུར་
གཤོག་གླུ་འཇེབས་པོ། །
ངག་གླུ་དབྱངས་ནང་དུ་ཚོར་
བའི་དབྱངས་རྟ་སྙན་མོ། །
ཚིག་དག་སྒྲོས་མུ་ཏིག་ངག་གི་
གསེར་སྐུད་བརྒྱུས་ནས། །
འཛུམ་དམུལ་བའི་ངང་ནས་
གླུ་ཆུང་སེང་སེང་ལེན་མཁན། །
སྨན་མཐོ་སྒང་མཛངས་མ་དྲི་ཟའི་
ན་ཆུང་གཙུག་རྒྱན། །
བྲང་ཤེལ་དཀར་མེ་ལོང་བརྒྱད་
ལྡན་ཆབ་ཀྱིས་བཀྲུས་འདྲར། །
དཀར་འོ་འཛིན་ཆ་འགྲིག་དུང་
དཀར་ཟོལ་གྱིས་འབུད་ཅིང་། །
གོས་དར་ཟབ་དཀར་དམར་
སྟོད་སྨད་རན་གྱིས་བཀླུབས་དུས། །
སྟེང་ལྷ་ཡུལ་གྲོང་གི་མཛངས་
མའི་བཞེངས་སྐུར་འཁྲུལ་སོང་། །
ཕྱག་པད་མའི་འཁྲི་ཤིང་རིང་
སྲོང་ལང་ཚོ་རྫོགས་པར། །
ཕྲ་དབྱིབས་མཛེས་མཛུབ་མོའི་
ཡལ་གའི་ཟོལ་གྱིས་གྲོལ་རྩེར། །
མཉེན་སེན་དཀར་འདབ་མར་ཟླ་
བའི་འོད་མདངས་བྱུགས་པའི། །
གངས་གཙང་ཆབ་བཞུར་
འགྲམ་ཁྲེལ་གཞུང་ཀློང་གི་
མཛངས་མ། །
ནགས་སྙུག་མའི་ལུས་བྱད་ཕྲ་
ལྡེམ་མཛེས་པ་རང་འགྲུབ། །
རླུང་སིལ་བུས་སྒུལ་ལྟར་གར་
སྟབས་ལྡེམ་འཁྱུག་རྩེན་པར། །
ཡིད་ཞེན་ཆགས་ཆང་མྱོས་སྣང་
སྲིད་སྐྱེ་དགུའི་མིག་ཟུང་། །
གྲོས་མ་བསྐུལ་ལས་ཀྱིས་འདུ་
འཛོམས་གར་སྟེགས་སོ་མ། །
སེམས་གངས་དཀར་མེ་ཏོག་
ཁྲེལ་གཞུང་ཟེའུ་འབྲུ་དགོད་མ། །
གཤིས་བལ་འཇམ་གོས་དཀར་
མ་བཅོས་ལྷན་སྐྱེས་
འདོད་འཇོ། །
མཛའ་དམ་ཚིག་མུ་ཏིག་ཉི་ཟླའི་
གཟི་བྱིན་འཚེར་བའི། །
གངས་རོང་འབྲོག་མཛངས་མ་
མཐོ་བོད་གཞུང་ན་ཡོད་དོ། །
༼ དབྱངས་ལྡེའུ། ༽