སེམས་ཀྱི་བཞི་མདོ་ཞིག་ནས་སླར་ཡང་མཇལ་བའི།།

ནམ་ཟླ་བསིལ་བའི་ཀུན་རྟོག་དཀར་སེར་དམར་ལྗང་།།

སྐར་མ་སྨིན་དྲུག་ཤར་བའི་ཉི་ནུབ་ཞིག་ཏུ།།

སྣང་བའི་ཤོག་དཀར་ངོས་སུ་ཨེན་ཙམ་འབྲི་འདོད།།

ལྔ་པའི་དབྱངས་ལྡན་བུ་མོ་རང་ཡུལ་ལོག་རྗེས།།

དབྱར་གསུམ་སྤང་གི་མེ་ཏོག་རྙིད་ཚུལ་དག་དང་།།

སྟོན་གསུམ་སྡོང་ལོ་འཐོར་བའི་སྐྱོ་གླུ་ལེན་བཞིན།།

གྲོང་གསེབ་ལྡོམ་པོ་ཞིག་གི་ཕྱི་ནང་མངོན་གཞག།

ཞི་འཇགས་དབེན་གནས་ཤིག་གི་ཆགས་ཚུལ་དྲན་ན།།

བརྩེ་བའི་སྒྲུང་རིང་ནང་གི་གབ་ཚིག་འདི་དག།

སྤྲིན་གྱི་རྒྱ་མཚོ་བརྒལ་བའི་ཁྱུང་ཆེན་ཞིག་ལ།།

དབུས་ཀྱི་རི་དབང་འདྲ་བའི་མི་དེར་སྐུར་འདོད།།

ཚིག་གི་སྒྲོམ་ཆུང་ནང་གི་འཇའ་ཚོན་སྣ་ལྔ།།

ཆར་དང་ཉི་མའི་གྲོང་གི་དབྱིངས་ནས་མཛེས་ཀྱང་།།

གཙང་པོ་དར་གྱིས་སྦྲུམ་པའི་སྐབས་སུ་བལྟས་ན།།

ཁྲེལ་མེད་གཞུང་ངན་གྲོགས་ཀྱི་གཤིས་དང་མཚུངས་སོ།།

སྟོན་མཇུག་རླུང་བུའི་ཤུར་སྒྲ་རྣ་བར་གཟན་ཅིང་།།

མི་ཚོགས་འགྱུར་བའི་རྣམ་པ་མཐོང་ཐེངས་རེ་ལ།།

དྲན་གདུང་ཁུར་གྱིས་མནན་པའི་བརྩེ་བ་ཅན་པོ།།

ཚིག་དང་ཐ་སྙད་ཙམ་གྱིས་མཚོན་ཐབས་བྲལ་སོང་།།

འདི་ནས་གསེར་ལྗོངས་ཞེས་པའི་ཡུལ་ཞིག་དྲན་དུས།།

མཚོར་འཁྲུངས་པདྨ་འདྲ་བའི་ཞེ་འདང་ཞིག་གིས།།

ལས་དབང་སྟབས་ཀ་མཉམ་པའི་སྨོན་འདུན་ཁྱེར་ཏེ།།

འཁོར་བའི་མི་གཉིས་འཕྲད་པའི་ས་ཚུགས་བྲིས་ཡོད།།

མི་ཚེའི་འགྲུལ་བཞུད་གཅིག་གི་འཚོ་བའི་ནང་དུ།།

སེམས་ཀྱི་དགའ་སྡུག་བཅོལ་སའི་སྙིང་གྲོགས་དེ་ཉིད།།

འཇིག་རྟེན་ཧྲིལ་པོ་ཞིག་གི་ཕུན་ཚོགས་ལས་ཀྱང་།།

རིན་ཐང་ཆེ་བར་འདོད་པའི་སེམས་འདི་འཁྲུལ་མེད།།

སྨིན་ཟུང་གཤོག་ནག་འཁྱུག་པའི་བརྡ་རིས་འོག་ནས།།

ཕྲན་ཆུང་སེམས་སུ་བག་ཆགས་སྣ་ཚོགས་བྲན་ཏེ།།

གཞོན་ཤིང་མཛེས་སྡུག་ལྡན་པའི་ཉེར་བཞིའི་ལང་ཚོ།།

ཚེ་ལུས་གཅིག་ལ་གནང་བའི་ལེགས་སྐྱེས་ཡིན་ཟེར།།

ཡིད་འོང་སྙིང་གི་གཞི་མོ་བཀུག་མཚམས་མ་ཆོད།།

བརྩེ་བའི་ཟུར་མིག་མདའ་མོ་འཕེན་ཚོད་མ་ཟིན།།

འདི་འདྲའི་ལོ་ཟླ་མང་པོ་ཁད་ཀྱིས་རྫོགས་དོན།།

ཕན་ཚུན་དུང་བ་ཟབ་པའི་དན་རྟགས་ཡིན་ནོ།།

ལྷོ་མཐའི་སྤྲིན་དཀར་འདབ་མ་འཁྱག་གིས་བཟུང་དུས།།

ཁུ་བྱུག་མོན་ཡུལ་འགྲིམ་པ་ལས་ཀྱི་རྨི་ལམ།།

རྩྭ་སྔོན་དུས་ཀྱིས་བཟས་པའི་ས་གཞི་སྐྱ་བོ།།

བདག་གི་སྙན་ངག་འབྲི་སའི་ཐང་སྟོང་རེད་བཞག།

བྱམས་དང་སྙིང་རྗེའི་སྤྱན་ཟུང་ཉེ་བར་ཕྱོགས་པའི།།

ཡིད་ཀྱི་ལྷ་ལམ་སྲུང་བའི་འཛུམ་དཀར་ལྷ་མོ།།

གཟུགས་མེད་ཀུན་ཏུ་རྟོག་པའི་འཇའ་རིས་འདི་དག།

ཡི་གེའི་གཟུགས་སུ་བསྟར་བའི་ཤེས་པ་བསྩལ་རོགས།།

༼ མཱ་ལིན་ནཱ། ༽