རྣ་བ་ཡོམ་ཡོམ་དུ་འགུལ་བའི་བྲག་ཅ་དེ།

སྙན་ངག་པས་འཁོར་བའི་མུན་གྲོང་དུ་བྲིས་པའི་

ཡིག་ཚོགས་ཡིན།

སྡུག་བསྔལ་མེད་སར་ན་ཟུག་བཙལ་ཅིང་།

ནམ་མཁའ་མེད་སར་སྦྲང་ཆར་འཇོ་མཁན་ཡང་།

ཁེར་རྐྱང་ལ་གོམས་ལོབས་སུ་གྱུར་པའི་སྙན་ངག་

པའི་མཁའ་དབྱིངས་ཡིན།

གནས་ལུགས་ལ་ཨི་ཁུང་བསྩལ།

སྙན་ངག་ལ་བཤགས་བཅོས་བྱས།

དེ་ནི་སྙན་ངག་འབྲི་བ་ཙམ་ལ་མ་གཡེང་པའི་

སྙན་ངག་པ་ཞིག་གི་མིག་རྒྱང་ཡིན།

ཁུག་མ་སྟོང་པ་ཞིག་ཁྱེར་ནས་རྒྱང་རིང་ལ་བཞུད།

དཔེ་ཆ་སླེ་པོ་གང་བསགས་ནས་རང་ཡུལ་ལ་ལོག།

དེ་ནི་མེ་ཏོག་གི་དྲི་བསུང་ཙམ་ལ་མ་རློམ་པའི་

སྙན་ངག་པ་ཞིག་གི་ཁོག་དབུབ་ཡིན།

ཕ་ས་ཕ་ཡུལ་གྱི་ཟན་འབྲུའི་འོག།

ཤ་ཁྲག་རུས་གསུམ་གྱི་རྒོད་པོ་དེ།

རྩྭ་ལ་འཁོར་ཞིང་ཆུ་ལ་ཐིམ།

དེ་ནི་སྙན་ངག་པ་ཞིག་གིས་རང་ཡུལ་ལ་བཅངས་

པའི་ཞེན་པ་ཡིན།

མུན་པ་ཞིག་ལས་མཆོད་མེ་ཀོང་གང་སྒྲོན།

བྱེ་ཐང་དབུས་སུ་ཆར་གྱི་ཐིགས་པ་ཕབ།

དེ་ནི་ཁེ་ཕན་གྱིས་མ་བསླུས་པའི་

སྙན་ངག་པ་ཞིག་གི་རང་ཚུགས་ཡིན།

དུས་ཚོད་ཀྱིས་ཡོད་ཚད་ཀྱི་ངོ་གདོང་

རབ་རིབ་ཏུ་བཏང་།

གསར་རྙིང་གི་ལམ་ཁའི་མདོ་རུ་

ཁབ་སྐུད་འཁྱེར་བའི་སྙན་ངག་པས།

ཕྱི་ལུགས་མུ་ཏིག་རྡོག་པོ་དག།

རང་ཡུལ་གོས་ཆེན་ཁྲ་མོའི་ཐོག།

ཕྲ་ཡི་རྒྱན་ཆས་ལེགས་བཅོས་མཛད།

དེ་ནི་ལྟ་བར་སྒོ་ལྕགས་མ་ཐེབ་པའི་

སྙན་ངག་པ་ཞིག་གི་བསམ་སྤྱོད་ཡིན།

མི་ཡུལ་གྱི་སྐྱོ་གདུང་དག་འཁྱགས་དྲགས་པས།

རྣམ་ཤེས་ཞི་དུལ་ལ་ཕྱོགས་པའི་རྒོད་པོ་དེས།

རང་ལུས་ཀྱི་ཤ་དྲོད་དང་སྙིང་ཁྲག་གི་ཚ་ཟེར་གྱིས།

འཁོར་བའི་མི་སྡུག་པར་འོད་ཀྱི་ཟེར་

སྐུད་འཐེན་བཞིན་འདུག།

དེ་ནི་ང་ཚོ་ལ་དབང་བའི་སྙན་ངག་གི་ལྷ་ཆེན་ཏེ།

ཡིག་ཚོགས་ཀྱི་བང་རིམ་ལས་ཀྱང་མཐོ་བའི་

སྙིང་རྗེ་ཡི་ཕོ་བྲང་ཡོད།