འདོད་རྔམ་གྱི་སྡིག་སྒྲིབ་མཐུག་དྲགས་པས།
ནམ་གུང་གི་རྨི་ལམ་དེའང་ཆད་ལྷག་ཏུ་སྣང་ཡོང་།
མེ་ལོང་ཆག་རོ་ཞིག་གི་ངོས་སུ་ལན་མང་
བལྟས་ཀྱང་།
ཁ་ཐོར་དུ་སོང་བའི་རང་ཉིད་མཐོང་གིན་
མི་འདུག།
མི་ཚོགས་ནི་ཤིན་ཏུ་མཐུག་པའི་མུན་པ་
དང་འདྲ་བར།
ཁོ་ཚོའི་མགོ་ཐོག་ཏུ་ཁ་བ་སེན་ཙམ་ཡང་མ་ལྕོགས།
ཕ་ངོ་མི་ཤེས་པའི་བྱེའུ་ཕྲུག་ནང་བཞིན།
ཁོ་ཚོས་རྨི་ལམ་གྱི་བདེན་རྫུན་མ་རྟོགས།
ཁེར་རྐྱང་གི་སྨག་མུན་ཤིན་ཏུ་མཐུག་པས།
མིག་ཆུ་གཅིག་པུས་དྲན་ངོགས་ཀྱི་གདུང་བ་
མཚོན་ཐབས་མི་འདུག།
གནམ་སའི་བར་དུ་ལུས་པའི་ལན་ཆགས་ཀྱི་
གཤོག་པ་དེ་ཚོས།
ཙག་རླུང་གི་རུས་པ་ལ་འབྱར་བའི་རྨི་ལམ།
དུས་ཚོད་དང་ཁེར་རྐྱང་གི་ནམ་མཁའི་
མཐོངས་སུ།
ཉི་མ་ཤར་བ་དང་ས་འོག་ཏུ་དྲུད་ལ།
མུན་པ་རུབ་པ་དང་མཁའ་དབྱིངས་སུ་ཁྱེར་ཡོང་།
སྐྱེ་འཆིའི་ཕོ་བྲང་གིས་བསྲེགས་པའི་ལས་སྐལ་གྱི་
ལྭ་བ་སྨུག་པོ།
དུས་གསུམ་གྱི་གློག་དམར་དཀྱིལ་འཁོར་དུ་
ནུབ་རྗེས།
རྨི་ལམ་དང་མངོན་སུམ་གྱི་སྔུན་རྒྱབ་གང་དུ་ཡང་།
ཁྱོད་དང་ང་ཡི་ངོ་གདོང་མཐོང་ཐབས་མི་འདུག།