དུས་བཞིའི་འགྱུར་བ་དབྱར་གྱི་པང་ན་སླེབས།།
རི་རྩེའི་ཁ་བའི་དབུ་ཞྭ་དལ་གྱིས་ཕུད།།
གཙང་ཆུ་ལུ་མ་ཤང་ཤང་མདུན་ནས་བཞུར།།
ཡངས་པོའི་སྤང་ཐང་རིམ་གྱིས་ལྗང་མདོག་གྱུར།།
འདོད་ཡོན་མེ་ཏོག་སྣ་བརྒྱ་ཕྱོགས་སུ་བཀྲ།།
འདབ་ལོ་རླུང་བུའི་གར་དུ་ལྡེམ་ལྡེམ་གཡོ།།
བསུང་ཞིམ་དྲི་འཛིན་དབང་པོའི་བཅུད་དུ་བསྣམས།།
ཨེ་མ་ལུས་སེམས་བདེ་བའི་ཞིང་དུ་འཁོད།།
ནོར་འཛིན་སྒེག་མོའི་ལང་ཚོ་དཔལ་འབར་བར།།
ཆགས་པའི་འབུ་དང་བུང་བའི་ཚོགས་རྣམས་ཀྱིས།།
དགའ་བའི་གཤོག་གླུ་འཐེན་གྱིན་ལྡིང་བ་འདི།།
དབྱར་གྱི་སྣང་བ་དགྱེས་པའི་གྲོགས་སུ་ཆེ།།
ཞོགས་པའི་ཉི་གཞོན་གསར་པའི་འཛུམ་རིས་ཁྲོད།།
མདང་ནུབ་ཆར་པས་བཞག་པའི་ཟིལ་བ་ནི།།
འཇམ་མཉེན་ཡལ་གའི་ངོས་སུ་ཁྲོམ་མེ་བ།།
འོད་ཀྱི་རྣམ་པར་ཕྱུག་པའི་ཚུལ་དེ་མཛེས།།
ཡར་གྱི་ཞི་བའི་ལྗོངས་ཀྱི་ནགས་ཀླུང་དུ།།
ལྗོན་ཤིང་བཀོད་པ་མཛེས་པའི་ཐུ་འོག་ནས།།
འཇོལ་མོའི་ཤུགས་གླུ་རིང་མོའི་དབྱངས་འགྲོས་དང་།།
ལྷན་དུ་བྱ་བྱིའུ་སྣ་ཚོགས་བར་མེད་གྲགས།།
ལྷ་ཤིང་གཡུ་ལོ་བརྩེགས་མའི་དབུ་རྩེ་ནས།།
ཁུ་བྱུག་དགའ་མས་མགྲིན་གླུ་དལ་གྱིས་ངང་།།
བསྒུགས་པའི་ཡིད་སེམས་གསོ་བའི་སླད་དུ་ལ།།
སྙན་འཇེབས་དབྱངས་ལ་བཀུག་ནས་ལན་གསུམ་སྦྲན།།
སྣ་ཚོགས་རྩི་ལྗོན་སྣོལ་མའི་དབེན་གནས་འདིར།།
ཕུན་ཚོགས་སྡེ་བཞིའི་འབྲས་བཟང་ཀུན་ནས་རྒྱས།།
ལྷིང་འཇགས་ཞུ་བདེའི་འཚོ་བར་ལོངས་སྤྱོད་པའི།།
བླ་སློབ་དུ་མའི་ཐུགས་དགོངས་དུས་འདིར་དགྱེས།།
དབྱར་གྱི་གཡུ་ལྗོན་ལོ་མ་ལྡེམ་ལྡེམ་དུ།།
བསིལ་འཇམ་རླུང་བུའི་གར་དུ་ཡང་ཡང་རྩེན།།
སྨིན་ལེགས་འདབ་ཕྲེང་ཡིད་ལ་རབ་སྡུག་པས།།
ཡིད་སེམས་གཞན་ལ་འཁྲེང་བའི་གོ་སྐབས་བྲལ།།
༼ གློག་འོད། ༽