ལོ་ཟླ་ཡུན་གྱིས་རྫོགས་པའི་གངས་འདབས་ཀྱི།།
རི་ཆུ་ནགས་གསུམ་ཉི་ཟླ་སྐར་གསུམ་སོགས།།
མིང་དང་ཚིག་གིས་མཚོན་པར་མི་ནུས་ཀྱང་།།
ཅུང་ཟད་འབྲི་བའི་མོས་པ་རབ་ཏུ་ལྕི།།
ཡངས་པའི་ནམ་མཁའ་མི་འགྱུར་དྭངས་གཙང་གཤིས།།
རྟ་བདུན་ཉིན་བྱེད་རྒྱལ་མཚན་མཁའ་རུ་འཕྱོ།།
ཆུ་འཛིན་དུང་གི་མེ་ཏོག་ཕྱོགས་སུ་འཐོར།།
དཀར་གསལ་ཟླ་བའི་ཕ་ཁྱིམ་སུམ་རྩེན་གྲོང་།།
སྦྲང་ཆར་ལྷ་ཡི་ལྷ་ཆབ་དལ་བུར་འཇོ།།
སྟོང་ཉིད་སྒྱུ་མའི་འཇའ་ཚོན་མཐོངས་སུ་བཀྲ།།
སྨུག་པའི་ཡོ་ལང་རི་ཁྱུའི་རྐེད་ལ་འཁྱུད།།
དབྱངས་ལྡན་སྨན་ཆུང་མགྲིན་པ་སྙན་པས་ཕྱུག།
རབ་དཀར་གངས་ཀྱི་རྩེ་མོ་གནམ་ལ་ཟུག།
རང་བྱུང་ནགས་ཀྱི་ལྗོན་པའི་ཚང་ཚིང་དཀྲིག།
རི་སྐྱེས་རི་དྭགས་སྣ་ཚོགས་བག་ཡངས་ཉུལ།།
བྱ་དག་གཤོག་ཟུང་བརྐྱངས་ཏེ་གནམ་ཕང་བརྟོལ།།
ནོར་འཛིན་ནོར་བུའི་དགའ་འཁྱིལ་སྔོ་སང་སང་།།
དཀར་དམར་མེ་ཏོག་ཚོན་གྱིས་ཕྲ་རྒྱན་བཏབ།།
ཕུན་ཚོགས་བརྒྱད་ལྡན་ཆུ་ལ་གསེར་ཉ་འཁོར།།
ཤིང་ཕྲན་མེ་ཏོག་ཚལ་སྡུག་ཁུར་གྱིས་དུད།།
མཚོ་དང་མཚེའུའི་མེ་ལོང་ཀུན་ནས་རྒྱས།།
རྩྭ་ལྗང་ལུས་ཀྱི་སྤུ་ཉག་ཟིལ་བས་བརླན།།
བསིལ་འཇམ་རླུང་བུས་དྲི་ངད་ཁུར་ཏེ་རྒྱུ།།
ངོ་མཚར་བརྩེ་བའི་ཞིང་འདི་སུ་ཡིས་བསྐྲུན།།
ཅང་ཤེས་འགྲོས་མྱུར་འཚེར་སྐད་བྲག་ལ་ཐིམ།།
ནོར་གནག་འབྲོང་ཚ་གད་པའི་འཁྲིས་སུ་འགྱིང་།།
གཡང་དཀར་ཚེ་མོའི་འབག་སྒྲས་རི་ལུང་ཁྱབ།།
རྫི་གཞོན་ཟུང་འཇུག་གླུ་ཡི་དཔལ་ལ་གཡེང་།།
མཐའ་ཡས་རྩྭ་ཐང་རྟ་ནོར་ལུག་ཁྱུས་གང་།།
རྩིད་ནག་སྦྲ་ཁྱིམ་ཞོ་དང་འོ་མས་བཀང་།།
ཁ་ལ་རྩམ་དྲི་འཐུལ་བའི་འབྲོག་པ་འམ།།
ཡང་ན་གདོང་དམར་པ་འདི་བསོད་ནམས་ཆེ།
འདི་ལྟར་ཉི་མ་ཡོལ་བའི་དགོང་སྲོད་རེར།།
མིག་ཟུང་མཚམས་སྤྲིན་ཟེར་ལ་ཅེར་ཞོར་དུ།།
ཤ་རུས་གསེང་ནས་རྡོལ་བའི་གླུ་ཚིག་དག།
དྲན་པ་ཁེར་ཉུལ་ཞིག་གི་འདུག་རོགས་བྱས།།
༼ འོད་འཛིན་མ། ༽