ཕ་ཡུལ་གངས་ལྗོངས་རེ་ཞིག་བཞག་ནས།།
ཁྲེང་ཏུའུ་གྲོང་གི་ངོ་མཚར་ལྟད་མོར།།
ལན་གཅིག་མྱུལ་བའི་སྐལ་བཟང་འདི་ཀོ།།
ནག་ཆུ་རིག་ལྷན་ཚང་གི་སྐུ་དྲིན།།
ཁྲེང་ཏུའུ་འབོད་པའི་གྲོང་ཁྱེར་འདི་ཡི།།
མིང་ནི་རྣ་ལམ་ཐོས་གྲངས་མང་རུང་།།
ང་ནི་དངོས་སུ་སོང་མྱོང་མེད་པས།།
ང་ལ་མཚོན་ན་རྒྱུས་མེད་གྲོང་ཁྱེར།།
དབུ་ཁྲིད་བཟང་པོའི་སྣེ་ཁྲིད་འོག་དང་།།
འགྲོ་རོགས་འགྲོགས་བདེའི་གཏམ་གླེང་བར་ནས།།
ཉི་མ་ལྷ་སར་ཕྱིར་མིག་འཕེན་གྱིན།།
གནམ་ཐང་ཡངས་མོར་དལ་གྱིས་འབྱོར་སོང་།།
ཚན་རྩལ་འཕྲུལ་གྱི་རྟ་ལ་བཞོན་ཏེ།།
སྤྲིན་གྱི་བང་རིམ་ཤུགས་ཀྱིས་བརྒལ་ཏེ།།
ཨ་སྔོན་ནམ་མཁའི་འོག་མ་ཞིག་ནས།།
འགྲུལ་བཞུད་ཅིག་གི་དབུ་ཁྱུད་བྲིས་སོང་།།
མཁའ་ཡི་བྱ་ལ་སྐྱེངས་པ་སྟེར་ཞིང་།།
རི་ཚོགས་ཐམས་ཅད་སྐད་ཅིག་བརྒལ་བའི།།
ངང་ཚུལ་འདི་ལ་བསམ་གཞིག་བྱས་ན།།
ཚན་རྩལ་འཕེལ་རྒྱལ་བློ་ཡུལ་ཤོང་དཀའ།།
ཆུ་ཚོད་གཉིས་ཀྱི་འགྲུལ་བཞུད་བར་ནས།།
སྤོས་ལྡན་གྲོང་དུ་བདེ་བླག་འབྱོར་སོང་།།
སིམ་སིམ་འབབ་པའི་ཆར་རྒྱུན་འདི་ནི།།
ངེད་ཅག་མགྲོན་བསུ་བྱེད་པ་ཡིན་ནམ།།
མགྲོན་ཁང་ལེགས་པོ་བཀོད་སྒྲིག་གནང་ཞིང་།།
བཟའ་བཏུང་རྣམས་ནི་ལུས་པོར་འཕྲོད་ལ།།
སློབ་ཁྲིད་དེ་དག་ཁ་གསལ་གོ་བདེ།།
ལྗོངས་རྒྱུ་དག་ཀྱང་མིག་གི་དགའ་སྟོན།།
སློབ་ཚན་བརྗོད་བྱ་སྣ་མང་ཕུན་ཚོགས།།
ལྗོངས་རྒྱུ་ཁྲིད་ཡུལ་རིག་གནས་བཤམས་སྟོན།།
ཁྲེང་ཏུའུ་གྲོང་ཁྱེར་རྒྱུས་ལོན་མ་ཟད།།
ད་དུང་ཉེར་མཁོའི་ཤེས་བྱ་རྟོགས་པ།།
རྩེ་མོ་དགུང་ལ་ཟུག་པའི་ཁང་བརྩེགས།།
ཕན་ཚུན་སུ་མཐོ་འགྲན་པ་ཨེ་ཡིན།།
དེ་ལ་ཡང་ཡང་ཞིབ་ཏུ་བལྟས་ན།།
མགོ་བོའི་ཞྭ་ཡང་ལྷུང་ས་འདུག་གོ།
ཁྲ་ཆིལ་དགུ་ཆིལ་གྲོང་འདིའི་གློག་འོད།།
མཁའ་ཡི་སྐར་ཚོགས་སྐྱེངས་པ་སྟེར་བྱེད།།
ཁ་པར་རིན་པོ་ཆེ་འདི་མེད་ན།།
རང་ཉིད་གང་དུ་ཡོད་མེད་ཤེས་དཀའ།།
ནང་སའི་གྲོང་ཁྱེར་ཆེན་པོ་ཁག་ལས།།
བོད་རིགས་མང་ཤོས་ཡིན་པའི་གྲོང་ནི།།
ཁྲེང་ཏུའུ་གྲོང་ཁྱེར་ཡིན་པའི་གཏམ་དེའི།།
བདེན་པའི་གནས་ལུགས་མིག་གིས་མཐོང་སོང་།།
ས་འོག་བརྒྱུད་ནས་མིག་ཡུན་ཙམ་ལ།།
འབྲུག་ལྟར་གྲགས་ཤིང་སྦྲུལ་ལྟར་འཁྱུག་ནས།།
དེ་མ་ཉིད་དུ་དམིགས་སར་བསྐྱལ་ཚེ།།
སྒྱུ་མ་མཁན་གྱི་རྫུ་འཕྲུལ་ངོམ་འདྲ།།
ཁང་བཟང་བཀོད་པ་རི་ཚོགས་ཕྲེང་བ།།
གཅིག་ལས་གཅིག་མཚར་ཚུལ་དུ་སྣང་ངོ་།།
ནང་དུ་འཛུལ་ན་གློག་གི་སྐས་སུ།།
མི་ཚོགས་གྲོག་ཚང་བརྡོལ་བ་འདྲ་འོ།།
སྨུག་སྤྲིན་ལང་ལོང་ཀློང་གི་ཁྲེང་ཏུའུ།།
མི་ཚོགས་ཟང་ཟིང་དབུས་ཀྱི་ཁྲེང་ཏུའུ།།
ཆར་པ་ཟམ་ཟིམ་ནང་གི་ཁྲེང་ཏུའུ།།
མཐོང་ལམ་རབ་རིབ་བར་གྱི་ཁྲེང་ཏུའུ།།
ཁྲེང་ཏུའུ་གྲོང་གི་སྣོད་བཅུད་དག་ལ།།
ལན་གཅིག་མྱུལ་བའི་གོ་སྐབས་བཟང་པོས།།
གངས་དཀར་སེམས་ལ་སྔར་མེད་བག་ཆགས།།
མང་དུ་རྙེད་པས་བདག་བློ་དགའ་སོང་།།
རི་ཆུའི་བཀོད་པ་མིག་གི་ལོངས་སྤྱོད།།
དམངས་ཁྲོད་གླུ་དབྱངས་རྣ་བའི་བུ་རམ།།
རང་རང་ཡུལ་ནས་རང་ལུགས་བསྐྱངས་ན།།
རང་གི་རིག་གནས་བརྒྱུད་འཛིན་བྱེད་པ།།
གྲོང་འདིར་ལན་གཅིག་ཡོང་བའི་དྲིན་གྱིས།།
རྒྱ་མཚོའི་ནང་གི་ཆུ་ཐིགས་བཞིན་དུ།།
སྔོན་ཆད་ཆ་རྒྱུས་ཅི་ཡང་མེད་ཀྱང་།།
ད་ནི་ཆ་རྒྱུས་ཆུ་ཐིགས་ཙམ་རྙེད།།
ཕྱི་ཡི་གྲོང་ཁྱེར་ཆེན་པོ་དག་གིས།།
ང་ཡི་བློ་སྒོ་ཡང་ཡང་ཕྱེ་སོང་།།
མཐོང་རྒྱ་ཁབ་མིག་ཙམ་ཞིག་མ་ཡིན།།
ཕྱི་ཡི་འཇིག་རྟེན་མཐོང་རྒྱུར་སྐུལ་ཡོང་།།
སློབ་ཁྲིད་དེ་དག་ཤིན་ཏུ་ཕན་པོ།།
ལྗོངས་རྒྱུ་དེ་དག་རབ་ཏུ་ལྟད་མོ།།
བཟའ་བཏུང་དེ་དག་ཧ་ཅང་ཡག་པོ།།
མཐུན་རྐྱེན་དེ་དག་བཀའ་དྲིན་ཆེན་པོ།།
དུས་ཀྱི་འཁོར་ལོ་ཇི་འདྲའི་མགྱོགས་པ།།
བསམ་དབང་དྲན་དབང་ཅི་ཡང་མེད་པར།།
མི་འདོད་བཞིན་དུ་མང་པོར་གྱེས་དགོས།།
མི་བསམ་ས་ནས་མང་པོར་འཕྲད་ཡོང་།།
འདི་རུ་འབྱོར་ནས་བདུན་གཉིས་འཁོར་རན།།
བདུན་གཉིས་འཁོར་ན་ང་ཚོ་གྱེས་རན།།
འདི་རུ་འཛོམས་པ་ལས་དབང་ཡིན་ན།།
གྱེས་དགོས་བྱུང་བ་ལས་དབང་ཅིས་མིན།།
རྗོད་བྱེད་ཚིག་གི་སྡེབ་སྦྱོར་མི་མཛེས།།
བརྗོད་བྱ་དོན་གྱི་ནང་དོན་མི་ལེགས།།
འོན་ཀྱང་གང་དྲན་ཡིག་ངོར་བཀོད་འདི།།
འགྲུལ་བཞུད་ཅིག་གི་མྱོང་བྲིས་ཡིན་ནོ།།
༼ བྱང་སྐྱ་རེངས། ༽