ཆུ་མོ་མར་མར་བཞུར་ན་བཞུར་དུ་ཆུག།
རླུང་བུ་ཡར་ཡར་ལྡང་ན་ལྡང་དུ་ཆུག།
སྣང་བ་ཟིན་མེད་སྒྱུ་མའི་ཆུ་ཟླ་བཞིན།།
བག་མེད་འདར་ཞིང་སྐྱོམ་ལ་ཁག་ཅི་ཡོད།།
འཁོར་འདས་སྣང་བ་ཕྱེ་བའི་རི་དྭགས་མིག།
ཟམ་པ་ལྡེམ་ཞིང་ལྡེམ་ན་ང་ཡང་ལྡེམ།།
འཛུམ་པའི་མདངས་ཕྱུང་ལས་ཀྱི་ལྷ་མོ་ལ།།
ལན་ཅིག་འཕྲད་པའི་སྐལ་བ་སྙིང་ལ་བྲིས།།
ཚོར་བའི་ཆུ་རྡུལ་འཁྲིགས་པའི་ལྡིང་ཁང་ན།།
མཛའ་བརྩེའི་མེ་ཏོག་གསོ་བའི་ན་ཆུང་མ།།
འཁོར་བའི་སྒེའུ་ཁུང་འགྲམ་གྱི་བསིལ་ཡབ་དང་།།
རྨི་ལམ་སྣང་བ་ང་ལ་གནང་རོགས་ཞུ།།
དུས་ཀྱི་འཕོ་འགྱུར་ཇི་ལྟར་འཚུབ་ཀྱང་ཆོག།
ལས་ཀྱི་ཆུ་རྐ་ཆེ་ཆུང་བརྒལ་ནས་འགྲོ།།
ཐུགས་ཀྱི་མཛའ་བ་གཏིང་ནས་མ་འདོར་དང་།།
འདི་ཕྱིའི་སྨོན་པ་ཁྱེད་དང་མཉམ་དུ་འདེབས།།
སྒྱུ་ལུས་སོར་ཆད་བར་ཐག་རིང་ཡང་ཆོག།
ཐུགས་བརྩེའི་རི་མོ་སྙིང་ནས་མ་ཞིག་པར།།
མཛའ་བརྩེའི་བར་ཐག་མེད་ན་དེས་ཆོག་གི།
འདི་སྣང་ལས་ཀྱི་ཁ་ཡིག་ཁྱེད་ལ་བཅོལ།།
དྭངས་གསལ་སྙིང་གི་དགའ་ལྡན་རི་མོ་རུ།།
སེམས་ལ་སེམས་ཀྱིས་བྲིས་པའི་དམ་ཚིག་དེ།།
ལས་ཀྱི་བསྐོས་ཐང་བཞིན་དུ་སྲུང་འདོད་ཀྱི།།
འདའ་དཀའི་ཆིངས་ཡིག་ཁྱེད་ཀྱི་དྲུང་དུ་ཕུལ།།
མེ་ཏོག་རྒྱན་དུ་བྱས་ཀྱང་མི་རྙིད་པའི།།
ལས་ཀྱི་ངལ་བ་བདག་གིས་སྐལ་དུ་ལེན།།
འཛུམ་པའི་སྤྱན་རས་གཡོ་བའི་ཅོག་སྟེགས་སུ།།
བདུད་རྩི་ཟས་ཀྱི་བཤམ་བཀོད་ཀུན་ནས་སྐྱོང་།།
སྤྲིན་ཕུང་དུམ་བུར་གཏིབས་བཞིན་མཁའ་ལ་རྒྱུ་བའི།།
ལྷ་ཡི་ན་ཆུང་སྒེག་ལྡན་མཛེས་པའི་ཡང་རྩེ།།
ཆུ་ཡི་པད་འདབ་སྙིང་གི་རི་མོའི་གསེབ་ཏུ།།
བྱུ་རུ་དམར་ཆུང་ཟོལ་གྱིས་འབབ་བཞིན་འདུག་ན།།
བུ་ཡི་ཐ་མ་ངས་ཀྱང་སྟོང་བའི་ཁམས་ལ།།
བརྩེ་བའི་སྐས་ཐེམ་བཙུགས་ཏེ་ལག་པ་བསྲིང་འདོད།།
དར་དཀར་འཇའ་ཡི་ན་བཟའ་གང་དགར་བཀླུབས་པའི།།
བརྒྱད་ཟུང་ལང་ཚོའི་མེ་ཏོག་གཡུར་དུ་ཟ་ཞིང་།།
སྨིན་མཛེས་སྟ་ཟུར་རི་མོ་གར་དུ་འཁྱུག་བཞིན།།
འཁྲང་ཟླུམ་མྱོས་བུམ་ཉི་ཟླ་ཟུང་གི་སྒེག་པས།།
སྲེད་ལྡན་བུ་ཡི་སྙིང་ལ་ག་ཚིལ་སྒོག་ན།།
འདི་ཕྱིའི་འཆིང་ཐག་བཅད་ནས་འཕྲུག་འཕྲུག་གནང་ཆོག།
བརྩེ་བའི་བྱམས་ཆེན་སྙིང་གི་གདན་ལ་བཞུགས་ཏེ།།
དགའ་འཛུམ་དྲོད་ཀྱི་ཐིག་ལེས་ལུས་ཁམས་གསོས་ཤིང་།།
འཆི་མེད་བདུད་རྩིའི་བྱིན་རླབས་སྙིང་ལ་འཕོས་ན།།
དད་འདུན་སྙིང་གི་རི་མོ་གསུབ་ཏུ་མེད་པར།།
སྨོན་ལམ་རེ་བའི་སྐྱེལ་སོ་འདི་རུ་གྲུབ་ཅིང་།།
གསོལ་འདེབས་བདེན་པའི་ཕྱི་མཐའ་འདི་ནས་དཀར་ཡོང་།།
༼ རྨོག་ཐང་དཀར། ༽