ཉེ་ཆར། རང་ཁུལ་གྱི་སྡེ་དགེ་རྫོང་དང་ཀྲེ་ཅང་ཞིང་ཆེན་ཧང་ཀྲོའུ་གྲོང་ཁྱེར་ཧྥུ་དབྱང་ཆུས་གཉིས་ཀྱིས་མཉམ་དུ་ཇུས་འགོད་བྱས་པའི་རིག་གནས་ཡུལ་སྐོར་སྤེལ་རེས་བྱེད་སྒོ་ཧྥུ་དབྱང་དུ་སྤེལ་བ་རེད། ད་ཐེངས་ཀྱི་བྱེད་སྒོར་སྡེ་དགེ་དང་ཧྥུ་དབྱང་ས་ཁུལ་གཉིས་ཀྱི་མཉམ་ལས་གཉིས་ཁེ་གཙོ་དོན་དུ་བྱས་ཤིང་། གཟུགས་མེད་རིག་གནས་ཤུལ་བཞག་འགྲེམ་སྟོན་དང་ཞིང་ལས་ཁྱད་རྫས་ཀྱི་གཟུགས་མེད་རིག་གནས་ཤུལ་བཞག་རིག་འཆར་འགྲེམ་ཚོང་།རིག་གནས་དམངས་ཕན་འཁྲབ་སྟོན་སོགས་ཀྱི་ཁྱད་ཆོས་གསུམ་འཛོམས་ཡོད། སྡེ་དགེའི་བོད་རིགས་རིག་གནས་ཀྱི་བཅུད་འཛོམས་པའི་རིག་གནས་གསོལ་སྟོན་ཆེན་པོ་ཞིག་ཧྥུ་ཁྲུན་གཙང་པོའི་འགྲམ་དུ་བཤམས་པ་དང་། མི་རིགས་མཐུན་སྒྲིལ་དང་རིག་གནས་མཉམ་འབྲེལ། ཚོང་དོན་མཉམ་ལས་བཅས་ཀྱི་མཉམ་ལས་གཉིས་ཁེའི་རྣམ་པ་བཟང་པོ་རབ་ཏུ་མངོན་ཡོད།
ད་ཐེངས་ཀྱི་བྱེད་སྒོར་རིག་གནས་དམངས་ཕན་འཁྲབ་སྟོན་ཧྥུ་དབྱང་གློག་བརྙན་ཟློས་གར་ཁང་དུ་འཁྲབ་པ་དང་། སྡེ་དགེ་རྫོང་ཨུའི་རྒྱུན་ཨུ་དང་རྫོང་སྲིད་གཞུང་གི་རྫོང་དཔོན་གཞོན་པ་ཆི་ཅི་ཡུང་དང་ཧྥུ་དབྱང་ཆུས་ཨུའི་རྒྱུན་ཨུ་དང་དྲིལ་བསྒྲགས་པུའུ་ཡི་པུའུ་ཀྲང་ཀྲང་ཕེང་། སྡེ་དགེ་རྫོང་ཨུའི་རྒྱུན་ཨུ་དང་རྫོང་སྲིད་གཞུང་གི་རྫོང་དཔོན་གཞོན་པ་ཁྲེང་ཅན་ཧུའེ། སྡེ་དགེ་རྫོང་རིག་གནས་རྒྱང་སྒྲོག་བརྙན་འཕྲིན་ཁང་དང་ཡུལ་སྐོར་ཅུས་ཀྱི་ཏང་ཚན་ཁག་གི་ཧྲུའུ་ཅི། ཅུས་ཀྲང་བཀྲ་ཤིས་བསོད་ནམས། ཧང་ཀྲོའུ་གྲོང་ཁྱེར་ཧྥུ་དབྱང་ཆུས་རིག་གནས་དང་རྒྱང་སྒྲོག་བརྙན་འཕྲིན་ཁང་། ཡུལ་སྐོར་ལུས་རྩལ་ཅུས་ཀྱི་ཏང་ཨུའི་ཧྲུའུ་ཅི། ཅུས་ཀྲང་ཅང་ཅན་ཅུན་བཅས་ཐེངས་འདིའི་བྱེད་སྒོར་ཞུགས་ཡོད།
ཆི་ཅི་ཡུང་གིས་ཐོག་མར་ཤིས་ཚིག་ཕུལ་བ་རེད། ཁོང་གིས་ཀྲེ་ཅང་ཧྥུ་དབྱང་དང་སི་ཁྲོན་སྡེ་དགེ་ས་ཁུལ་གཉིས་རིག་གནས་ཡུལ་སྐོར་མཉམ་འདྲེས་ཀྱི་ཆེད་དུ་ལྷན་དུ་འཛོམས་ནས་ཕན་ཚུན་སློབ་སྦྱོང་གི་གོ་སྐབས་ཐོབ་ཅིང་། ཧྥུ་དབྱང་ཆུས་ཨུ་དང་ཆུས་སྲིད་གཞུང་གིས་ཐོག་མར་ཕྱུག་པོར་གྱུར་ནས་རྗེས་མ་ཕྱུག་པོར་ཡོང་བར་རོགས་རམ་བྱས་ཏེ་མཐར་མཉམ་དུ་ཕྱུག་པོར་ཆགས་པའི་ཆབ་སྲིད་ཀྱི་འགན་འཁྲི་ཐོག་མཐའ་བར་གསུམ་དུ་འཁུར་བ་དང་། དུས་བབ་གསར་པ་དང་ལས་འགན་གསར་པ། སྡེ་དགེའི་ཐོན་ཁུངས་ཁྱད་འཕགས་ལ་དམིགས་ནས་སྡེ་དགེའི་དགོས་མཁོ་དང་ཧྥུ་དབྱང་གི་ནུས་པ་ཟུང་དུ་སྦྲེལ་ཏེ། དབུལ་ཐར་གྲུབ་འབྲས་སྲ་བརྟན་དུ་གཏོང་བ་དང་ཐོན་ལས་མཉམ་ལས་གཏིང་ཟབ་ཏུ་གཏོང་བ། རིག་སྟོབས་ཀྱི་རྒྱབ་སྐྱོར་ཤུགས་ཆེར་གཏོང་བ། ངལ་ལས་མཉམ་ལས་བྱེད་པ་སོགས་ཁྱབ་ཁོངས་ཀྱི་སྟོབས་ཤུགས་ཆེ་རུ་བཏང་སྟེ། གནད་ལ་འཁེལ་བའི་སྦྲེལ་མཐུད་དང་དངོས་སྒྲུབ་མཉམ་ལས། ཕན་ནུས་ཆེ་རུ་གཏོང་བ་སོགས་ལ་བརྟེན་ནས་སྡེ་དགེའི་དཔལ་འབྱོར་སྤྱི་ཚོགས་ཀྱི་བྱ་གཞག་ཁག་འཕེལ་རྒྱས་མྱུར་པོ་ཡོང་བར་བསྐུལ་ཡོད། ད་ཐེངས་ཧྥུ་དབྱང་དུ་སླེབས་དུས་ང་ཚོས་ཐུན་མོང་མ་ཡིན་པའི་སྡེ་དགེ་ཁྱད་ཆོས་ཀྱི་འཁྲབ་སྟོན་བྱེད་སྒོ་དང་གཟུགས་མེད་རིག་གནས་ཤུལ་བཞག་གི་མྱོང་རོལ་དང་འགྲེམ་ཚོང་སོགས་ཕུན་སུམ་ཚོགས་པའི་ནང་དོན་སྐྱེས་སུ་འབུལ་རྒྱུ་ཡིན་ཞེས་བཤད་པ་རེད།
དེ་རྗེས་ཀྲང་ཕེང་གིས་ཤིས་ཚིག་ཕུལ་བ་དང་། ཁོས་ན་ནིང་ས་ཁུལ་གཉིས་ཀྱིས་ཀྲེ་ཅང་སེ་འབྲུ་དམར་པོ་གཙོ་བོར་བྱས་ཏེ། གཟུགས་མེད་རིག་གནས་ཤུལ་བཞག་དང་ཡུལ་སྐོར་འབྲེལ་བའི་རིག་གནས་འགྲོ་འོང་དང་སྤེལ་རེས་བྱེད་སྒོ་གྲ་འགྲིག་ཕུན་སུམ་ཚོགས་པ་སྤེལ་ཡོད། དེ་རིང་རིག་གནས་སྤེལ་རེས་ཀྱི་འབྲེལ་ཟམ་བརྒྱུད་དེ་གླིང་གེ་སར་དང་ཧྥུ་དབྱང་གི་རི་ཆུ་རིག་གནས་ཀྱི་མཉམ་སྒྲོག་རོལ་དབྱངས་བརྩམས་ཡོད། ཧྥུ་དབྱང་མི་དམངས་ཀྱིས་སྒོ་ཁར་གངས་ལྗོངས་མཐོ་སྒང་གི་ཆེས་ལྷད་མེད་ཀྱི་མི་རིགས་ཁྱད་ཆོས་མྱོང་རོལ་ཐུབ་པ་དང་། སྡེ་དགེ་གཟུགས་མེད་རིག་གནས་ཤུལ་བཞག་གི་ཡིད་དབང་འཕྲོག་ཤུགས་མྱོང་རོལ་ཐུབ་པར་མ་ཟད། ཐག་རིང་ནས་ཡོང་བའི་མགྲོན་པོ་ཚོས་ཧྥུ་དབྱང་གི་རི་ཆུ་རིག་གནས་ཀྱང་དངོས་སུ་སླེབས་པ་ལྟར་ཡི་རང་བའི་སྒོ་ནས་མྱོང་རོལ་བྱེད་ཆོག་ཅེས་བཤད་པ་རེད།
འགོ་འཛུགས་མཛད་སྒོ་ཚར་རྗེས་རོལ་དབྱངས་ཟློས་གར《གླིང་གེ་སར་རྒྱལ་པོ》ཞེས་པ་དངོས་སུ་འཁྲབ་འགོ་བཙུགས་ཏེ། ཟློས་གར་དེ་བོད་ཀྱི་སྒྱུ་རྩལ་མཁས་ཅན་ཡ་ཏུང་གིས་སྤྱི་ཁྱབ་འཁྲབ་ཁྲིད་འགན་ཁུར་བ་དང་། སྐར་མ120ཡི་རིང་ལ་འཁྲབ་དགོས་པའི་གླིང་སྒྲུང་རིང་པོ་དེ་སྐར་མ60ཡི་ནང་དུ་བསྡུས་ནས་འཁྲུངས་གླིང་དང་བདུད་གླིང་། རྟ་རྒྱུག་རྒྱལ་འཇོག་བཅས་ལེ་ཚན་ཆེན་པོ་གསུམ་འཁྲབ་པ་དང་། དེ་རྗེས་བོད་ཀྱི་གླུ་པ་གླུ་མ་གྲགས་ཅན་ཡེ་ཤེས་དང་འཇམ་དབྱངས་ཆོས་སྒྲོན། རྫོགས་ཆེན་བསྟན་འཛིན། ཚེ་དབང་སོགས་ཀྱིས་གླུ་ཡི་མཆོད་པ་ཕུལ་བ་རེད།། （ བདེ་ཆེན་གྱིས་བསྒྱུར།）