དེ་ཡང་བོད་ཀྱི་བརྡ་སྤྲོད་པའི་ཁོངས་གཏོགས་ཀྱི་སྒྲའི་ཚིག་སྡུད་ཀྱི་ངོ་སྤྲོད་བྱེད་པ་ལ་དོན་ཚན་དྲུག་སྟེ། སྒྲའི་བསྡུ་ཚུལ་དྲུག་གི་གནའ་དཔེ་གལ་ཆེན་དག་ངོ་སྤྲོད་དང་། ཚིག་བསྡུ་དྲུག་གི་དངོས་གཞིའི་དཔེར་བརྗོད། སུམ་ཅུ་པའི་ཚིག་སྡུད་གཅེས་བཏུས། ཚིག་སྡུད་ཀྱི་མཐའ་དཔྱད།ཚིག་སྡུད་ཤེས་པའི་་དགོས་མཁོ། ཚིག་བསྡུ་མ་ཤེས་པའི་ཉེས་དམིགས་བཤད་པ་སོགས་ཀྱི་ནང་དོན་ནི། ཚིག་ཉུང་ལ་དོན་འདུས་པ་དང་། ཁུངས་ལུང་དང་རྒྱུ་མཚན་ཡོད་པ། ཀུན་ལ་བེད་སྤྱོད་ཆེ་ཞིང་དགོས་མཁོ་ཡོད་པ་ཞིག་འབྲི་ཁུལ་བྱས་ཡོད་ལགས།

དང་པོ།སྒྲའི་བསྡུ་ཚུལ་དྲུག་གི་དཔེ་ཆ་གལ་ཆེན་གྱི་སྐོར།

༡ ཁམས་ཀྱི་མཁས་པ་ཞེ་ཆེན་རྒྱལ་ཚབ་པདྨ་འགྱུར་མེད་རྣམ་རྒྱལ་གྱིས་བརྩམས་པའི༼ ཡི་གེའི་བརྡ་དག་གསལ་བར་སྟོན་པའི་བསྟན་བཅོས་བློ་གསལ་མགུལ་རྒྱན༽ སི་ཁྲོན་ཞིང་ཆེན་སྡེ་དགེ་རྫོགས་ཆེན་བོད་ཡིག་སློབ་གྲྭས་སྤྱི་ལོ་༡༩༨༢ལོར་པར་བསྐྲུན་བྱས། མཇུག་གི་ཤོག་ལྡེབ་༩༨ནས་༡༠༠བར་དུ་གཟིགས་དང་ཤེས། ཁོང་གིས་བསྡུ་ཚུལ་དྲུག་གི་དཔེ་ཆ་ཚང་བྲིས་འདུག།

༢ མཁས་མཆོག་མཛོད་དགེ་ཨ་ཁུ་ཉི་མའི་གསུང་འབུམ་དེབ་བཞི་པའི༼ སུམ་ཅུ་བའི་དྲི་བ་དྲིས་ལན་མུན་སེལ་ཟླ་འོད།༽ ཀྱི་ཤོག་ལྡེབ་༢༤༤ནས་༢༤༦བར་ན་གསལ་ལོ།། དཔེ་ཆ་འདི་ནི་སི་ཁྲོན་མི་རིགས་དཔེ་སྐྲུན་ཁང་གིས་སྤྱི་ལོ་༢༠༡༧ལོའི་ཟླ༣པར་དཔེ་བསྐྲུན་བྱས། ཁོང་གི་དཔེ་ཆའི་ནང་དུ་མི་ཟད་པའི་བསྡུ་བ་ལ་དཔེར་བརྗོད་བཞག་མེད་དོ།།

༣ འབྲས་ཚལ་བསྟན་པ་རབ་རྒྱས་ཀྱིས་བརྩམས་པའི༼ གངས་ཅན་བརྡ་སྤྲོད་པའི་བསྟན་བཅོས་སུམ་ཅུ་པ་དང་རྟགས་ཀྱི་འཇུག་པའི་རྣམ་བཤད་ཐོན་མི་དགྱེས་པའི་མཆོད་སྤྲིན།༽འདི་ནི་སི་ཁྲོན་མི་རིགས་དཔེ་སྐྲུན་ཁང་གིས་སྤྱི་ལོ༢༠༢༤ལོའི་ཟླ༧པར་དཔེ་བསྐྲུན་བྱས། དེབ་འདིའི་ཤོག་ལྡེབ༣༧༨ནས་༣༨༢བར་གྱི་ནང་དུ་ཚིག་སྡུད་དྲུག་སྤྱིར་བཤད་པ་དང་། བྱེ་བྲག་ཏུ་བཤད་པ། མཐའ་དཔྱད་བཅས་དོན་ཚན་གསུམ་གྱི་ནང་དུ་བསྡུས་ནས་འགྲེལ་བཤད་གསལ་པོ་བརྒྱབ་ཡོད། སྒྲའི་བསྡུ་ཚུལ་དྲུག་གི་འགྲེལ་བཤད་ཆ་ཚང་བ་ཞིག་དཔེ་ཆ་འདི་གསུམ་མ་གཏོགས་དེ་སྔོན་ཁོ་བོས་མཐོང་མ་མྱོང་། གོང་བཤད་ཀྱི་དཔེ་ཆ་རྣམས་ཀྱི་རྨང་གཞི་བྱས་ཏེ་ཕྲན་གྱིས་སྒྲའི་བསྡུ་ཚུལ་དྲུག་གི་དཔེར་བརྗོད་དང་འགྲེལ་བཤད་བཅས་ཧ་ལམ་ཙམ་ཞིག་བྲིས་ཡོད།