འཆར་ཡན་ངག་གི་གླུ་དབྱངས་གང་དུ་སྒྲོག། །
བརྩེ་སེམས་ལས་ཀྱི་ཀུ་མུད་གང་ལ་འཛུམ། །
ས་གཞིར་མེ་ཏོག་སྐྱེས་པའི་ལམ་འགྲམ་ནས། །
ཁོ་བོའི་སྙིང་ལ་སྡུག་པའི་རོགས་ཤིག་མཐོང་། །
ཁྱོད་ཀྱི་བཟོ་ལྟ་ལྷ་ཡི་ཚལ་དུ་འཁྲུངས། །
བདག་གི་ཡིད་སེམས་དབང་མེད་བརྐུས་ཏེ་སོང་། །
ད་དུང་མཇལ་འཛོམས་ཐེངས་ཤིག་ཡོད་པ་ན། །
ཁྱོད་ལ་དགའ་ཞེས་ལབ་ནོ་ཁོ་ཐག་ཡིན། །
དང་ཐོག་འཕྲད་དུས་ཅུང་ཙམ་དོགས་པ་འདུག །
བསྟུན་མར་ལབ་གླེང་བྱེད་ཕོད་མ་བྱུང་ཐ། །
ཡིན་ཡང་ཁྱོད་ཀྱི་ཟུར་མིག་ངར་ཕྱོགས་པས། །
ཁོ་བོའི་ཡིད་སེམས་གཏིང་ནས་ཚིམས་ཏེ་ཡོད། །
ཁྱོད་ནི་ལན་གཅིག་མཐོང་བའི་ཡིད་སེམས་ལ། །
དགའ་དང་བརྩེ་བའི་དྲོད་ཁུལ་འཛུམ་ལུགས་ཀྱིས། །
མ་འོངས་འཁོར་བའི་ཐང་ནས་འུ་གཉིས་ལ། །
ལས་ཀྱི་བསྐལ་བ་ལྡན་ནོ་ཁོ་ཐག་རེད། །
ཕན་ཚུན་ཆ་རྒྱུས་ཏིལ་ཙམ་མེད་ན་ཡང་། །
སོ་སོར་ཟུར་མིག་འཕེན་པ་ཅིའི་ཕྱིར་ལགས། །
དེ་ནི་ལམ་ཐུག་བྱུང་བའི་མི་དེ་ལ། །
བརྩེ་བའི་སྡོང་ལོ་འཁྲུངས་པའི་སྔ་ལྟས་སམ། །
ངག་རིག་ཚིག་གི་སྒྱུ་རྩལ་དབེན་ན་ཡང་། །
དོན་ཟབ་གནད་ཀྱི་བརྗོད་བྱ་སྟོན་ནུས་པའི། །
བདག་གི་འགྱུར་ཁུག་དཔྱིད་ཀྱི་གླུ་དབྱངས་འདི། །
ཁྱོད་རང་དགྱེས་པའི་གསོས་སུ་སྨིན་པར་ཤོག །
ཀུ་རེ་ཚིག་གི་གཏམ་གླེང་བྱས་པ་མིན། །
ཨ་རོགས་སྙིང་སྡུག་སྤྲིངས་པའི་ཕོ་ཉ་ཡིན། །
རྒྱང་བཞུད་ཁྲུང་ཁྲུང་དཀར་མོ་ཁྱེད་རང་གིས། །
ང་ལ་ལན་ཅིག་ཕྱི་མིག་བལྟ་རོགས་གྱིས། །
དགའ་བདེའི་མེ་ཏོག་སེར་ཆེན་འཁྲུངས་ཏེ་སོང་། །
བརྩེ་བའི་ཁྲེལ་གཞུང་མི་འགྱུར་དམ་བཅའ་བརྟན། །
ཨ་རོགས་ན་ཆུང་ཟུར་མདའ་འཕེན་པའི་མི། །
ད་དུང་མཇལ་འཛོམས་ཡོང་བར་རེ་སྨོན་ཡོད། །
༼ ཁམས་ཟླ་སྲས། ༽