མི་རྟག་འཇའ་ཚོན་ཤར་བའི་ཐུ་འོག་ནས།།

མི་ལུས་གཡར་པོ་ལན་རེ་བླངས་ན་ཡང་།།

ནུས་མེད་གྲོག་མ་བཞིན་དུ་འགྲོ་བའི་ཚེ།།

ངལ་བའི་སེམས་ལ་ལྗིད་པའི་ཁུར་ཆེན་ལྷུང་།།

མི་ཁའི་རླུང་འཚུབ་ལྡང་བའི་རི་གྲོང་ནས།།

ཡག་སྡུག་འཚོ་བའི་ངོ་གདོང་འཆར་བའི་ཚེ།།

འཇིག་རྟེན་རང་ལ་མི་དབང་མི་ཁ་ཡིས།།

སེམས་སུ་མདའ་གྲི་ཕོག་པའི་བྱིའུ་ཆུང་བཞིན།།

རང་སེམས་མི་སྙན་སྐད་ཀྱིས་གཟན་པའི་དུས།།

ལུས་ཀྱི་ཤ་ཁྲག་གཟེབ་ཏུ་འཐིམས་པ་ཡིས།།

དྲོད་འཇམ་སྙིང་གི་ཁྲག་མཚོ་རབ་དཀྲུགས་ནས།།

ཟུངས་མེད་ལུས་ཀྱི་ཕུང་པོ་གཉོམ་ཞིང་དུད།།

མི་འཕྲོད་བྱ་བས་ལུས་ལ་འཚང་པ་ཡིས།།

རང་མལ་གནས་པའི་འདུན་པ་བོར་བྱེད་ཅིང་།།

སྙིང་གི་འཕར་ཚད་བརྒལ་བའི་རང་སེམས་ལ།།

གདུང་བའི་སྨྲེང་ངག་རྒྱ་མཚོའི་རླབས་ལ་འདྲེས།།

ཕྱི་ཡི་ཁོར་ཡུག་རང་ཉིད་གཙེས་པ་ཡིས།།

མི་སྡོད་འཆི་བའི་ལམ་ལ་ཁ་ཕྱོགས་ཤོར།།

ཡུན་ཐུང་མི་ཚེ་རིན་ཐང་བྲལ་བའི་ངང་།།

གསོན་པའི་དམིགས་ཡུལ་མུན་པའི་སྨག་ནང་ཡིབ།།

སྐད་ཅིག་འཇིག་རྟེན་ངོས་ལ་འཚོ་ཙམ་གྱིས།།

གཞན་གྱི་ཟེར་སྒྲོས་ལམ་ནས་འགྲོ་བའི་དུས།།

རང་དབང་རྨང་ནས་བོར་བའི་མི་ཚེ་འདིར།།

སེམས་གཅོང་ཟབ་ཅིག་རང་ལ་ན་དགོས་བྱུང་།།

རྒྱུ་དང་འབྱོར་བ་བཙལ་ལ་བང་ཁ་འགྲན།།

གཉེན་ཉེ་ཕན་ཚུན་ཡིན་ཡང་ཕྲག་དོག་གིས།།

བཟི་སྟེ་མི་དགའི་རྣམ་འགྱུར་ཅི་ཡང་ཡོང་།།

དེང་གི་སྤྱི་ཚོགས་རྙོག་འཛིང་སུན་སྣང་སྐྱེད།།

ཕ་མས་བཀའ་བཀྱོན་ཡང་དག་ཆར་ལྟར་འཇོ།།

ཕན་ཚུན་འདྲིས་པའི་གྲོགས་ཀྱིས་དེ་བས་སྨྲ།།

རང་སེམས་སྨྱོ་ལ་ཁད་པའི་ནམ་ཟླ་འདིར།།

བྲང་ཁོང་གཟེར་འདི་འཇགས་ལ་ཉིན་ཞིག་དཀོན།།

མི་ཚེར་སྐྱིད་སྡུག་ཆུ་རིས་འཁྲིགས་ན་ཡང་།།

སེམས་ཁམས་ན་བའི་ཚུལ་ཞིག་འབྱུང་དུ་ཡོད།།

རང་གིས་བདམས་པའི་འཇིག་རྟེན་འཚོ་བ་ལས།།

སྙིང་རླུང་སྟོད་དུ་འཚངས་པར་རབ་ཏུ་སྐྱོ།།

འདི་ལྟར་སེམས་གཅོང་སྐད་ཆ་ལག་ནས་ཤོར།།

སྨྲེང་བའི་ཚིག་ཕྲེང་ཟད་མེད་དབྱངས་ལ་བསྟར།།

སྐྱོ་བའི་ཟུར་སྣེ་ངོ་གདོང་ངོགས་ནས་གསལ།།

དེང་དུས་སྤྱི་ཚོགས་སྙིང་པོ་མེད་པར་སྨྲ།།