སུ་ཡང་མེད་པའི་མཚན་གུང་འདིར།
ང་དང་ཆང་དམ་ཞིག། ད་རུང་དུ་བ་རྐང་གཅིག།
ཅོག་ཙེའི་སྟེང་ན། ཆང་ཕོར་གང་བླུགས་ཏེ།
དུ་བ་རྐང་གཅིག་མེ་ལ་སྒྲོན།
འཚོ་བའི་ངོ་གདོང་ན།
མི་ཚོས་འུར་འུར་གྱིས་ཕུགས་འདུན་བསྙེགས་ཏེ།
མདུན་དུ་གོམ་ཁ་བསྒྱུར་བའི་ལམ་ལ་ཆས།
འོན་ཀྱང་། ང་རང་ད་རུང་ཆང་བཏུང་སྟེ་བསྡད།
སྒྱུ་མའི་འཇིག་རྟེན་ནས།
མི་ཚོས་དགའ་སྡུག་གི་མྱོང་བ་གླེང་།
ང་དང་ཁྱོད་ཟེར་ནས་འུར་གྱིས་བཀང་།
ང་རང་ད་རུང་སུ་ཡང་མེད་པའི་གནས་དེར་བསྡད།
སྐད་ཅིག་མའི་གནས་འདིར།
མི་ཚོས་ཐོབ་དང་གོ་ས། རྒྱུ་དང་འབྱོར་བ་འཚོལ་བཞིན།
ང་དང་ཁོ་ཟེར་ནས་དཔུང་པ་འཕྲེད་ལ་གཡུགས།
ཁ་ལྕེ་བདེ་བདེ་དང་ཀླད་པ་གྲུང་གྲུང་བྱས་ཏེ་འུར་གྱིས་བཀང་།
ང་རང་ད་རུང་དུ་བ་འཐེན་ཏེ་ཆང་གིས་བཟིས་ནས་བསྡད།
ཆང་ཕོར་གང་བཏུང་སྟེ།
དུ་བ་རྐང་གཅིག་འཐེན་ཞོར།
ངས་དེ་ལྟར་བསམས་ནས་རྒྱང་རིང་གི་ཉི་ནུབ་མཚམས་སུ།
ཡང་ཡང་གཡེང་ནས་མི་ཚེ་འདི་སྐྱེལ་ལ་རན།